ភ្នំពេញ៖ សមត្ថកិច្ចនគរបាលខណ្ឌឫស្សីកែវ សហការជាមួយនគរបាលខេត្តកំពង់ធំ និងសៀមរាប បានបើកការស៊ើបអង្កេត និងស្រាវជ្រាវឈានដល់ការឃាត់ខ្លួនជនសង្ស័យ ចំនួន ០៣ នាក់ ពាក់ព័ន្ធក្នុងករណី គាស់បន្ទប់ជួលលួចយកលុយ និងសម្ភារៈមានតម្លៃរបស់នារីម្នាក់ អស់ជាង ៣ ម៉ឺនដុល្លារ នៅសង្កាត់ទួលសង្កែទី១ ខណ្ឌឫស្សីកែវ កាលពីថ្ងៃទី២១ ខែវិច្ឆិកា ឆ្នាំ២០២៥ កន្លងទៅ។

ក្រោយមានករណីនេះ លោកឧត្តមសេនីយ៍ឯក ជួន ណារិន្ទ អគ្គស្នងការរង ជាស្នងការនគរបាលរាជធានីភ្នំពេញ បានដាក់បទបញ្ជាឱ្យកម្លាំងជំនាញអធិការដ្ឋាននគរបាលខណ្ឌប្ញស្សីកែវ ដឹកនាំដោយលោកវរសេនីយ៍ឯក ហ៊ាង ថារ៉េត  អធិការនគរបាលខណ្ឌប្ញស្សីកែវ សហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសៀមរាប និងកម្លាំងស្នងការដ្ឋាននគរបាលខេត្តកំពង់ធំ នៅវេលាម៉ោង ១៨និង៣០នាទី ថ្ងៃទី២៨ ខែវិច្ឆិកា ឆ្នាំ២០២៥ បានស្រាវជ្រាវឃាត់ខ្លួនជនសង្ស័យ ប្រុស-ស្រីចំ នួន ០៣ នាក់ ជាបន្តបន្ទាប់។

ជនសង្ស័យទាំងបីនាក់ គឺពាក់ព័ន្ធករណី “លួចមានស្ថានទម្ងន់ទោស ដោយការកាប់គាស់ទម្លុះទម្លាយ និងសមគំនិតអំពើលួចមានស្ថានទម្ងន់ទោស និងទទួលផលចោរកម្ម”  (ឆ្កិះសោបន្ទប់ជួលលួចប្រាក់ ចំនួន ៣ ម៉ឺនដុល្លារ នៅចំណុច បន្ទប់ជួល ផ្លូវ១០៣ ក្រុម៣ ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ នៅថ្ងៃទី២១ ខែវិច្ឆិកា ឆ្នាំ២០២៥ វេលាម៉ោង ០៥និង៣០នាទីទាបភ្លឺ។

ក្នុងប្រតិបត្តិការឃាត់ខ្លួនជនសង្ស័យទាំង០៣នាក់នោះ ដោយសមត្ថកិច្ចឃាត់ជនសង្ស័យបាន ចំនួន ០១ នាក់នៅចំណុច ផ្លូវ K5  ភូមិចុងខ្សាច់ សង្កាត់ទួលសងែ្ក១ ខណ្ឌឬស្សកែវ រាជធានីភ្នំពេញ និងជនសង្ស័យ ចំនួន ០២ នាក់ ក្នុងនោះ ស្រី០១នាក់ ឃាត់ខ្លួននៅចំណុច ផ្លូវជាតិលេខ៦ ស្រុកបារាយណ៍ ខេត្តសៀមរាប។

ជនសង្ស័យទាំងបីនាក់ រួមមាន៖ ទី១- ឈ្មោះ ឆោម ទិត្យរង្សី ភេទប្រុស អាយុ ៣៨ឆ្នាំ មានមុខរបរមិនពិតប្រាកដ ស្នាក់នៅផ្ទះលេខ F១ ភូមិទួលសង្កែ សង្កាត់ទួលសង្កែទី១ ខណ្ឌឬស្សីកែវ មានផ្ទុកសារធាតុញៀន។ ២- ឈ្មោះ យឹម ស្រីប៉ុច ភេទស្រី អាយុ ៣៣ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅស្នាក់នៅបន្ទប់ជួល ភូមិ២១ សង្កាត់ស្រះចក ខណ្ឌដូនពេញ  រាជធានីភ្នំពេញ មានសារធាតុញៀន ធ្លាប់ជាប់ពន្ធនាគារ ០១ លើក និងទី៣- ឈ្មោះ អាន វិនា ភេទប្រុស អាយុ ២៥ឆ្នាំ ជនជាតិខ្មែរ មុខរបរ ជាងដែក មានទីលំនៅស្នាក់នៅបន្ទប់ជួល ភូមិ២១ សង្កាត់ស្រះចក ខណ្ឌដូនពេញ  រាជធានីភ្នំពេញ ធ្លាប់ជាប់ពន្ធនាគារ ០១ លើក។

ចំណែកជនរងគ្រោះក្នុងករណីគាស់ផ្ទះលួចលុយខាងលើ មានឈ្មោះ អេង លាងហៀង ភេទស្រី អាយុ ៣២ឆ្នាំ ជនជាតិខ្មែរ មានទីលំនៅបន្ទប់ជួល ផ្លូវ១០៣ ក្រុម៣ ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ មុខរបរ បុគ្គលិកហាង។ សម្ភារៈដកហូតរួមមាន៖ ម៉ូតូ ចំនួន ០១ គ្រឿង ម៉ាក ADV ពណ៌ស ពាក់ស្លាកលេខភ្នំពេញ 1MB-5101, ទូរសព្ទ ចំនួន ០៣ គ្រឿង, លោហៈធាតុខ្សែក ប្រវែង ៥៥ សង់ទីម៉ែត្រ ចំនួន ០១ ខ្សែមានបន្តោងរូបយុទ្ធនាការ, លោហៈធាតុប្រភេទខ្សែដៃ ប្រវែង ១៨ សង់ទីម៉ែត្រ, លោហ:ធាតុប្រភេទចិញ្ចៀន ១វង់, ប្រាក់ ចំនួន ២១០០ដុល្លារអាមេរិក និងប្រាក់ ចំនួន ១០២ ៤០០០ យេន។      
បច្ចុប្បន្នជនសង្ស័យខាងលើកំពុងកសាងសំណុំរឿងចាត់ការតាមនិតិវិធី៕