(កំពង់ធំ)៖ រដ្ឋបាលខេតុ្តកំពង់ធំ នៅព្រឹកថ្ងៃទី៩ ខែវិច្ឆិកា ឆ្នាំ២០២៣នេះ បានរៀបចំពិធីអបអរសារទរខួបអនុស្សាវរីយ៍លើកទី៧០ នៃទិវាបុណ្យឯករាជជាតិ ៩ វិច្ឆិកា (៩ វិច្ឆិកាឆ្នាំ១៩៥៣-៩ វិច្ឆិកា ឆ្នាំ២០២៣) និងទិវាកំណើតនៃកងយោធពលខេមរភូមិន្ទ។
ពិធីនេះបានធ្វើឡើងក្រោមអធិបតីភាពលោកស្រី សុខ ចន្ធូ សមាជិកក្រុមប្រឹក្សាខេត្តកំពង់ធំ និងឯកឧត្តម ងួន រតនៈ អភិបាលខេត្ត នៅទីតាំងវិមានឯករាជ្យ ដោយមានការចូលរួមពីសមាជិកក្រុមប្រឹក្សាខេត្ត អភិបាលរងខេត្ត កងកម្លាំងប្រដាប់អាវុធ មន្ត្រីរាជការ ប្រជាពលរដ្ឋ លោកគ្រូ អ្នកគ្រូ សិស្សានុសិស្ស យុវជនកាកបាទក្រហម យុវជនកាយឫទ្ធិ និងយុវជនសហភាពសហព័ន្ធកម្ពុជា ជាច្រើនរូបទៀត។
ឯកឧត្តម ងួន រតនៈ បានលើកឡើងថា យើងខ្ញុំទាំងអស់គ្នាពិតជាមានមោទនភាពណាស់ដែលព្រះអង្គបានបន្សល់ទុកនូវស្នាមព្រះហស្ថនិងព្រះរាជលំអានឱ្យទូលព្រះបង្គំយើងខ្ញុំជាកូនចៅ ចៅទួតជំនាន់ក្រោយបានយល់ដឹងពីគំរូព្រះវីរភាពរបស់ព្រះអង្គក្នុងការដឹកនាំនាវាកម្ពុជាប្រកបដោយទសពិធរាជធម៌ ព្រះបញ្ញាញាណភ្លឺស្វាងនិងទេពកោសល្យ កសាងសន្តិភាព ស្ថេរភាព ជីវភាពនយោបាយ សាមគ្គីភាពជាតិ ឯកភាពជាតិរឹងមាំ កសាងអភិវឌ្ឍន៍សង្គម និងជីវភាពរស់នៅរបស់ប្រជាពលរដ្ឋដោយសុខដុមរមនា ព្រះអង្គជាព្រះមហាបុរសរដ្ឋដ៏ឧត្តង្គឧត្តម ប៉ុន្តែអ្វីដែលគួរឱ្យសោកស្តាយរកទីបំផុតគ្មាននោះ គឺព្រះអង្គទ្រង់បានទម្លាយខន្ធចោលទូលព្រះបង្គំយើងខ្ញុំទាំងអស់គ្នា ដោយពុំមានថ្ងៃវិលត្រឡប់វិញឡើយ។
លោកបន្តថា យើងខ្ញុំសូមសម្តែងនូវមនោសញ្ចេតនាសោមនស្សរីករាយនូវទិវាជាប្រវត្តិសាស្ត្រដែលកម្លាំងមហាសាមគ្គីជាតិទាំងមូលបានដណ្តើមបានទាំងស្រុងមកវិញនូវឯករាជ្យជាតិជូនជាតិមាតុភូមិពេញបរិបូរណ៍ពីអាណានិគមនិយមបារាំងនាថ្ងៃទី៩ វិច្ឆិកាឆ្នាំ១៩៥៣ក្រោមព្រះរាជបូជនីយកិច្ចដ៍ថ្លៃថ្លាឧត្តុង្គឧត្តមនៃព្រះករុណាព្រះបាទសម្តេចព្រះនរោត្តមសីហនុ ព្រះមហាវីរក្សត្យព្រះវររាជបិតាឯករាជ្យបូរណភាពទឹកដីនិងឯកភាពជាតិខ្មែរព្រះបរមរតនកោដ្ឋ។
ឯកឧត្តមបានបន្តថា រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន ជានាយករដ្ឋមន្ត្រីនៃកម្ពុជា ក្រោមម្លប់របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី តែងតែដង្ហែរតាមព្រះរាជតម្រិះដ៏ថ្លៃថ្លារបស់ព្រះអង្គនិងបានសម្ដែងនូវមនោសញ្ចេតនាគោរពស្រលាញ់ក្នុងទឹកចិត្តប្រកបដោយកត្តញ្ញូតាធម៌ដ៏ជ្រាលជ្រៅ និងស្មោះត្រង់ចំពោះព្រះអង្គជាព្រះបិតាឯករាជ្យជាតិ បង្រួបបង្រួមជាតិនិងផ្សះផ្សាជាតិ ក្រោមបាវចនា ជាតិ សាសនា ព្រះមហាក្សត្យ ក្នុងទិសដៅថែរក្សាការពាររដ្ឋធនុញ្ញ ពង្រឹងសន្តិភាព ស្ថេរភាពនយោបាយ ការបង្រួបបង្រួមជាតិ ផ្សះផ្សាជាតិ និងអភិវឌ្ឍន៍ប្រទេសឱ្យរីកចម្រើនដូចសព្វថ្ងៃ។
បន្ថែមពីនេះទៀត ក្នុងនាមក្រុមប្រឹក្សាខេត្ត គណៈអភិបាលខេត្ត លោក ងួន រតនៈ បានសម្ដែងការកោតសរសើរចំពោះ ការខិតខំប្រឹងប្រែងបំពេញការងាររបស់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ដែលបានចូលរួមថែរក្សា សន្តិភាពការពារបូរណភាពទឹកដីយ៉ាងអង់អាចក្លាហាន រឹងមាំបំផុត និងខិតខំដឹកនាំខេត្តកំពង់ធំឲ្យមានការរីកចម្រើនទៅមុខ៕
បង្រ្កាបផលិតផលគ្រឿងក្នុងជ្រូកខូចគុណភាព គ្មានសុវត្ថិភាព ជាង ៧០០គីឡូក្រាម ដែលចូលពីប្រទេសជិតខាង នៅក្នុងភូមិសាស្ត្រសង្កាត់ទួលសង្កែ១ យកទៅដុតកម្ទេចចោល
