ភ្នំពញ៖ “ការការពារ មុនការព្យាបាល” គឺជាមូលដ្ឋានគ្រឹះក្នុងការពង្រីក និងអភិវឌ្ឍសហគមន៍តំបន់ការពារធនធានធម្មជាតិឱ្យក្លាយជាសហគមន៍អព្យាក្រឹតការបូន នៅឆ្នាំ២០៥០។ នេះជាការថ្លែងឡើងរបស់ លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នាឱកាសពិធីបិទអង្គសិក្ខាសាលាស្តីពី ការពង្រឹងប្រសិទ្ធភាព ការគ្រប់គ្រងសហគមន៍តំបន់ការពារធម្មជាតិ នារសៀលថ្ងៃទី២៨ ខែវិច្ឆិកា ឆ្នាំ២០២៥ នៅទីស្តីការក្រសួងបរិស្ថាន។

ជាការគូសបញ្ជាក់បន្ថែម លោករដ្ឋមន្រ្តីលើកឡើងថា “ការការពារគឺជាវិធានការឈ្នះៗ នៃសសរត្ថម្ភទី២ គឺភាពបៃតង របស់យុទ្ធសាស្រ្តចក្រាវិស័យបរិស្ថាន ពីព្រោះថាបើមិនមានការការពារ និងការទប់ស្កាត់ដោយការអនុវត្តច្បាប់ ១០០% នោះទេ ការអភិវឌ្ឍដែលបានដាក់ចេញឱ្យមានការរៀបចំជារបៀងអេកូទេសចរណ៍ ស្របតាមអនុសាសន៍របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក៏មិនអាច សម្រេចបានដែរ”។

ទន្ទឹមនេះ លោករដ្ឋមន្រ្តី ក៏បានផ្តល់អនុសាសន៍ តម្រង់ទិសដល់អគ្គនាយកដ្ឋានសហគមន៍តំបន់ការពារ ធម្មជាតិ ដោយអនុញ្ញាតឱ្យរៀបចំប្រព័ន្ធតាមដានការគ្រប់គ្រងសហគមន៍តំបន់ការពារធម្មជាតិ ស្របតាមអង្គសិក្ខាសាលាបានស្នើសុំ ដើម្បីជំរុញលើកទឹកចិត្តដល់ប្រជាសហគមន៍មូលដ្ឋាន នៅតាមតំបន់ការពារធម្មជាតិ ក្លាយជាសហគមន៍អព្យាក្រឹតកាបូននៅឆ្នាំ២០៥០ និងមានប្រាក់ចំណូលខ្ពស់ ស្របតាមចក្ខុវិស័យរបស់ប្រមុខរាជរដ្ឋាភិបាលកម្ពុជា ដែលដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលកំពុងអនុវត្តបន្តស្នាដៃ និងសមិទ្ធផលធំៗពី សម្តេចតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភានៃព្រះរាជាណាចក្រកម្ពុជា។

គួរជម្រាបជូនថា តំបន់គោលដៅលំហែបៃតងប្រមាណ ១២៣ ទីតាំង ដែលត្រូវបានចងក្រង ជាមួយគ្នានេះ ក៏មានគម្រោងវិនិយោគអភិវឌ្ឍន៍ទេសចរណ៍ធម្មជាតិខ្នាតធំ ចំនួន ៣៦ គម្រោង គម្រោងវិនិយោគអភិវឌ្ឍន៍ទេសចរណ៍ផ្សារភ្ជាប់នឹងធម្មជាតិខ្នាតតូច ចំនួន ៣៩៨ គម្រោង  គម្រោងខ្នាតធំដំណើរការល្អមាន ចំនួន ២៤ គម្រោង និងសហគមន៍ដែលកំពុងផ្តល់សេវាកម្មទេសចរណ៍ធម្មជាតិ សរុបចំនួនជាង ៥៣  ក្នុងនោះសហគមន៍ដែលកំពុងដំណើរល្អមាន ចំនួន ៣៨  និងសហគមន៍ដែលកំពុងរៀបចំផ្តល់សេវាកម្ម ៣៣ សហគមន៍៕