ថៃ៖ នៅថ្ងៃទី២៩ ខែវិច្ឆិកា ឆ្នាំ២០២៥ បុរសជនជាតិចិនម្នាក់ បានជាន់មីននៅតំបន់ព្រំដែន កម្ពុជា-ថៃ ក្នុងខេត្តស្រះកែវ ប្រទេសថៃ បណ្តាលឱ្យរងរបួសធ្ងន់ ដោយបាត់បង់ជើងខាងស្តាំ។ ភ្លាមៗ ក្រុមកងកម្លាំង Burapha Task Force បានប្រញាប់ចុះជួយសង្គ្រោះ និងដឹកបញ្ជូនជនរងគ្រោះទៅមន្ទីរពេទ្យ Khok Sung ដើម្បីព្យាបាល។

តាមប្រព័ន្ធផ្សព្វផ្សាយក្រុងបាងកក បានឱ្យដឹងថា កងទ័ពតំបន់ទី១ តាមរយៈមជ្ឈមណ្ឌលប្រតិបត្តិការតំបន់ទី១ បានទទួលរបាយការណ៍ពីកម្លាំង Burapha ថាមានមនុស្សម្នាក់បានឆ្លងព្រំដែនចូលខាងថៃ ដោយខុសច្បាប់ ហើយបានជាន់មីនបណ្តាលឱ្យរងរបួសធ្ងន់។

ការត្រួតពិនិត្យបានរកឃើញថា នៅម៉ោង ០៥និង៥០នាទីព្រឹក កម្លាំងពិសេស BPP ទី៤ បានឮសំឡេងផ្ទុះនៅតំបន់ព្រៃប្រហែល ៨០-៩០ ម៉ែត្រ ពីផ្លូវ Si Phen។ ក្រុម Task Force 12 បានប្រើឌ្រូនត្រួតពិនិត្យ និងវាយតម្លៃស្ថានភាពភ្លាមៗ រកឃើញបុរសជនជាតិចិនរងរបួស។

ក្រុមឯកទេសបំបាត់មីន Humanitarian Demining Unit 1 (HDU1) ត្រូវបានបញ្ជូនទៅកន្លែងកើតហេតុភ្លាម ដើម្បីធ្វើប្រតិបត្តិការជួយសង្គ្រោះបន្ទាន់។ ជនរងគ្រោះត្រូវបានដឹកតាមរថយន្តទៅមន្ទីរពេទ្យ Khok Sung សម្រាប់ព្យាបាល។

ការត្រួតពិនិត្យលិខិតឆ្លងដែនបង្ហាញថា ជនរងគ្រោះជាជនជាតិចិន មានអាយុ ២៦ឆ្នាំ មកពីខេត្តយូណាន ប្រទេសចិន រងរបួសធ្ងន់ ដោយជើងខាងស្តាំខ្ទេច។ គេសង្ស័យថា គាត់បានឆ្លងព្រំដែនចូលខាងថៃ ដោយខុសច្បាប់។ នៅកន្លែងកើតហេតុជាតំបន់ដែលមានមីននៅភូមិសាស្ត្របានណងចាន់ ដែលភាគីថៃ នៅតែបន្តយកចិត្តទុកដាក់ដោះមីន។
ក្រុម Task Force 12 បានសម្របសម្រួលជាមួយនគរបាលអន្តោប្រវេសន៍ខេត្តស្រះកែវ ដើម្បីបន្តស៊ើបអង្កេត និងដំណើរការតាមច្បាប់លើករណីនេះ៕