ភ្នំពេញ៖ ព្រឹត្តិការណ៍ “សប្តាហ៍បេតិកភណ្ឌវប្បធម៌អរូបីនៃកម្ពុជាលើកទី១” ក្រោមប្រធានបទ “ខួប១០ឆ្នាំ នៃការបញ្ចូលល្បែងទាញព្រ័ត្រក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ” រៀបចំឡើងរយៈពេល ២ថ្ងៃ គឺថ្ងៃទី២៩ និងថ្ងៃទី៣០ ខែវិច្ឆិកា ឆ្នាំ២០២៥ នៅបរិវេណជុំវិញរូបសំណាក តេជោមាស តេជោយ៉ត តាមបណ្តោយផ្លូវ Walk Street។

នារសៀល ថ្ងៃសៅរ៍ ទី២៩ ខែវិច្ឆិកា ឆ្នាំ២០២៥ ម្សិលមិញ លោកស្រី ឡងឌី សាន់ណារ៉ា រដ្ឋលេខាធិការ តំណាងបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ អញ្ជើញចូលរួមជាអធីបតី ក្នុងព្រឹត្តិការណ៍ “សប្តាហ៍បេតិកភណ្ឌវប្បធម៌អរូបីនៃកម្ពុជាលើកទី១ ឆ្នាំ២០២៥” ដែលរៀបចំដោយអគ្គនាយកដ្ឋានបច្ចេកទេសវប្បធម៌។ 

គោលបំណងរៀបចំកម្មវិធីនេះ គឺដើម្បីអបអរសាទរកម្ពុជាក្នុងនាមជារដ្ឋភាគីដែលបានដាក់បញ្ចូលបេតិកភណ្ឌវប្បធម៌អរូបីក្នុងបញ្ជីបេតិកភណ្ឌវប្បធម៌នៃមនុស្សជាតិ របស់អង្គការយូណេស្កូ ដែលសរុបទាំងអស់មានចំនួន ៧ បេតិកភណ្ឌវប្បធម៌អរូបី រាប់ចាប់តាំងពីឆ្នាំ២០០៣ រហូតដល់ឆ្នាំ២០២៤។

ដោយឡែក “ល្បែងទាញព្រ័ត្រ” បានចុះក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ កាលពីថ្ងៃទី២ ខែធ្នូ ឆ្នាំ២០១៥។ គិតមកទល់ពេលនេះ គឺមានរយៈពេល ១០ឆ្នាំ មកហើយ ទើបក្រសួងវប្បធម៌ និងវិចិត្រសិល្បៈ សម្រេចរៀបចំកម្មវិធីសប្តាហ៍នៃមរតកវប្បធម៌អរូបីនៅកម្ពុជាលើកទី១ ក្រោមប្រធានបទ “ខួប១០ឆ្នាំ នៃការបញ្ចូលល្បែងទាញព្រ័ត្រក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ” ដើម្បីបង្ហាញពីសមិទ្ធផលដែលកម្ពុជាសម្រេចបានក្នុងការពង្រឹង លើកកម្ពស់ល្បែងទាញព្រ័ត្រ និងបង្កើតវេទិកាមិត្តភាពដែលផ្តល់លទ្ធភាពជូនសិល្បករ ប្រតិបត្រករសិល្បៈនិងវប្បធម៌ ពិភាក្សា ចែករំលែកចំណេះដឹង និងបទពិសោធន៍ទៅវិញទៅមក ផ្សព្វផ្សាយឲ្យកាន់តែទូលំទូលាយស្តីពីទម្រង់ល្បែងប្រពៃណីមួយនេះ និងយន្តការលើកកម្ពស់មរតកវប្បធម៌អរូបីកម្ពុជា ព្រមទាំងរួមចំណែកប្រែក្លាយភំ្នពេញទៅជារាជធានីនៃវប្បធម៌ទេសចរណ៍ផង។

នៅក្នុងកម្មវិធីនេះ ក្រសួងក៏បានរៀបចំឱ្យមានការតាំងពិព័រណ៌ពីសម្បត្តិបេតិកភណ្ឌវប្បធម៌អរូបី សិប្បកម្ម និងមរតកវប្បធម៌តាមដងទន្លេសាប សរុបចំនួន ២៣ ស្ដង់ ហើយនៅតាមស្ដង់នីមួយៗមាននូវសកម្មភាពផ្សេងៗរបស់សហគមន៍នីមួយៗ ការលេងល្បែងកំសាន្ត និងមានការសម្ដែងទស្សនីយភាពនានា នៃមរតកវប្បធម៌អរូបី ជូនអ្នកទស្សនាផងដែរ៕