ភ្នំពេញ៖ លោកបណ្ឌិត តាន់ស៊ី ដាតូ ហ្សូហារី ប៊ីន អាប់ឌុល (Tan Sri Dato (Dr.) Johari Bin Abdul) ប្រធានរដ្ឋសភាប្រទេសម៉ាឡេស៊ី បានដឹកនាំគណៈប្រតិភូជាន់ខ្ពស់រដ្ឋសភាម៉ាឡេស៊ី អញ្ជើញមកដល់កម្ពុជា នៅរសៀលថ្ងៃទី១៦ ខែមករា ឆ្នាំ២០២៥ នេះ ដើម្បីបំពេញទស្សនកិច្ចជាផ្លូវការរយៈពេល២ថ្ងៃ។ 

ក្នុងដំណើរទស្សនកិច្ចផ្លូវការរបស់ប្រធានរដ្ឋសភាប្រទេសម៉ាឡេស៊ី គឺចាប់ពីថ្ងៃទី១៦ ដល់ថ្ងៃទី១៧ ខែមករា ឆ្នាំ២០២៥ តបទៅតាមការអញ្ជើញរបស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃកម្ពុជា។ 

នៅពេលអញ្ជើញដល់កម្ពុជា លោកបណ្ឌិត តាន់ស៊ី ដាតូ ហ្សូហារី ប៊ីន អាប់ឌុល នឹងអញ្ជើញជួបសម្តែងការគួរសម និងជំនួបទ្វេភាគី ជាមួយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៅរសៀលថ្ងៃទី១៦ ខែមករា ឆ្នាំ២០២៥នេះ នៅវិមានរដ្ឋសភា។ 

ដោយឡែក នៅថ្ងៃទី១៧ ខែមករា ឆ្នាំ២០២៥ លោកបណ្ឌិតប្រធានរដ្ឋសភានៃប្រទេសម៉ាឡេស៊ី នឹងអញ្ជើញជួបសម្តែងការគួរសមជាមួយ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា នៅវិមានព្រឹទ្ធសភា។ បន្ទាប់មក លោក និងគណៈប្រតិភូ នឹងអញ្ជើញបន្តដំណើរទៅកាន់វិមានសន្តិភាព ដើម្បីជួបសម្ដែងការគួរសមជាមួយ លោកសន្តិបណ្ឌិត នេត សាវឿន ឧបនាយករដ្ឋមន្ត្រី នៃរាជរដ្ឋាភិបាលកម្ពុជាផងដែរ។ 

ដំណើរទស្សនកិច្ចរបស់លោកបណ្ឌិតប្រធានរដ្ឋសភាម៉ាឡេស៊ីនៅកម្ពុជានាឱកាសនេះ ក្នុងគោលបំណងពង្រឹងពង្រីកចំណងមិត្តភាព កិច្ចសហប្រតិបត្តិការនៃប្រទេស ឲ្យរឹងមាំ ស៊ីជម្រៅបន្ថែមទៀតទាំងស្ថាប័ននីតិប្បញ្ញត្តិ និងនីតិប្រតិបត្តិ៕