ត្បូងឃ្មុំ៖ នៅថ្ងៃទី១៨-២០ ខែមីនា ឆ្នាំ២០២៥ ក្រុមការងារនាយកដ្ឋានគាំពារបរិស្ថានដឹកនាំដោយលោក កែ វង្សវឌ្ឍនា អគ្គនាយករង និងជាប្រធានក្រុមទី២នៃក្រុមការងារប្រសិទ្ធភាពសុក្រឹត្យកម្មបរិស្ថានកិច្ចលើភាពស្អាត បានដឹកនាំក្រុមការងារ ដោយសហការជាមួយរដ្ឋបាលស្រុកត្រពាំងផ្លុង និងមន្ទីរបរិស្ថាន ចុះត្រួតពិនិត្យករណីបង្ហូរសំណល់រាវចូលអូរធម្មជាតិបង្កការបំពុល ដោយទីតាំងអគ្គារកាស៊ីណូ ដែលស្ថិតនៅផ្លូវលេខ ៧២ ឃុំត្រពាំងផ្លុង ស្រុកពញ្ញាក្រែក ខេត្តត្បូងឃ្មុំ បានរកឃើញទីតាំងកាស៊ីណូ ចំនួន ០៣ កន្លែងបានបង្ហូកាកសំណល់រាវ និងទឹកកង្វក់ចូលអូរធម្មជាតិ។

យោងតាមរបាយការណ៍របស់ក្រុមការងារ «ប្រសិទ្ធភាពសុក្រឹត្យកម្មបរិស្ថានកិច្ចលើភាពស្អាត» បានឱ្យដឹងថា មានការណែនាំពីថ្នាក់ដឹកនាំក្រសួងបរិស្ថាន បានចុះត្រួតពិនិត្យកាស៊ីណូទាំង៣ខាងលើ ដោយទទួលបានលទ្ធផលបឋមដូចខាងក្រោម៖

១-កាស៊ីណូ រ៉ុងស៊ឺងទី រីសត អ្នកគ្រប់គ្រងទីតាំងនេះ ពុំបានសហការជាមួយក្រុមការងារ ដើម្បីចូលពិនិត្យក្នុងទីតាំង និងសាកសួរព័ត៌មានពាក់ព័ន្ឋនឹងដំណើរការកាស៊ីណូនេះ ដោយគាត់បានបញ្ជាក់ថា គាត់ជាប់បំពេញភារកិច្ចនៅរាជធានីភ្នំពេញ។ គាត់បានស្នើសុំក្រុមការងារជួបនៅពេលក្រោយ។ ក្រុមការងារបានត្រួតពិនិត្យនៅតាមអូរធម្មជាតិដែលហូរកាត់ទីតាំងកាស៊ីណូ និងយកសំណាកទឹក ចំនួន ៤ ទីតាំង នៅខាងក្រោយក្រុមហ៊ុន ដើម្បីពិសោធន៍។

២- កាស៊ីណូ Grand Golden.,Ltd. បានដំណើរកានៅឆ្នាំ២០០៨ និងមានអ្នកស្នាក់នៅអចិន្ត្រៃក្នុងអគារជួលមាន ចំនួន ៥០០ នាក់ និងមានភ្ញៀវចូលស្នាក់នៅមាន ចំនួន ១៥០ នាក់/ថ្ងៃ ហើយប្រើប្រាស់ទឹកអស់ ចំនួន ២ ៥០០ ម៉ែត្រគូប/ថ្ងៃ។ សំណល់រាវមាន ចំនួន ២០០០ ម៉ែត្រគូប/ថ្ងៃ ដែលចេញពីបន្ទប់ទឹក និងផ្ទះបាយ រួចហូរចូលអូរធម្មជាតិ។ ដោយទ្បែក សំណល់រាវដែលចេញពីបង្គន់ ហូរលាយទ្បំជាមួយលាមកចូលទៅក្នុងអាងសេបទិក។ កាស៊ីណនេះ ពុំមានរៀបចំរបាយការណ៍វាយតម្លៃហេតុប៉ះពាល់បរិស្ថាន និងលិខិតអនុញ្ញាតពាក់ព័ន្ធនឹងក្រសួងបរិស្ថានទេ។ ក្រុមការងារបានយកសំណាក ចំនួន ០២ ទីតាំង ដែលនៅចំណុចមាត់លូហូរចូលអូរធម្មជាតិ និងត្រង់ចំណុចស្ពានដែក ដើម្បីពិសោធន៍។

៣- កាស៊ីណូ Pailin Trapaing ដំណើរកានៅឆ្នាំ២០២៣ ដែលមានអ្នកស្នាក់នៅអចិន្ត្រៃក្នុងអគារជួល ចំនួន ៦០០នាក់ និងមានភ្ញៀវចូលស្នាក់នៅមាន ចំនួន ៥០ នាក់/ថ្ងៃ និងប្រើប្រាស់ទឹកអស់ ចំនួន ៥០ ម៉ែត្រគូប/ថ្ងៃសំណល់រាវដែលចេញពីបង្គន់អនាម័យ ត្រូវបានបង្ហូរចូលអាងស្តុក ចំនួន ១ ដែលមានទំហំប្រមាណ ៥មx១៥មx២,៥ម រួចបង្ហូរចូលអូរធម្មជាតិ ដែលនៅជាប់ទីតាំងអគារ។ ដោយឡែកសំណល់រាវដែលចេញពីបន្ទប់ទឹក និងផ្ទះបាយ បានបង្ហូរចូលអូរតែម្តង និងពុំមានរៀបចំរបាយការណ៍វាយតម្លៃហេតុប៉ះពាល់បរិស្ថាន។ ក្រុមការងារបានយកសំណាកទឹក ចំនួន ២ ទីតាំង ដែលនៅមាត់លូហូរចូលអូរធម្មជាតិ និងខ្សែទឹកក្រោម ដើម្បីពិសោធន៍។

ក្រុមការងារបានបញ្ជាក់ពីចំណាត់ការរបស់ក្រសួងបរិស្ថាន ដើម្បីឲ្យក្រុមហ៊ុនអនុវត្តបន្ទាន់លើករណីនេះ ស្របតាមក្រមបរិស្ថាននិងធនធានធម្មជាតិ ដូចខាងក្រោម៖

១- ក្រុមហ៊ុនត្រូវបញ្ឈប់ការបង្ហូរសំណល់រាវចេញពីទីតាំងចូលអូរធម្មជាតិជាបណ្តោះអាសន្ន រហូតទទួលបានការអនុញ្ញាតពីក្រសួងបរិស្ថាន។ 

២- ត្រូវពិន័យអន្តរការណ៍លើករណី៖ ការបញ្ចេញសំណល់រាវពុំបានសម្អាតត្រឹមត្រូវ និងលើសកម្រិតស្តង់ដារ គឺល្មើសទៅនឹងមាត្រា ១៥៦ មាត្រា ១៦០ មាត្រា ២៨៧ មាត្រា ២៨៩ នៃក្រមបរិស្ថាននិងធនធានធម្មជាតិ ដែលត្រូវរៀបចំប្រព័ន្ធសម្អាតឱ្យបានត្រឹមត្រូវដោយប្រើក្រុមហ៊ុនផ្តល់សេវាវិស្វកម្មបរិស្ថានដែលទទួលការអនុញ្ញាតពីក្រសួងបរិស្ថាន។ ការបំពុលទឹកអូរធម្មជាតិ គឺល្មើសទៅនឹងមាត្រា ១៥៦ មាត្រា ១៦០ មាត្រា ២៨៧ មាត្រា ២៩០ នៃក្រមបរិស្ថាននិងធនធានធម្មជាតិ។ ដំណើរការអាជីវកម្ម ដោយពុំបានរៀបចំរបាយការណ៍វាយតម្លៃហេតុប៉ះពាល់បរិស្ថាន និងកិច្ចសន្យាការពារបរិស្ថាន គឺល្មើសនឹងមាត្រា ៦៦៨ នៃក្រមបរិស្ថាន និងធនធានធម្មជាតិ និងត្រូវរៀបចំរបាយការណ៍ ឱ្យរួចរាល់ក្នុងរយះពេល៦ខែ។

៣- ក្រុមហ៊ុនត្រូវស្ដារសម្អាតបរិស្ថាន ជាពិសេសប្រព័ន្ធអូរធម្មជាតិនៅទីតាំងដែលទទួលរងការបំពុលឱ្យមានភាពល្អប្រសើរឡើងវិញ។

៤- ក្រុមហ៊ុនត្រូវផ្តល់សំណងការខូចខាតលើផលប៉ះពាល់បរិស្ថាន និងសុខភាពសាធារណៈ ទៅតាមការគណនាជាក់ស្តែងរបស់មន្ត្រីជំនាញ ដោយអនុលោមតាមក្រមបរិស្ថាននិងធនធានធម្មជាតិ និងទី៥- ក្នុងករណីក្រុមហ៊ុនមិនអនុវត្តតាមការសម្រេចខាងលើ ក្រសួងបរិស្ថាននឹងចាត់វិធានការច្បាប់ជាធរមាន៕