ភ្នំពេញ៖ បុគ្គលមានឈ្មោះ ប៊ុន រស្មី ហៅ Bun Park ដែលគ្រូបង្រៀនទ្រឹស្តីជោគជ័យ បានចូលខ្លួនមកបំភ្លឺនៅស្នងការដ្ឋាននគរបាលរាជធានីភ្នំពេញ ក្រោយសរសេតបង្ហោះបំភ្លៃព័ត៌មានមិនពិតលើបណ្តាញទំនាក់ទំនងសង្គម ពាក់ព័ន្ធនឹងពាក្យ ថា «សន្តិភាព»។

សូមជម្រាបថា កាលពីថ្ងៃទី១៥ ខែមីនា ឆ្នាំ២០២៥ កន្លងទៅ លោក ប៊ុន រស្មី ហៅ Bun Park បានសរសេរសារបង្ហោះលើបបណ្តាញសង្គមមួយឃ្លាថា៖ “កំចាត់ក្មេងទំនើង និងចោរប្លន់ឱ្យបាន ទើបយើងអាចនិយាយបានថា យើងមានសន្តិភាព”។ 

ក្រោយការបង្ហោះខ្លឹមសារនេះ ធ្វើឱ្យប្រតិកម្មយ៉ាងខ្លាំង លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាឲ្យជំនាញខាងផែនសន្តិសុខអញ្ជើញ ប្អូនម្ចាស់ផេកខាងលើចូលមកស្នងការដ្ឋាននគរបាលរាជធានី ដើម្បីជួយពន្យល់អំពីពាក្យ ថា «សន្តិភាព»។ 

លោក ប៊ុន ផាក បានបង្ហោះសារកាលពីថ្ងៃទី១៩ ខែមីនា កន្លងទៅថា៖ លោកនឹងចូលខ្លួនស្រាយបំភ្លឺនៅស្នងការនគរបាលរាជធានីភ្នំពេញ តាមការអញ្ជើញរបស់ ឯកឧត្តម ជួន ណារិន្ទ ស្នងការនគរបាលរាជធានី នៅព្រឹកថ្ងៃទី២១ ខែមីនាខាងមុខនេះ។ លោកមានការជឿទៅលើការអនុវត្តនីតិវិធីរបស់មន្ត្រីនគរបាលយុត្តិធម៌ ហើយលោកនឹងធ្វើការបកស្រាយពីសំណេរដែលបានសរសេរបង្ហោះនៅលើបណ្តាញសង្គម កាលពីថ្ងៃ១៥ ខែមីនា កន្លងទៅ ផងដែរ។

ចំពោះសំណេរនេះ លោក ប៊ុន ផាក បានបញ្ជាក់ថា ដំបូង គឺលោកចង់បង្ហាញពីការព្រួយបារម្ភចំពោះករណីដែលបានកើតឡើងទៅលើមិត្តភក្តិរបស់ជនបរទេសឈ្មោះ Christ ដែលត្រូវបានចោរឆក់កាបូប នៅព្រឹកថ្ងៃទី១៥ ខែមីនា។ ភ្លាមៗនោះ លោកក៏បានបញ្ចេញមតិទៅលើបណ្តាញសង្គមថា៖ “កំចាត់ក្មេងទំនើង និងចោរប្លន់ឱ្យបាន ទើបយើងអាចនិយាយបានថា យើងមានសន្តិភាព”។

ជាការយល់ឃើញផ្ទាល់ខ្លួន លោក ប៊ុន ផាក ថា៖ «ពាក្យសន្តិភាព គឺសំដៅទៅលើភាពសុខសាន្តរបស់ប្រទេសជាតិ ប្រទេសគ្មានសង្គ្រាម ប្រជាជនរស់នៅដោយស្ងប់សុខ គ្មានភាពវឹកវរ គ្មានការព្រួយបារម្ភ មានសុវត្តិភាពទាំងផ្លូវកាយ និងផ្លូវចិត្ត។ ជាក់ស្តែងយើងឃើញថា ប្រទេសយើងមានសន្តិភាពពេញលេញហើយ តែបញ្ហាក្មេងទំនើង និងចោរលួច ចោរប្លន់នៅតែកើតមានជាហូរហែរជារឿងធម្មតា ប្រទេសណាក៏មានដូចគ្នាដែរ ហើយយើងក៏ឃើញពីសកម្មភាពដ៏សស្រាក់សស្រាំរបស់សមត្ថកិច្ចក្នុងការបោសសំអាតមេរោគសង្គមទាំងនោះដែរ»។ 

ម្ចាស់គណនីហ្វេសប៊ុកផេក «Bun Park» បានបញ្ជាក់ថា៖ «លោកមិនមានចេតនាទុច្ចរិតក្នុងការបំភ្លៃព័ត៌មានមិនពិត ឬធ្វើការវាយប្រហារទៅកាន់ស្ថាប័ន្ធសាធារណៈណាមួយឡើយ វាគ្រាន់តែជាការចូលរួមចំណែកឈឺឆ្អើលរឿងអសន្តិសុខក្នុងសង្គម ក្នុងគោលបំណងរក្សារឱ្យបាននូវសន្តិសុខ និងសន្តិភាពជូនប្រជាពលរដ្ឋក្នុងនាមជាអ្នកចែករំលែកចំណេះដឹងមួយរូបប៉ុណ្ណោះ»៕