តាកែវ៖ នាព្រឹកថ្ងៃសុក្រ ទី២១ ខែមីនា ឆ្នាំ២០២៥ ក្រសួងទេសចរណ៍ គណៈកម្មការអន្តរក្រសួង និងរដ្ឋបាលខេត្តតាកែវ បានរៀបចំកម្មវិធីដាំដើមឈើអនុស្សាវរីយ៍ អបអរសាទរព្រឹត្តិការណ៍បុណ្យទន្លេ លើកទី៩ ក្រោមប្រធានបទ «គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ» នៅសួនមាត់បឹងតាកែវ ក្រុងដូនកែវ។ 

ពិធីនេះប្រព្រឹត្តទៅក្រោមអធិបតីភាព ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង និងលោកជំទាវ ព្រមទាំងមានការចូលរួមពី ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ថ្នាក់ដឹកនាំក្រសួងទេសចរណ៍ មន្ទីរ-អង្គភាព មន្ត្រីរាជការ អាជ្ញាធរមូលដ្ឋាន ក្រុមយុវជន ស.ស.យ.ក យុវជនកាយរឹទ្ធិ សិស្ស និស្សិត និងប្រជាពលរដ្ឋ ក្នុងមូលដ្ឋានសរុបប្រមាណជាង ៥០០ នាក់។ 

ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានមានប្រសាសន៍ថា៖ ការចូលរួមដាំដើមឈើ ពិតជាមានសារៈសំខាន់ណាស់ ក្នុងការរួមចំណែកអភិវឌ្ឍទេសចរណ៍បៃតងនៅកម្ពុជា ជាពិសេសការការពារបរិស្ថាន និងអភិរក្សធនធានធម្មជាតិ ដែលជាសកម្មភាពជំរុញនិងគាំទ្រគោលនយោបាយអភិវឌ្ឍបៃតងរបស់រាជរដ្ឋាភិបាល ស្របជាមួយចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ ផ្តល់ភាពកក់ក្តៅ» និងយន្តការអភិវឌ្ឍទេសចរណ៍ជាអន្តរជាតិ ប្រកបដោយនិរន្តរភាព ភាពធន់ និងបរិយាបន្ន សំដៅធ្វើឱ្យកម្ពុជា ក្លាយជាគោលដៅទេសចរណ៍ដ៏ទាក់ទាញប្រកបដោយភាពស្អាត និងបៃតង។ 

ក្នុងន័យនេះ កម្មវិធីដាំដើមឈើរួមគ្នា មិនត្រឹមជាការអបអរសាទរព្រឹត្តិការណ៍បុណ្យទន្លេប៉ុណ្ណោះទេ តែជាការបង្កប់នូវគោលបំណងដ៏ជាក់លាក់គឺ៖ ១) ជំរុញប្រែក្លាយសកម្មភាពនេះ ជាយន្តការផ្សព្វផ្សាយទេសចរណ៍បៃតងនៅកម្ពុជា ដើម្បីទាក់ទាញទេសចរឱ្យមកទស្សនាច្រើនដង។

 ២) លើកកម្ពស់យុទ្ធនាការ “ទេសចរម្នាក់ ដើមឈើមួយដើម” សំដៅប្រែក្លាយសកម្មភាពដាំដើមឈើ ទៅជាផលិតផលទេសចរណ៍ថ្មីមួយប្រកបដោយភាពទាក់ទាញសម្រាប់ភ្ញៀវទេសចរជាតិ-អន្តរជាតិ។

 ៣) បំផុសការយល់ដឹងជាសាធារណៈអំពីទស្សនាទាន “ស្អាត ឆ្លាត និងបៃតង”។ ៤) រួមចំណែកក្នុងការទប់ទល់បញ្ហាបម្រែបម្រួលអាកាសធាតុ និងកាត់បន្ថយការកើនឡើងកំដៅនៃភពផែនដី និង ៥) រួមចំណែកលើកកម្ពស់ការផ្សព្វផ្សាយទេសចរណ៍ ស្របតាមពាក្យស្លោក “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” “ទេសចរណ៍រីកលូតលាស់ក្នុងសន្តិភាព” និង “បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់”៕