នៅព្រឹកថ្ងៃទី២២ ខែមីនា ឆ្នាំ២០២៥នេះ ដែលជាថ្ងៃទីពីរនៃព្រឹត្តិការណ៍សមរាត្រី ភ្ញៀវទេសចរជាតិ និងអន្តរជាតិ កាន់តែច្រើនបានបន្តមកទស្សនាទិដ្ឋភាព​ដ៏អស្ចារ្យនេះ។ ក្នុងនោះភ្ញៀវទេសចរសរុប មានចំនួន៣៧,០០៣នាក់ ដោយក្នុងនោះភ្ញៀវទេសចរជាតិចំនួន: ៣៣,៥០០ នាក់ និងភ្ញៀវទេសចរបរទេស ចំនួន៣,៥០៣ នាក់ មានការកើនឡើងទ្វេដងបើធៀបទៅនឹងថ្ងៃទី១ ។

 គួររម្លឹកដែរថា មន្ត្រីជំនាញផ្នែកទេសចរណ៍ នៃអាជ្ញាធរជាតិអប្សរា កាលពីថ្ងៃទី២១ ខែមីនា ឆ្នាំ២០២៥ នេះ បានអះអាងថា អ្នកទេសចរចម្រុះជាតិសាសន៍ ប្រមាណជាង២ម៉ឺននាក់ បានប្រមូលផ្ដុះគ្នាទស្សនាទិដ្ឋភាពព្រះអាទិត្យរះចំកំពូលកណ្តាល នៃប្រាសាទ អង្គរវត្ដ ឬហៅថា «សមរាត្រីប្រាសាទអង្គរវត្ត»។

 អាជ្ញាធរជាតិអប្សរា បានបញ្ជាក់ថា ភ្ញៀវទេសចរជាតិ និងអន្តរជាតិយ៉ាងច្រើនកុះករ បានស្កាត់មកពីទីជិតឆ្ងាយ រួតរះក្រោកតាំងពីព្រលឹមស្រាងៗ ដើម្បីរង់ចាំទស្សនាទិដ្ឋភាពដ៏អស្ចារ្យ គឺថ្ងៃរះចំកំពូលកណ្តាលប្រាសាទអង្គរ និងឆ្លៀតចូលទស្សនាសម្រស់ប្រាសាទអង្គរវត្ត នាពេលព្រឹកផង។

 ប្រភពបានឱ្យដឹងថា ចាប់តាំងពីម៉ោង៥ព្រឹកមកម្ល៉េះ ភ្ញៀវទេសចរជាតិ និងអន្តរជាតិ ចំនួនប្រមាណជាង ២ម៉ឺននាក់ បានមករង់ចាំទស្សនាទិដ្ឋភាពដ៏ស្រស់ស្អាតនេះ នៅខាងមុខប្រាសាទអង្គរវត្ត។ ក្រោយពីបានទស្សនាថ្ងៃរះចំកំពូលប្រាសាទអង្គររួចហើយនោះ ភ្ញៀវទេសចរ បានកោតសរសើរពី ភាពស្រស់ស្អាត ដែលបានរំលេចចេញពីស្នាដៃដ៏វិចត្ររបស់បុព្វបុរសខ្មែរបន្សល់ទុកមកដល់ពេលនេះ។

 តាមក្រសួងទេសចរណ៍ បានបញ្ជាក់ថា សមរាត្រីប្រាសាទអង្គរវត្ត (Equinox Angkor) ជាបាតុភូតព្រះអាទិត្យរះចំកំពូលកណ្តាលនៃប្រាសាទអង្គរ កើតមានក្នុងរដូវប្រាំង គឺចាប់ពីថ្ងៃទី ២១-២៣ ខែមីនា ឆ្នាំ២០២៥។ 

 អង្គរវត្ត គឺជាអច្ឆរិយវត្ថុដ៏ពិសិដ្ឋ មានរចនាប័ទ្មល្អឥតខ្ចោះ បង្កប់នូវឃ្លាំងពុទ្ធិ អាថ៌កំបាំងនៃគតិបណ្ឌិតដែលមិនចេះរីកស្ងួត ក្បួនច្បាប់វិទ្យាសាស្ត្រ តារាសាស្ត្រ ទស្សនវិជ្ជាខ្មែរ និងការត្រាស់ដឹង ចាក់ធ្លុះជ្រួតជ្រាបច្បាស់អំពីជម្រៅនៃច្បាប់ធម្មជាតិ និងទំនាក់ទំនងនៃដំណើរគោរចនៃប្រព័ន្ធផែនដី និងចក្រវាឡ ដែលមានខ្លឹមសារ និងទស្សនៈអប់រំយ៉ាងជ្រាលជ្រៅមហិមា៕