ភ្នំពេញ៖ ធ្លាប់តែជួបប្រទះករណីគ្រោះថ្នាក់ចរាចរណ៍រវាងរថយន្ត ប៉ះទង្គិចជាមួយរថយន្តដូចគ្នា ឬម៉ូតូប៉ះរថយន្តជាដើម ប៉ុន្តែករណីមួយនេះគឺថ្មីស្រឡាងតែម្ដង។ 

ដោយយុវជនម្នាក់បានជិះកង់ហាត់ប្រាណចុះចំណោតខ្ពស់លឿនពេក ក៏ជ្រុលទៅបុកនឹងកង់របស់យុវជនម្នាក់ទៀតដែលកំពុងជិះកង់ហាត់ប្រាណដូចគ្នា រហូតបណ្ដាលឲ្យយុវជនម្នាក់ស្លាប់ និងម្នាក់ទៀតរងរបួសយ៉ាងធ្ងន់ធ្ងររហូតត្រូវបញ្ជូនទៅកាន់មន្ទីពេទ្យភ្លាមៗ។

ហេតុការណ៍ដ៏គួរឲ្យភ្ញាក់ផ្អើលនេះ បានកើតឡើងនាវេលាម៉ោង ៦៖៤០ នាទី នាល្ងាចថ្ងៃទី ២២ ខែមីនា ឆ្នាំ២០២៥ កាលពីម្សិលមិញនេះ នៅចំណុច អេកូផាក២ បរិវេនប៉េងហួតបឹងស្នោ ដែលស្ថិតនៅសង្កាត់ និរោធ ខណ្ឌ ច្បារអំពៅ រាជធានីភ្នំពេញ។

យោងតាមការបញ្ជាក់ពី យុវជនដែលជាមិត្តភ័ក្តិរបស់ជនរងគ្រោះបានបង្ហើបឲ្យដឹងថា ជនរងគ្រោះឈ្មោះ លី ស៊ីវប៉ាវ ភេទ ប្រុស អាយុ ១៦ឆ្នាំ មុខរបរ ជាសិស្ស រស់នៅសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
 
មុនពេលកើតហេតុ ខ្លួនរួមនឹងជនរងគ្រោះនិងមិត្តភក្តិចំនួន ២នាក់ទៀត បានជិះកង់ម្នាក់មួយគ្រឿងដើម្បីហាត់ប្រាណ ដោយបានធាក់កង់តាំងពីជម្ពូវ័ន រហូតមកដល់បុរីប៉េងហួតបឹងស្នោ។ 

ស្របគ្នានោះដែរ យុវជនរងគ្រោះខាងលើកំពុងតែជិះកង់ចុះចំណោតខ្ពស់លឿនពេក ក៏មានយុវជនម្នាក់ទៀតដែលមានវ័យស្របាលគ្នាជិះកង់មិនដឹងចេញមកពីខាងណាឲ្យប្រាកដនោះទេ ក៏ជិះមកចំពីមុខកង់របស់ជនរងគ្រោះ ទើបធ្វើឲ្យចាប់ហ្វ្រាំងមិនទាន់ ក៏ជ្រុលទៅបុកកង់ដូចគ្នាយ៉ាងពេញទំហឹង ដែលជាហេតុបណ្ដាលឲ្យជនរងគ្រោះខាងលើ ស្លាប់បាត់បង់ជីវិតនាអំឡុងពេលដែលដឹកយកទៅសង្គ្រោះបន្ទាន់នៅមន្ទីរពេទ្យបង្អែកច្បារអំពៅរីឯជនរងគ្រោះម្នាក់ទៀតរងរបួសធ្ងន់ត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យឯកជន។

ចំណែកឯក្រុមគ្រួសាររបស់ជនរងគ្រោះវិញ បន្ទាប់ពីទទួលបានដំណឹងនេះភ្លាម ស្ទើរតែធ្វើចិត្តទទួលយកមិនបាននិងមានការតក់ស្លុតយ៉ាងខ្លាំង។ 

ក្នុងនោះឪពុករបស់ជនរងគ្រោះក៏បានធ្វើការស្នើសមត្ថកិច្ចឲ្យជួយពិនិត្យនិងវាស់វែង ពាក់ព័ន្ធនឹងករណីខាងលើបន្ថែមទៀតដើម្បីបញ្ជាក់ឲ្យបានច្បាស់ថាជុំវិញហេតុការណ៍ដែលបានកើតឡើងខាងលើពិតជាបានបណ្ដាលឲ្យកូនប្រុសរបស់ខ្លួនស្លាប់ពិតមែនឬយ៉ាងណា ដោយគ្រាន់តែកង់បុកនិងកង់ដូចគ្នាតែប៉ុណ្ណោះ។

យ៉ាងណាមិញ ក្រោយកើតហេតុ សូម្បីតែសមត្ថកិច្ចក៏ស្ទើរតែមិនគួរឲ្យជឿដូចគ្នាជុំវិញករណីដែលបានកើតឡើងខាងលើនេះ ដោយសារតែវាមិនដែលកើតមានទាល់តែសោះ។

 សមត្ថកិច្ចក៏បានធ្វើកំណត់ហេតុ រួចបានប្រគល់សពទៅឲ្យគ្រួសារជនរងគ្រោះខាងលើយកទៅធ្វើបុណ្យតាមប្រពៃណី។ ទោះជាយ៉ាងណាក៏ដោយ សមត្ថកិច្ចនៅតែបន្តចុះត្រួតពិនិត្យកន្លែងកើតហេតុ ដើម្បីស្វែងរកសាក្សីក៏ដូចជារូបភាពពីកាំមេរ៉ាសុវត្ថិភាពបន្ថែមក្នុងការទទួលបានព័ត៌មានកាន់តែលម្អិតជាងនេះ។