បាត់ដំបង៖   អង្គភាពកំចាត់មីនទី២ (CMAC) ដែលឈរជើងក្នុងឃុំឆ្នាល់មាន់ ស្រុកគាស់ក្រឡ ខេត្តបាត់បំបង បានដាក់គ្រឿងចក្រ អេស្កាវ៉ាទ័រ និងប៊ុលស័រ បានធ្វើសកម្មភាពលើផ្លូវថ្មីលើដីរបស់ ក្រុមហ៊ុន អេហ្គី្រខលឈ័រ ហ្គ្រីនហ្វៀន មានប្រវែងជាង ១ ៦០០ ម៉ែត្រ ដែលកំពុងមានទំនាស់ ហើយកន្លងមករដ្ឋបាលខេត្តបាត់ដំបង និងក្រសួងមហាផ្ទៃ បានចាត់ឱ្យរដ្ឋបាលស្រុកគាស់ក្រឡ មានវិធានការទប់ស្កាត់រាល់ការកាប់ទន្ទ្រាន និងសាងសង់ថ្មីបន្តទៀត ព្រមទាំងទប់ស្កាត់រាល់ការចុះហត្ថលេខានានារបស់អាជ្ញាធរមូលដ្ឋាននៅលើដីទំនាស់នេះ។

ករណី អង្គភាព CMAC ធ្វើសកម្មភាពផ្លូវថ្មី លើដីរបស់ ក្រុមហ៊ុន អេហ្គ្រីខលឈ័រ ហ្គ្រីនហ្វៀល  ដោយបំពាលនឹង (សជណ) របស់ រដ្ឋបាលខេត្តបាត់ដំបង និងក្រសួងមហាផ្ទៃ ជាពិសេសបំពានដីការសម្រេចចាត់ចែងក្សាការពារលើដីទំនាស់ លោក រ៉ា ចាន់ តំណាងក្រុមហ៊ុនបានដាក់សុំកិច្ចអន្តរាគមន៍ដាក់ជូន លោក ញឹក សារ៉េន អភិបាលស្រុកគាស់ក្រឡ ក្នុងករណី CMAC បានដាក់គ្រឿងចក្រឈូសឆាយ លើកផ្លូវថ្មី នៅចំណុច អាឡោក ស្ថិតនៅភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង លើដីកំពុងមានទំនាស់ជាមួយក្រុមហ៊ុន ប៉ុន្តែវិធានការទប់ស្កាត់ ឬដំណោះស្រាយគ្មានឡើយ។

តំណាងក្រុមហ៊ុន និងជាអ្នកមើលការខុសត្រូវដីរបស់ក្រុមហ៊ុន អេហ្គ្រីខលឈ័រ ហ្គ្រីនហ្វៀល លោក រ៉ា ចាន់ បានបញ្ជាក់ក្នុងលិខិតសុំអន្តរាគមន៍ថា៖ «លោកជាអ្នកតំណាងមើលការខុសត្រូវ និងគ្រប់គ្រងដីទំហំ ៤ ០៦៧ ហិកតា ឲ្យក្រុមហ៊ុន អេហ្គ្រីខលឈ័រ ហ្គ្រីនហ្វៀល កំពុងមានទំនាស់ នៅភូមិព្រៃទទឹង ឃុំឆ្នាល់មាន់ និងភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង បានគោរពជូនលោក ញឹក សារ៉ែន អភិបាល នៃគណៈអភិបាលស្រុកគាស់ក្រឡ ដើម្បីប្តឹងសុំកិច្ចអន្តរាគមន៍ ករណី អង្គភាព CMAC បានដាក់គ្រឿងចក្រឈូសឆាយ លើកផ្លូវថ្មី នៅចំណុចអាឡោក ស្ថិតនៅភូមិគោក រកា ឃុំដូនបា ស្រុកគាស់ក្រឡ ខេត្តបាត់ដំបង លើដីកំពុងមានទំនាស់ជាមួយក្រុមហ៊ុន អេហ្គ្រីខលឈរ ហ្គ្រីនហៀល»។ 

តាមបណ្តឹងរបស់ លោក រ៉ា ចាន់ តំណាងក្រុមហ៊ុន ដោយផ្នែកតាម មាត្រា ៥២៨, មាត្រា ៥២៩ នៃក្រមព្រហ្មទណ្ឌ ឆ្នាំ២០០៩, លិខិតលេខ ៥៣៩ សជណ ចុះថ្ងៃទី១៩ ខែកុម្ភៈ ឆ្នាំ២០២៤ របស់អភិបាលរងខេត្តបាត់ដំបង, លិខិតលេខ ១២៦ សជណ ចុះថ្ងៃទី១១ ខែមករា ឆ្នាំ២០២៤ របស់ក្រសួងមហាផ្ទៃ, លិខិតលេខ ២៧៦៥/២៣ សជណ ចុះថ្ងៃទី២៧ ខែតុលា ឆ្នាំ២០២៣ របស់ ឯកឧត្តមអភិបាលខេត្តបាត់ដំបង និងមានរូបថត និងវីដេអូ នៃសកម្មភាពដាក់គ្រឿងចក្រលើដី ក្រុមហ៊ុន អេហ្គ្រីខលឈ័រ ហ្គ្រីនហ្វៀល។

តំណាងក្រុមហ៊ុន បានឱ្យដឹងថា៖ កាលពីថ្ងៃទី១០ ខែមីនា ឆ្នាំ ២០២៥ លោកបានដាក់ពាក្យបណ្ដឹងសុំអន្តរាគមន៍ទេ រំាងសុំអន្តរាគមន៍ទៅកាន់សាលាស្រុក សុំកិច្ចអន្តរាគម ករណី CMAC បានដាក់គ្រឿងចក្រ ឈូសឆាយ លើកផ្លូវថ្មី នៅចំណុច អាឡោក ស្ថិតនៅភូមិគោករកា ឃុំជូនបា ស្រុកគាស់ក្រឡ លើដីកំពុងមានទំនាស់ជាមួយក្រុមហ៊ុន ហើយមកទល់នឹងថ្ងៃនេះមិនឃើញមានកម្លាំងរបស់សាលាស្រុកចុះមក ហាមឃាត់ឡើយ។ តំណាងក្រុមហ៊ុន បានជម្រាបជូនលោកអភិបាលគាស់ក្រឡទៀតថា៖ ចាប់ពីថ្ងៃទី០៧ មកដល់ថ្ងៃទី២១ ខែមីនា ឆ្នាំ២០២៥ នេះ CMAC បានបន្តដាក់គ្រឿងចក្រកាយលើកផ្លូវថ្មីចូលដីក្រុមហ៊ុន ដែលមានប្រវែង ១ ៦០០ ម៉ែត្រ គឺលើកផ្លូវនៅក្នុងបរិវេណតែដីក្រុមហ៊ុនតែម្តង ដោយឆ្ពោះសំដៅចូលដី លោក ម៉ម សង មេភូមិគោករការ ហើយលោកមេភូមិរូបនេះ បានរំលោភបំពានយកដីក្រុមហ៊ុន ហើយមិនទាន់បានដោះស្រាយជាមួយក្រុមហ៊ុននៅឡើយ (កំពុងមានទំនាស់)។ 

លោក រ៉ា ចាន់ បានចាត់ទុកថា សកម្មភាពរបស់ CMAC នេះ បានបំពាននឹង សជណ របស់ ឯកឧត្តម សុខ លូ អភិបាលខេត្តបាត់ដំបង, សជណ របស់ លោក យឹម សៀប អភិបាលរងខេត្តបាត់ដំបង និង សជណ របស់ ក្រសួងមហាផ្ទៃ ដែលបាននឹងកំពុងដឹកនាំអនុវត្តដោយរដ្ឋបាលស្រុកគាស់ក្រឡផ្ទាល់។ 

យោងតាមសេក្តីជូនដំណឹង (សជណ) លេខ ២៧៦៥/២៣ សជណ ចុះថ្ងៃទី២៧ ខែតុលា ឆ្នាំ២០២៣, សេក្តីជូន ដំណឹង (សជណ) លេខ ៥៣៩ សជណ ចុះថ្ងៃទី១៩ ខែកុម្ភៈ ឆ្នាំ២០២៤ របស់ ឯកឧត្តម សុខ លូ អភិបាលខេត្តបាត់ ដំបង, សជណ របស់ លោក ឃឹម សៀប អភិបាលរងខេត្តបាត់ដំបង និងសេក្តីជូនដំណឹងលិខិត (សជណ) លេខ ១២៦ សជណ ចុះថ្ងៃទី១១ ខែមករា ឆ្នាំ២០២៤ របស់ ក្រសួងមហាផ្ទៃ បានណែនាំឲ្យសាលាខេត្តបាត់ដំបង និងសាលាស្រុកគាស់ក្រឡ មានវិធានការទប់ស្កាត់គ្រប់សកម្មភាពទាំងអស់លើដីកំពុងមានទំនាស់ជាមួយក្រុមហ៊ុន។

សូមជម្រាបថា កាលពីថ្ងៃទី២០ ខែមីនា ឆ្នាំ២០២៥ កន្លងទៅ លោក ផេង សិទ្ធី អភិបាលរងខេត្តបាត់ដំបង តំណាង ឯកឧត្តម សុខ លូ អភិបាលខេត្តបាត់ដំបង បានដឹកនាំកិច្ចប្រជុំមួយជាមួយមន្ទីរ អង្គភាពពាក់ព័ន្ធ អាជ្ញាធរស្រុក និងឃុំដែលមានការពាក់ព័ន្ធអំពីបញ្ហទំនាស់ដីធ្លីដ៏ស្មុកស្មាញ នៅក្នុងស្រុកគាស់ក្រឡ និងបានសរសេរសារបង្ហោះលើបណ្តាញសង្គមផ្លូវការរបស់លោកថា៖ «ខ្ញុំបានដឹកនាំកិច្ចប្រជុំដោះស្រាយ វិវាទដីធ្លីនៅស្រុកគាស់ក្រឡ ជាមួយភាគីពាក់ព័ន្ធ និងមន្ត្រីជំនាញ ដើម្បីបញ្ចប់វិវាទឲ្យបានឆាប់រហ័ស»។ ប៉ុន្តែទោះបីជាយ៉ាងណា គិតរហូតដល់ពេលនេះ មិនទាន់ឃើញមានអាជ្ញាធរចុះមកធ្វើការសម្របសម្រួល ឬស្វែងរកដំណោះស្រាយនៅឡើយទេ។

សូមបញ្ជាក់ថា ក្រុមហ៊ុន អេហ្គ្រីខលឈ័រ ហ្គ្រីនហ្វៀល បានប្រមូលទិញដីកសិកម្ម ទំហំ ៤ ០៦៧ ហិកតា ពីតំណាងគ្រួសារកងទ័ព និងប្រជាពលរដ្ឋ ដើម្បីបង្កើតគម្រោងអភិវឌ្ឍន៍លើដំណាំកសិឧស្សាហកម្ម ដោយមានលិខិតទទួលស្គាល់ពីអាជ្ញាធរភូមិ ឃុំ ស្រុក ព្រមទាំងមន្ត្រីជំនាញការិយាល័យភូមិបាលស្រុកផងដែរ។ ប៉ុន្តែក្រោយការទិញ និងទូទាត់ប្រាក់គ្រប់ចំនួន ក្រុមហ៊ុនជួបបញ្ហាគម្រោងបានរាំងស្ទះមួយរយៈ ជាពិសេសកកំឡុងពេលជំងឺកូវីដ-១៩ រាតត្បាត ស្រាប់មានការគប់គិតគ្នាជាប្រព័ន្ធរំលោភចូលកាន់កាប់លើដីក្រុមហ៊ុន និងបានការស៊ីលើឯកសារលក់-ទិញជាបន្តបន្ទាប់លើក្រុមហ៊ុនបង្កឱ្យមានទំនាស់ស្មុកស្មាញ និងរ៉ាំរ៉ៃរហូតដល់បច្ចុប្បន្ននេះ។

ពាក់ព័ន្ធករណីនេះ តំណាងក្រុមហ៊ុន អេហ្គ្រីខលឈ័រ ហ្គ្រីនហ្វៀល បានដាក់ពាក្យបណ្តឹងសុំកិច្ចអន្តរាគមន៍ជាបន្តបន្ទាប់ទៅកាន់អាជ្ញាធរស្រុកគាស់ក្រឡ រដ្ឋបាលខេត្តបាត់ដំបង និងក្រសួងរៀបចំដែនដី នគរូបនីយកម្ម សំណង់ និងសុរិយោដី ប៉ុន្តែដំណោះស្រាយហាក់គ្មានប្រសិទ្ធភាពទាល់តែសោះ មិនដឹងជាមកពីមូលហេតុអ្វីឡើយ។ 

តាមតំណាងក្រុមហ៊ុន អេហ្គ្រីខលឈ័រ ហ្គ្រីនហ្វៀល បានបង្ហើបថា៖ អង្គភាព CMAC ដែលឈរជើងនៅស្រុកគាស់ក្រឡ និងកំពុងមានទំនាស់ជាមួយក្រុមនោះ បានធ្វើលិខិតលក់-ទិញលើដីធ្លីរបស់ ក្រុមហ៊ុនយ៉ាងអនាធិបតេយ្យ ដោយគ្មានការដឹងឭពីសំណាក់អាជ្ញាធរឡើយ។ ករណីនេះ អង្គភាពសារព័ត៌មាន អឹម អេស ជេ នឹងបន្តស្រាវជ្រាវស្វែងរកឯកសារពាក់ព័ន្ធដែលអង្គភាព ស៊ីម៉ាក់ ធ្វើលិខិតលក់-ទិញ ដើម្បីចុះផ្សាយបន្តទៀត៕