ភ្នំពេញ៖ នៅរសៀលថ្ងៃទី២៧ ខែមីនា ឆ្នាំ២០២៥ នេះ ស្ថានីយទូរទស្សន៍ អិម អេស ជេ បើកកិច្ចប្រជុំរបស់ក្លឹបប្រដាល់ អឹមអេសជេទាំង៣ ខេត្ត-ក្រុង នៅទីស្នាក់ការកណ្តាល រាជធានីភ្នំពេញ ក្រោមប្រធានបទ “ដើម្បីពង្រឹងសមត្ថភាព និងគុណភាពសិស្ស ព្រមទាំងគ្រូបង្វឹក ដើម្បីឈានទៅរកការប្រកួតមួយពោពេញដោយឧត្តមភាព នៃប្រដាល់គុនខ្មែរ” ក្រោមវត្តមានដ៏ខ្ពង់ខ្ពស់ពីលោកបណ្ឌិត ម៉េង សុភ័ណ្ឌ អគ្គនាយកស្ថានីយទូរទស្សន៍ អិម អេស ជេ និងជាទីប្រឹក្សាជាន់ខ្ពស់សហព័ន្ធកីឡាប្រដាល់គុនខ្មែរ។ នៅក្នុងកិច្ចប្រជុំនេះក៏មានការអញ្ជើញចូលរួមពីក្រុមការងាររបស់ស្ថានីយទូរទស្សន៍ អិម អេស ជេ លោកគ្រូបង្វឹក និងកីឡាកររបស់ក្លឹបប្រដាល់ទាំង៣ សរុបចំនួនជិត៥០នាក់ ចូលរួម។

នៅក្នុងកិច្ចប្រជុំនេះដែរ លោកបណ្ឌិត ម៉េង សុភ័ណ្ឌ អគ្គនាយកស្ថានីយទូរទស្សន៍ អិម អេស ជេ និងជាទីប្រឹក្សាជាន់ខ្ពស់សហព័ន្ធកីឡាប្រដាល់គុនខ្មែរ និងជាប្រធានក្លឹបប្រដាល់គុនខ្មែរទាំង៣ខាងលើនេះ បានសំណេះសំណាលសាកសួរសុខទុក្ខប្អូនៗកីឡាករ និងលោកគ្រូទាំងអស់ ថែមទាំងបានជុំរុញ និងលើកទឹកចិត្តដល់ប្អូនកីឡាករបន្តខិតខំប្រឹងប្រែងហ្វឹកហាត់ពង្រឹងសមត្ថភាពបន្ថែម ដើម្បីក្លាយទៅជាកីឡាករដែលមានកេរ្តិ៍ឈ្មោះ ក្លាយជាកីឡាករជួរមុខ នាថ្ងៃខាងមុខ។ លោកបណ្ឌិត ម៉េង សុភ័ណ្ឌ បានបន្ថែមថា ដើម្បីពង្រឹងសមត្ថភាពកីឡាករឲ្យកាន់តែប្រសើរឡើងបន្ថែមទៀត លោកគ្រូទាំងអស់ត្រូវពង្រឹងវិន័យក្នុងក្លឹបបន្ថែមទៀត ដើម្បីឲ្យក្លឹបប្រដាល់ទាំង៣ ក្លាយជាក្លឹបប្រដាល់ដែលមានគុណភាព។

លោកបណ្ឌិត ម៉េង សុភ័ណ្ឌ បានគូសបញ្ជាក់ថា៖ ដើម្បីពង្រឹងគុណភាពក្លឹបប្រដាល់ទាំង៣ រួមមាន៖ ១.ក្លឹប អឹមអេសជេ អន្តរជាតិគុនខ្មែរ, ២.ក្លឹប អឹមអេសជេ វត្តភ្នំតូចគុនខ្មែរ, ៣.ក្លឹប អឹមអេសជេ មោងឫស្សីគុនខ្មែរ ឲ្យកាន់តែមានគុណភាព សូមលោកគ្រូបង្វឹកទាំងអស់ ផ្ដោតទៅលើការបង្ហាត់បច្ចេកទេសស្នៀតគុន និងពង្រឹកកាយសម្បទាកីឡាករឲ្យបានរឹងម៉ាំ និងដាក់ពង្រឹងវិន័យបទបញ្ជាផ្ទៃក្នុងក្លឹបបន្ថែមទៀត។ លោកបណ្ឌិត ម៉េង សុភ័ណ្ឌ បានបន្តទៀតថា សូមប្អូនៗកីឡាករទាំងអស់បន្តយកចិត្តទុកដាក់អនុវត្តន៍តាមបទបញ្ជាផ្ទៃក្នុង ដែលគ្រូបានដាក់ចេញ ត្រូវមានវិន័យ សីលធម៌ សុជីវធម៌ល្អ ក្នុងការរស់នៅ និងត្រូវខិតខំប្រែងទាំងការហ្វឹកហាត់ ចេះស្រលាញ់រាប់អានគ្នាទៅវិញទៅមក ចេះយោគយល់អធ្យាស្រ័យឲ្យគ្នា មានអនាម័យទាំងការហូបចុកស្នាក់នៅក្នុងក្លឹប។

មុននឹងបញ្ចប់លោកបណ្ឌិត ម៉េង សុភ័ណ្ឌ បានវាយតម្លៃខ្ពស់ចំពោះក្លឹបប្រដាល់ទាំង៣ ថា យើងមានក្លឹបប្រដាល់ចំនួន៣ ហើយយើងទើបតែចាប់ផ្ដើមមិនទាន់បាន១ឆ្នាំ នៅឡើយទេ ប៉ុន្តែ បច្ចុប្បន្នយើងទទួលបានសមទ្ធិផលជាច្រើន មានទាំងខ្សែក្រវាត់ដណ្ដើមបានពីក្រៅប្រទេស ដណ្ដើមបានមេដាយជូនជាតិ និងពានរង្វាន់អមដោយរង្វាន់ប្រាក់លាន/សែន ជាដើម។ លោកបណ្ឌិតអគ្គនាយកស្ថានីយទូរទស្សន៍ អិម អេស ជេ បន្តលើកទឹកចិត្តដល់កីឡាករទាំងអស់ សូមបន្តឆន្ទៈហ្វឹកហាត់ឲ្យកាន់តែខ្លាំង ពីព្រោះឧកាសធំៗ នៅរង់ចាំប្អូនៗកីឡាករទាំងអស់ ដែលមានសមត្ថភាពពិតប្រាកដ ក្នុងការឈោងចាប់យកនៅពេលខាងមុខ។ លោកបណ្ឌិតអគ្គនាយកស្ថានីយ សន្យាលើកទឹកចិត្តដល់កីឡាករដែលកំពុងតែឡើងជើងផងដែរថា នឹងផ្ដល់ឧកាសប្រកួតគូអន្តរជាតិផងដែរ...។

គួរជម្រាបជូនថា ក្រោយពីបានសម្ដែងការគួសម និងទទួលបានការណែនាំពង្រឹងសមត្ថភាព និងគុណភាពសិស្ស ព្រមទាំងគ្រូបង្វឹកបន្ថែមពីលោកបណ្ឌិត ម៉េង សុភ័ណ្ឌ រួចមក លោកគ្រូ និងកីឡាករទាំងអស់ បានសម្ដែងក្ដីសប្បាយរីករាយនឹងសន្យាថា ខិតខំប្រឹងប្រែងបន្ថែមទៀត ដើម្បីក្លាយទៅជាកីឡាករគុនខ្មែរមួយរូបមានសមត្ថភាពខ្លាំង ដែលមហាជនទទួលស្គាល់។ ក្រោយពីបញ្ចប់កិច្ចប្រជុំ លោកបណ្ឌិតអគ្គនាយកស្ថានីយទូរទស្សន៍ អិម អេស ជេ ក៏បានរៀបចំកម្មវិធីជួបជុុពិសារអាហារសាមគ្គីមហាគ្រួសារ នៅទីស្នាក់ការកណ្តាល រាជធានីភ្នំពេញ មានទាំងម្ហូបអាហារដ៏សម្បូរបែប ជាមួយនឹងការក្រេបរស់ជាតិផលិតផលរបស់ក្រុមហ៊ុន វឌ្ឍនៈ ប្រ៊ូវើរី មានឪជារសឈ្ងុយឆ្ងាញ់ផងដែរ...៕