បាងកក៖ ជំនួយអន្តរជាតិបានចាប់ផ្តើមមកដល់ប្រទេសមីយ៉ាន់ម៉ានាពីថ្ងៃសៅរ៍នេះហើយ ខណៈដែលក្រុមអ្នកជួយសង្គ្រោះបានស្វែងរកអ្នកនៅរស់រានមានជីវិត បន្ទាប់ពីគ្រោះរញ្ជួយដីដ៏ខ្លាំងមួយបានបំផ្លិចបំផ្លាញប្រទេសអាស៊ីអាគ្នេយ៍ ចំពេលដែលគ្រប់គ្នាកំពុងតែមានការព្រួយបារម្ភថាចំនួនអ្នកស្លាប់នឹងមានការកើនឡើង។

ពេលនេះចំនួនអ្នកស្លាប់នៅក្នុងប្រទេសមីយ៉ាន់ម៉ាបានកើនឡើងរហូតទៅដល់ ៦៩៤នាក់ និងរបួសចំនួន ១៦៧០នាក់ហើយ ដែលនេះជាការកើនឡើងយ៉ាងខ្លាំងពីចំនួនអ្នកស្លាប់ដែលត្រូវបានគេរកឃើញ ១៤៤នាក់ប៉ុណ្ណោះកាលពីម្សិលមិញនេះ។

យោងតាមរដ្ឋាភិបាលយោធាបាននិយាយនៅក្នុងសេចក្តីថ្លែងការណ៍មួយថា "ហេដ្ឋារចនាសម្ព័ន្ធដូចជាផ្លូវថ្នល់ ស្ពាន និងអគារនានាត្រូវបានរងផលប៉ះពាល់ ដែលនាំឱ្យមានការស្លាប់ និងរបួសក្នុងចំណោមជនស៊ីវិល។

 ប្រតិបត្តិការស្វែងរក និងជួយសង្គ្រោះកំពុងត្រូវបានអនុវត្តនៅក្នុងតំបន់ដែលរងផលប៉ះពាល់" ។

បន្ថែមពីនេះ បើតាមគំរូព្យាករណ៍របស់សេវាភូគព្ភសាស្ត្រសហរដ្ឋអាមេរិកបានប៉ាន់ប្រមាណថាចំនួនអ្នកស្លាប់អាចលើសពី 10,000 នាក់នៅក្នុងប្រទេសមីយ៉ាន់ម៉ា ហើយការខាតបង់អាចលើសពីតម្លៃនៃផលិតផលក្នុងស្រុកសរុបរបស់ប្រទេសនេះផងដែរ។ 

ចំណែកឯប្រធានាធិបតីអាមេរិកលោក ដូណាល់ ត្រាំ បាននិយាយកាលពីថ្ងៃសុក្រថា លោកបាននិយាយជាមួយមន្ត្រីនៅក្នុងប្រទេសមីយ៉ាន់ម៉ា ហើយថារដ្ឋបាលរបស់លោកនឹងផ្តល់ជំនួយមួយចំនួនទៅដល់ប្រទេសនេះ។