បាងកក៖ ក្រុមជួយសង្គ្រោះបរទេសបានចាប់ផ្តើមហោះហើរទៅកាន់ប្រទេសមីយ៉ាន់ម៉ានាថ្ងៃសៅរ៍នេះ ដើម្បីជួយស្វែងរកអ្នកនៅរស់រានមានជីវិតពីគ្រោះរញ្ជួយដីដែលបានសម្លាប់មនុស្សជាង 1,000 នាក់ ក្នុងប្រទេសអាស៊ីអាគ្នេយ៍។ 

រដ្ឋាភិបាលយោធាបាននិយាយនាថ្ងៃថ្ងៃសៅរ៍នេះថា ចំនួនអ្នកស្លាប់នៅក្នុងប្រទេសមីយ៉ាន់ម៉ាមានចំនួន 1,002 នាក់ ដែលកើនឡើងយ៉ាងខ្លាំងពីរបាយការណ៍ដំបូងរបស់ប្រព័ន្ធផ្សព្វផ្សាយរដ្ឋដែលមានអ្នកស្លាប់ចំនួនត្រឹមតែ 144 នាក់បុណ្ណោះកាលពីថ្ងៃសុក្រម្សិលមិញ។ 

ក្នុងនោះយ៉ាងហោចណាស់មនុស្សចំនួន 9 នាក់បានស្លាប់នៅក្នុងប្រទេសថៃ ដែលជាប្រទេសជិតខាងមីយ៉ាន់ម៉ាដែលមានការរញ្ជួយដីរហូតទៅដល់កម្រិត 7.7 រ៉ិចទ័រ ដែលការរញ្ជួយដីនេះកំពុងតែបានវាយប្រហារអគារ ក៏ដូចជាបានធ្វើឱ្យអគារខ្ពស់ៗមួយចំនួនដែលកំពុងសាងសង់នៅក្នុងរដ្ឋធានីបាងកកបានជាប់គាំងមនុស្សចំនួន 30 នាក់នៅក្រោមកំទេចកំទីហើយមនុស្សចំនួន 49 នាក់ទៀតកំពុងតែបាត់ខ្លួន។ នេះបើតាមការចេញផ្សាយពីសារព័ត៌មាន រ៉យទ័រ នាថ្ងៃ សៅរ៍ ទី ២៩ ខែមីនា ឆ្នាំ២០២៥ នេះ។

ពេលនេះ ប្រទេសរុស្សី ឥណ្ឌា ម៉ាឡេស៊ី និងសិង្ហបុរី បានបញ្ជូនយន្តហោះដឹកជំនួយនិងបុគ្គលិកជាច្រើនទៅកាន់ប្រទេសមីយ៉ាន់ម៉ា ដែលកំពុងតែជួបប្រទះនឹងគ្រោះរញ្ជួយដី និងរងនូវការបំផ្លាញដោយសង្រ្គាមស៊ីវិល បន្ទាប់ពីរដ្ឋប្រហារយោធាឆ្នាំ 2021 បានទម្លាក់រដ្ឋាភិបាលស៊ីវិលជាប់ឆ្នោត។ 

បន្ថែមពីនោះ កូរ៉េខាងត្បូងក៏បាននិយាយដែរថា ខ្លួននឹងផ្តល់ជំនួយមនុស្សធម៌ដំបូងចំនួន 2 លានដុល្លារដល់មីយ៉ាន់ម៉ា តាមរយៈអង្គការអន្តរជាតិផងដែរ។

រីឯនៅទីក្រុងបាងកកដែលមានចម្ងាយ 1,000 គីឡូម៉ែត្រ ពីចំណុចកណ្តាល បេសកកម្មកំពុងជួយសង្គ្រោះបានបង្កើនកិច្ចខិតខំប្រឹងប្រែងរបស់ខ្លួននាថ្ងៃសៅរ៍នេះ ដើម្បីស្វែងរកកម្មករសំណង់ដែលជាប់នៅក្រោមគំនរបាក់បែកនៃអគារ 33 ជាន់ដែលបានដួលរលំ។អាជ្ញាធរបានប្រើប្រាស់ឧបករណ៍ជីកកាយ យន្តហោះគ្មានមនុស្សបើកនិងសត្វឆ្កែដើម្បីស្វែងរក និងជួយសង្គ្រោះក្នុងការព្យាយាមទាញមនុស្សចំនួន ៣០នាក់ ដែលកំពុងជាប់គាំងនៅក្នុងអគារដែលដួលរលំនេះ។