ភ្នំពេញ៖ «គិតមកដល់ពេលនេះ មិនទាន់មានរបាយការណ៍ណាមួយថា «មានជនជាតិខ្មែរបានបាត់បង់ជីវិត បណ្តាលមកពីគ្រោះរញ្ជួយដី នៅក្នុងប្រទេសមីយ៉ាន់ម៉ា និងថៃ នោះទេ»។ នេះបើការបញ្ជាក់របស់ អ្នកនាំពាក្យក្រសួងការបរទេស និងសហប្រតិបត្តិការ នាយប់ថ្ងៃសៅរ៍ ទី២៩ ខែមីនា ឆ្នាំ២០២៥នេះ។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបញ្ជាក់ក្នុងសេចក្តីថ្លែងការណ៍របស់ខ្លួនថា៖ «ករណី គ្រោះមហន្តរាយ រញ្ជួយដីនៅសាធារណរដ្ឋសហភាពមីយ៉ាន់ម៉ា និងព្រះរាជាណាចក្រថៃ រាជរដ្ឋាភិបាល និងប្រជាជនកម្ពុជា មានការរន្ធត់ចិត្តជាខ្លាំង ដែលបានទទួលដំណឹងពីការស្លាប់ និងរបួសជាច្រើននាក់ ដែលបណ្តាលមកពីគ្រោះរញ្ជួយដី ដែលបានវាយប្រហារលើប្រទេសមីយ៉ាន់ម៉ា និងថៃ កាលពីរសៀលថ្ងៃទី២៨ ខែមីនា ឆ្នាំ២០២៥ កន្លងទៅនេះ»។ 

ព្រះរាជាណាចក្រកម្ពុជា បានចូលរួមរំលែកមរណទុក្ខដ៏ក្រៀមក្រំដល់រដ្ឋាភិបាល និងប្រជាជនមីយ៉ាន់ម៉ា និងថៃ ក្នុងគ្រានៃទុក្ខសោកដ៏ក្រៀមក្រំនេះ និងសូមសម្តែងនូវសាមគ្គីភាព ជាមួយរដ្ឋាភិបាល និងប្រជាជន នៃប្រទេសទាំងពីរ។ ក្នុងឱកាសដ៏ក្រៀមក្រំនេះ រាជរដ្ឋាភិបាលកម្ពុជា សូមចូលរួមរំលែកទុក្ខដ៏ជ្រាលជ្រៅជាមួយ ក្រុមគ្រួសារជនរងគ្រោះ និងសូមជូនពរឱ្យអ្នករបួសទាំងឡាយបានឆាប់ជាសះស្បើយ។ 

អ្នកនាំពាក្យបានបញ្ជាក់ថា៖ តាមរយៈស្ថានទូតកម្ពុជាប្រចាំប្រទេសមីយ៉ាន់ម៉ា និងថៃ រាជរដ្ឋាភិបាលកម្ពុជា កំពុងតាមដានយ៉ាងយកចិត្តទុកដាក់លើសុវត្ថិភាពប្រជាពលរដ្ឋកម្ពុជា ដែលអាចមានគ្រោះថ្នាក់នៅក្នុងគ្រោះ មហន្តរាយនេះ។ មកទល់ពេលនេះ មិនទាន់មានរបាយការណ៍ណាមួយថា «មានជនជាតិខ្មែរ បានបាត់បង់ជីវិត បណ្តាលមកពីគ្រោះរញ្ជួយដីនេះទាំងនៅក្នុងប្រទេសមីយ៉ាន់ម៉ា និងថៃនោះទេ»៕