ភ្នំពេញ៖ នាព្រលប់ថ្ងៃសៅរ៍ ទី២៩ ខែមីនា ឆ្នាំ២០២៥ នេះ សម្តេចតេជោ ហ៊ុន សែន ប្រមុខរដ្ឋស្តីទី បានបញ្ជាក់ឲ្យដឹងថា៖ «នៅថ្ងៃនេះថា ភរិយារបស់សម្តេច បានចូលពិនិត្យសុខភាព និងស្តាប់លទ្ធផលនៃការព្យាបាលនៅប្រទេសសិង្ហបុរី មុនពេលគ្រោងនឹងវិលត្រឡប់មកកាន់ប្រទេសកម្ពុជា នៅថ្ងៃស្អែក ទី៣០ ខែមីនា ឆ្នាំ២០២៥»។

សម្តេចតេជោបានសរសេរទៀតថា៖ «ជាទូទៅល្អ តែគាត់ទៅរុំកទាំងមូលរយៈពេល៦សប្តាហ៍។ ដូចនេះ ច្បាស់ណាស់ថា គាត់មិនអាចចូលរួមបុណ្យសពបងទី១ បានឡើយតែគាត់អាចចូលមកដុតធូបជូនបងប្រុសនៅពេលគាត់ត្រឡប់ពីសាំហ្គាពួនៅព្រឹកស្អែក ថ្ងៃទី៣០ ខែមីនា ឆ្នាំ២០២៥ ក្នុងករណីសុខភាពគាត់គ្មានបញ្ហា»។

សម្តេចតេជោ ហ៊ុន សែន សរសរបញ្ជាក់យ៉ាងដូច្នេះថា៖ «ទូកទៅកំពង់នៅ» បងប្រុសខ្ញុំចែកឋានទៅគាត់រួចផុតទុក្ខហើយនៅឡើយតែខ្ញុំត្រូវរ៉ាប់រងគ្រប់យ៉ាង ព្រោះបងថ្លៃរបស់ខ្ញុំបានចែកឋានតាំងពីឆ្នាំ២០១៣ គឺ១២ឆ្នាំមុនមកម្ល៉េះ។ ទោះជាគាត់មានកូន មានចៅដែលចេះទទួលខុសត្រូវខ្លួនឯង តែខ្ញុំនៅតែជាមេគ្រួសារមួយនេះដដែល និយាយមួយបែប ខ្ញុំជាមេគ្រួសារនៃត្រកូល «ហ៊ុន»។

សម្តេចតេជោបានបន្ថែមទៀតថា៖ «កូនចៅ ប្អូនបង្កើត ប្អូនថ្លៃ ក្មួយបង្កើតក្មួយប្រសារទាំងប្រុសស្រីស្លៀកពាក់កាន់ទុក្ខទាំងអស់ រាប់ទាំងក្មួយដែលជានាយករដ្ឋមន្ត្រីផងដែរ។ ដោយសារបងថ្លៃខ្ញុំបានទទួលមរណភាពកាលពីឆ្នាំ២០១៣ បានបូជាយកអដ្ឋិធាតុទៅរក្សាទុកនៅវត្តក្តីល្វា ស្រុកសំរោងទង ខេត្តកំពង់ស្ពឺ និងដោយសារចេតិយសម្រាប់បងប្រុសធ្វើនៅវត្តច័ន្ទបុរីវង្ស នៅខណ្ឌព្រែកព្នៅ រាជធានីភ្នំពេញ ដូចនេះ ត្រូវយកអដ្ឋិធាតុបងថ្លៃពីកំពង់ស្ពឺមក រក្សាទុកនៅវត្តច័ន្ទបុរីវង្ស នៅថ្ងៃទី០១ ខែមេសា ដើម្បីបញ្ចុះជាមួយបងប្រុសនៅក្នុងចេតិយតែមួយ នៅព្រឹកថ្ងៃទី០២ ខែមេសា ឆ្នាំ២០២៥ ខាងមុខ»។

សម្តេចតេជោ ហ៊ុន សែន បានបញ្ជាក់ទៀតថា៖ «បន្ទាប់ពីបញ្ចុះសពរួចនឹងធ្វើបុណ្យ៧ថ្ងៃ បន្ថែមដោយបុណ្យ១០០ថ្ងៃ ដើម្បីកុំឲ្យឆ្លងឆ្នាំដែលនឹងចាប់ផ្តើមនៅល្ងាចថ្ងៃទី០២ ខែមេសា និងបញ្ចប់នៅព្រឹកថ្ងៃទី០៣ ខែមេសា។ ល្ងាចថ្ងៃទី០៣ ខែមេសា ខ្ញុំនឹងធ្វើជាអ្នកបែងចែកទ្រព្យសម្បត្តិ ដើម្បីបញ្ចៀសនូវជម្លោះណាមួយរវាងបងប្អូនទាំង៥នាក់ ដែលជាកូនរបស់គាត់»។

សម្តេចបានសរសេរទៀតថា៖ «បងប្រុសរបស់ខ្ញុំគ្មានទ្រព្យសម្បត្តិ ដើម្បីចែកឲ្យកូនគ្រប់ៗគ្នានោះទេ។ គាត់មានដី និងផ្ទះដែលកំពុងស្នាក់នៅ និងធ្វើបុណ្យសព ដែលមានផ្ទៃក្រឡា ១.២០០ ម៉ែត្រការ៉េ និងផ្ទះឈើ១ខ្នង លើដីជាង ៤.០០០ម៉ែត្រការ៉េ នៅអរិយក្សត្រ។ ស្ថានភាពបែបនេះ ប្រហែលជាតម្រូវឲ្យខ្ញុំដែលជាមេចំណែកត្រូវចំណាយបន្ថែម ដើម្បីឲ្យក្មួយៗទទួលបានគ្រប់ៗគ្នា៕