ត្បូងឃ្មុំ៖ «ឆ្លងកាត់ជីវិតជាកូនកំព្រាឪពុក ដោយរបបអាវខ្មៅ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានប្តេជ្ញាការពារសន្តិភាពឱ្យខាងតែបាន ដើម្បីការពារអ្នកជំនាន់ក្រោយ កុំឱ្យព្រាត់និរាសពីមេបាដោយសារសង្គ្រាមទៀត»។ ឯកឧត្តមរដ្ឋមន្ត្រី បានរៀបរាប់ទាំងអួលដើមក នូវរឿងរ៉ាវជីវិតដ៏កំសត់ ជាមួយអ្នកម្តាយជាស្រ្តីម៉េម៉ាយ ដែលខំតស៊ូចិញ្ចឹមបីបាច់កូនទាំង ចំនួន ០៥នាក់ ដោយដៃទទេ ក្រោយរបបអាវខ្មៅដួលរលំ នាឆ្នាំ១៩៧៩។

ការប្តេជ្ញាការពារសន្តិភាពរបស់ រដ្ឋមន្ត្រីក្រសួងបរិស្ថាន បានធ្វើឡើងនៅក្នុងពិធីសម្ពោធឆ្លងកុដិ ពុទ្ធាភិសេក ឆ្លងខ្លោងទ្វារ ផ្លូវបេតុង វច្ចកុដ្ឋ និងសមិទ្ធផលនានា នៅវត្តខទិរារាម (ហៅវត្តគគីរ) ដែលស្ថិតនៅក្នុងភូមិ២ ឃុំព្រែកអាជី ស្រុកក្រូចឆ្មា ខេត្តត្បូងឃ្មុំ នាថ្ងៃទី២៩ ខែមីនា ឆ្នាំ២០២៥នេះ។

ឯកឧត្តម បណ្ឌិត អ៊ាង សុផល្លែត បានគូសបញ្ជាក់ថា សមិទ្ធទាំងនេះ គឺជាកេរ្តិ៍ ដំណែលសាសនាដ៏មានតម្លៃផ្សារភ្ជាប់នឹងព្រលឹងជាតិ នៃបុព្វបុរសយើងតាំង ពីបុរាណកាលក្រោមបាវចនា «ជាតិ សាសនា ព្រះមហាក្សត្រ» និងដើម្បីងាយស្រួលដល់ពុទ្ធបរិស័ទ ក្នុងការបំពេញកុសលផ្សេងៗ តាមទំនៀមទម្លាប់ ប្រពៃណីសាសនាផងដែរ។ សមិទ្ធិផលក្នុងពុទ្ធចក្រនាថ្ងៃនេះ ពិតជាបានឆ្លុះបញ្ចាំងពីសាមគ្គីភាពប្រកប ដោយជំនឿដ៏ជ្រះថ្លារបស់បងប្អូនប្រជាពលរដ្ឋ ពុទ្ធបរិស័ទគ្រប់រូប ហើយចិត្តជា សទ្ធានេះ គឺបានមកពីចិត្តស្អាត គ្មានហ្មងសៅ គ្មានមន្ទិលក្នុងការប្រព្រឹត្តនូវអំពើល្អ ដែលនេះបង្ហាញថា ប្រជាពលរដ្ឋខ្មែរយើងមានបេះដូងស្អាត។

បើទោះជា ឯកឧត្តមរដ្ឋមន្រ្តី បានឆ្លងកាត់រឿងរ៉ាវជីវិតសោកសៅក្តី តែក្នុងនាមជាអ្នកដែលមានកំណើតនៅស្រុកក្រូចឆ្មា ឯកឧត្តមបណ្ឌិត មិនភ្លេចនាំមកនូវអំពើល្អជូនអ្នកស្រុកក្រូចឆ្មា ខេត្តត្បូងឃ្មុំ ដែលអំពើល្អទាំងនោះហើយគឺជាលាភសំណាងជួយឱ្យចាកផុតពីសេចក្តីអាក្រក់ទាំងឡាយ ប្រៀបដូចជាជីវិតរបស់ ឯកឧត្តមរដ្ឋមន្រ្តី បានរួចផុតពីការសំលាប់របស់អង្គការអាវខ្មៅ ដោយសារអំពើល្អ និងការយកអាសាររបស់អ្នកស្រុកដែលបានជួយផ្តល់ទឹក ម្ហូបអាហារ ខណៈឯកឧត្តម និងម្តាយរួមទាំងបងប្អូនទាំង ០៥នាក់ រត់គេចពីការដេញចាប់របស់អង្គការភ្នែកម្នាស់ ព្រោះពួកគេចង់សំលាប់ផ្តាច់ពូជគ្រួសារអ្នកចេះដឹង ដោយកាលណោះលោកឪពុករបស់ឯកឧត្តមរដ្ឋមន្រ្តី គឺជាគ្រូបង្រៀន។

ដោយកម្ពុជាមានសន្តិភាព មានសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាបិតាដែលបាននាំមកនូវផ្លែផ្កាសន្តិភាពដល់សង្គមកម្ពុជា និងក្រោមការដឹកនាំដ៏ឆ្លាតវៃ និងគតិ បណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ទើបសម្រេច និងបង្កើតបាននូវសមិទ្ធផលជាច្រើន ដោយអាស្រ័យលើការដឹកនាំត្រឹមត្រូវ ការចូលរួមពីគ្រប់ភាគី និងជំនួយពីអន្តរជាតិ ដើម្បីសម្រេចចក្ខុវិស័យប្រែក្លាយកម្ពុជាទៅជាប្រទេសរីកចម្រើន ប្រកបដោយសន្តិភាព និងវិបុលភាព៕