ញូវដែលី៖ សហរដ្ឋអាមេរិកបានដំឡើងពន្ធទៅវិញទៅមកចំនួន 26% លើប្រទេសឥណ្ឌា ដែលជាការដើរថយក្រោយ ចំពោះការរំពឹងទុកនៃប្រទេសអាស៊ីខាងត្បូងនេះដែលគិតថានឹងទទួលបានការធូរស្រាល ពីគោលនយោបាយពាណិជ្ជកម្មសកលរបស់លោកប្រធានាធិបតី Donald Trump ដោយសារតែនយោបាយនេះបានធ្វើឱ្យទីផ្សារពិភពលោកទាំងមូលមិនសប្បាយចិត្តចំពោះប្រធានាធិបតីរូបនេះ អស់រយៈពេលជាច្រើនសប្តាហ៍មកហើយ។ 

យោងតាមសេចក្តីថ្លែងការណ៍របស់សេតវិមានបានឱ្យដឹងថា ពន្ធគយនេះនឹងមានប្រសិទ្ធភាពចាប់ពីថ្ងៃទី 9 ខែមេសាឆាប់ៗនេះហើយ។ នេះបើយោងតាមការចេញផ្សាយពីគេហទំព័ររ៉យទ័រនាថ្ងៃទី ៣ ខែមីនា ឆ្នាំ២០២៥ នេះ។

យោងតាមសេចក្តីប្រកាសកាលពីថ្ងៃពុធម្សិលមិញរបស់លោក Trump ដែលស្តីពីប្រទេសឥណ្ឌា ដោយលោកបានលើកឡើងថា ឥណ្ឌា គឺជាផ្នែកមួយនៃផែនការដ៏ធំទូលាយរបស់លោកក្នុងការដាក់ពន្ធមូលដ្ឋាន 10% លើការនាំចូលទាំងអស់ចាប់ពីថ្ងៃទី 5 ខែមេសា និងពន្ធខ្ពស់ទៅលើប្រទេសមួយចំនួនទៀតដោយរួមទាំង 34% លើប្រទេសចិន និង 46% លើប្រទេសវៀតណាម។

បើតាមការនិយាយរបស់លោក Trump នៅឯសេតវិមានខណៈពេលដែលលោកបានប្រកាសអំពីពន្ធទៅវិញទៅមកថា ឥណ្ឌាកំពុងគិតប្រាក់ពីអាមេរិករហូតដល់ទៅ 52% ទៅហើយ។ បន្ថែមពីនោះសេតវិមានបាននិយាយនៅក្នុងសេចក្តីថ្លែងការណ៍មួយថា ប្រទេសឥណ្ឌាបានដាក់របាំងមិនមែនពន្ធ "បន្ទុកពិសេស" ដោយការដកចេញដែលនឹងបង្កើនការនាំចេញរបស់សហរដ្ឋអាមេរិកយ៉ាងហោចណាស់ 5.3 ពាន់លានដុល្លារជារៀងរាល់ឆ្នាំ។ហើយពេលនេះសហរដ្ឋអាមេរិកមានឱនភាពពាណិជ្ជកម្ម 46 ពាន់លានដុល្លារជាមួយឥណ្ឌា។ 

ម្យ៉ាងវិញទៀតចំពោះពន្ធគយទៅវិញទៅមកនឹងបន្ថែមសម្ពាធលើនាយករដ្ឋមន្រ្តីឥណ្ឌាលោក Narendra Modi ដើម្បីស្វែងរកវិធីដើម្បីធ្វើឱ្យឥណ្ឌាចេញផុតពីការជាប់ពាក់ព័ន្ធនឹងការដាក់ពន្ធរបស់លោក ត្រាំ។

កាលពីសប្តាហ៍មុន Reuters បានរាយការណ៍ថា ទីក្រុងញូវដែលីនឹងបើកទូលាយក្នុងការកាត់បន្ថយពន្ធលើការនាំចូលរបស់សហរដ្ឋអាមេរិកដែលមានតម្លៃ 23 ពាន់លានដុល្លារ ដើម្បីកាត់បន្ថយផលប៉ះពាល់លើការនាំចេញរបស់ខ្លួនក្នុងវិស័យដូចជា ត្បូង គ្រឿងអលង្ការ ឱសថ និងគ្រឿងបន្លាស់រថយន្តជាដើម។

រដ្ឋបាលរបស់លោក Modi បានចាត់វិធានការមួយចំនួនដើម្បីយកឈ្នះលើលោក Trump តាមរយៈការទម្លាក់ពន្ធលើម៉ូតូទំនើប bourbon និងទម្លាក់ពន្ធលើសេវាកម្មឌីជីថលដែលប៉ះពាល់ដល់ក្រុមហ៊ុនបច្ចេកវិទ្យាយក្សរបស់សហរដ្ឋអាមេរិក។

រីឯលោក Ajay Sahai អគ្គនាយកនៃសហព័ន្ធអង្គការនាំចេញរបស់ឥណ្ឌាបាននិយាយថា ពន្ធគយទៅវិញទៅមកលើប្រទេសឥណ្ឌា គឺទាបជាងដៃគូប្រកួតប្រជែងសំខាន់ៗដូចជា វៀតណាម និងបង់ក្លាដែស ដែលអាចជួយដល់វិស័យសម្លៀកបំពាក់ និងស្បែកជើងរបស់ឥណ្ឌាផងដែរ។