យោងតាមបណ្តាញទំនាក់ទំនងរបស់ក្រសួងព័ត៌មានបានអោយដឹងថាសមាគមទីភ្នាក់ងារប្រព័ន្ធផ្សព្វផ្សាយពាណិជ្ជកម្មកម្ពុជា ដែលប្រមូលផ្តុំក្រុមហ៊ុនផ្តល់សេវាផ្សព្វផ្សាយពាណិជ្ជកម្មតាមអាល់ហ្វីស និងប៉ាណូចំនួន១៧ក្រុមហ៊ុន បានចូលរួមជាមួយក្រសួងព័ត៌មាន ក្នុងយុទ្ធនាការប្រឆាំងព័ត៌មានក្លែងក្លាយ ដោយមានបានប្រើប្រាស់ផ្ទាំងប៉ាណូ LED របស់ខ្លួន ក្នុងការផ្សព្វផ្សាយសារអប់រំសំខាន់ៗ ដើម្បីចូលរួមបញ្រ្ជាបការយល់ដឹងសាធារណៈពីហានិភ័យនៃព័ត៌មានក្លែងក្លាយ និងលើកកម្ពស់ការប្រើប្រាស់បណ្តាញទំនាក់ទំនងសង្គមដោយមានការទទួលខុសត្រូវ។

តាមរយៈការផ្សព្វផ្សាយទាំងនោះសាធារណជននឹងបានស្វែងយល់ពីផលប៉ះពាល់នៃព័ត៌មានក្លែងក្លាយ វិធីបង្កាការសាយភាយព័ត៌មានក្លែងក្លាយ និងការការពារខ្លួននៅពេលប្រើប្រាស់បណ្តាញសង្គម។

យោងតាមសេចក្តីប្រកាសព័ត៌មានរបស់ការិយាល័យអ្នកនាំពាក្យក្រសួងព័ត៌មានបានអោយដឹងថាដើម្បីលើកកម្ពស់ការចូលរួមក្នុងការប្រឆាំងព័ត៌មានក្លែងក្លាយ ក្រសួងព័ត៌មាននឹងបន្តសហការជាមួយ តួអង្គរដ្ឋនិងឯកជន ដើម្បីផ្សព្វផ្សាយខ្លឹមសារអប់រំ និងសារអំពាវនាវដល់សាធារណជន តាមប្រព័ន្ធសារទូរសព្ទ ចល័ត (SMS) និងសារជាសំឡេង(call-tune) ព្រមទាំងសហការជាមួយក្រុមហ៊ុនបណ្តាញសង្គម ដូចជា Tiktok, Meta ជាដើម ក្នុងការពង្រឹងការអនុវត្តនិយ្តាញសង្គម ដើម្បីធានា ការប្រើប្រាស់ដោយក្រមសីលធម៌ និងការទទួលខុសត្រូវ ជាពិសេសការប្រើប្រាស់ខ្លឹមសារ ពាក្យពេចន៍ រូបភាព និងវីដេអូ និងការពារសុវត្ថិភាពនិងសិទ្ធិរបស់អ្នកប្រើ។

សូមបញ្ជាក់ថា នៅក្នុងបរិបទនៃការរីកចម្រើនឥតឈប់ឈរនៃបច្ចេកវិទ្យា ការទទួល និងផ្សព្វផ្សាយព័ត៌មានបែបទំនើប តាមប្រព័ន្ធឌីជីថល ជាពិសេសលើបណ្តាញទំនាក់ទំនងសង្គម បានកើនឡើងជាលំដាប់ ខណៈគ្រោះថ្នាក់នៃ ព័ត៌មានក្លែងក្លាយដែលចរាចរតាមមធ្យោបាយទំនើបទាំងនេះ រឹតតែមានលក្ខណៈស្រួចស្រាល់ឡើង។

គ្រប់ប្រភេទនៃព័ត៌មានក្លែងក្លាយ សុទ្ធតែមានឥទ្ធិពលអវិជ្ជមានមកលើផ្នែកសន្តិសុខ សណ្តាប់ធ្នាប់ សង្គម សេដ្ឋកិច្ច និងនយោបាយ ពោលគឺព័ត៌មានក្លែងក្លាយអាចបង្កអស្ថិរភាព បង្កើតអំពើហិង្សា ដែលបណ្តាល ឱ្យកើតមានអរិភាពសង្គម ប្រជាពលរដ្ឋបាត់ទំនុកចិត្តលើការដឹកនាំ និងនាំឱ្យមានការបែកបាក់សាមគ្គីភាព ក្នុងសង្គម។

គោលដៅនៃយុទ្ធនាការប្រឆាំងព័ត៌មានក្លែងក្លាយរបស់ក្រសួងព័ត៌មាននេះ គឺដើម្បីកាត់បន្ថយព័ត៌មានក្លែងក្លាយ ឱ្យមកនៅកម្រិតអប្បបរិមាសំដៅធានាសន្តិសុខព័ត៌មាន ពោល គឺការទទួលព័ត៌មានប្រកបដោយគុណភាព និង សុវត្ថិភាពរបស់ប្រជាពលរដ្ឋ៕