កំពង់ធំ៖ នាព្រឹកថ្ងៃទី២១ ខែធ្នូ ឆ្នាំ២០២៥ លោកឧបនាយករដ្ឋមន្រ្តីប្រចាំការ វង្សី វិស្សុត រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានបន្តចុះសួរសុខទុក្ខវីរកងទ័ពដែលរងរបួសក្នុងបុព្វហេតុការពារបូរណភាពទឹកដីនៅសមរភូមិមុខ ហើយបច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកខេត្តកំពង់ធំ។ 

អមដំណើរចុះសាកសួរសុខទុក្ខនេះ ក៏មានការអញ្ជើញចូលរួមផងដែរពីសំណាក់ លោកអ្នកឧកញ៉ា ទ្រី ភាព, លោក ថោ ជេដ្ឋា រដ្ឋមន្ត្រីក្រសួងធនធានទឹក, លោក ហួត ហាក់ រដ្ឋមន្ត្រីទេសចរណ៍ និង លោក នួន ផារ័ត្ន អភិបាលខេត្តកំពង់ធំ។

លោកឧបនាយករដ្ឋមន្ត្រីប្រចាំការ វង្សី វិស្សុត បានពាំនាំនូវបណ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាអគ្គភស្តុភារជាន់ខ្ពស់មិនចេះរីងស្ងួតរបស់កងទ័ព និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាពិសេសពីសំណាក់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត  ដែលតែងតែបានគិតគូរជានិច្ចពីសុខទុក្ខវីរកងទ័ព និងក្រុមគ្រួសារ នៅគ្រប់ទីកន្លែង និយាយជារួម និងនិយាយដោយឡែក នៅក្នុងខេត្តកំពង់ធំរបស់យើងផងដែរ។

លោកឧបនាយករដ្ឋមន្ត្រីប្រចាំការ បានសម្តែងនូវការគោរព ការដឹងគុណ ការស្រលាញ់  និងការកោតសរសើរវាយតម្លៃខ្ពស់ ជូនបងប្អូនវីរកងទ័ពទាំងអស់ ចំពោះវីរភាព និងការខិតខំតស៊ូដ៏ស្វិតស្វាញ និងប្តូរផ្តាច់នៅលើសមរភូមិ  ដោយហ៊ានលះបង់ដ៏ធំធេង លះបង់ឈាមនិងសាច់ ដើម្បីបុព្វហេតុការពារអធិបតេយ្យនិងបូរណភាពទឹកដីនៃកម្ពុជាយើងពីការរំលោភឈ្លានពានរបស់កងទ័ពថៃ នៅតាមបណ្តោយព្រំដែន។ 

លោកឧបនាយករដ្ឋមន្ត្រីប្រចាំការ វង្សី វិស្សុត មានប្រសាសន៍ផ្តាំផ្ញើដល់បងប្អូនវីរកងទ័ពទាំងអស់ផងដែរថា សមរភូមិក្រោយឈរនៅពីក្រោយសមរភូមិមុខយ៉ាងរឹងមាំជាធ្លុងមួយ និងជាកម្លាំងតែមួយ ដើម្បីផ្តល់ការគាំទ្រដល់វីរកងកម្លាំងកម្ពុជាយើង ទាំងកងទ័ព នគរបាល និងអាវុធហត្ថ។

លោកឧបនាយករដ្ឋមន្ត្រីប្រចាំការ និងក្រុមការងារអមដំណើរ បានជូនពរឱ្យវីរកងទ័ពទាំងអស់ ឆាប់បានជាសះស្បើយ ហើយមានសុខភាពល្អ កម្លាំងមាំមួន និងអាចវិលត្រលប់ចូលអង្គភាពវិញ ដើម្បីបន្តបេសកកម្មការពារជាតិ និងដេញពួកឈ្លានពានកុំឱ្យចូលមកក្នុងទឹកដីយើង។

ក្នុងឱកាសនោះដែរ លោកឧបនាយករដ្ឋមន្រ្តីប្រចាំការ វង្សី វិស្សុត បានឧបត្ថម្ភថវិកា ចំនួន ៣០ ម៉ឺនរៀល និងលោកអ្នកឧកញ៉ា ទ្រី ភាព បានឧបត្ថម្ភថវិកា ចំនួន ១០០ ដុល្លារ ដើម្បីលើកទឹកចិត្តដល់វីរកងទ័ពទាំងអស់ដែលកំពុងសម្រាកព្យាបាលរបួសគ្រប់ៗគ្នា។ បងប្អូនវីរកងទ័ពទាំងអស់ បានបញ្ជាក់ពីទឹកចិត្តដោយមិនខ្លាចរុញរាថា ពេលជាសះស្បើយពីរបួស នឹងវិលចូលសមរភូមិប្រយុទ្ធវិញ ដោយមិនចុះញ៉មជាមួយពួកឈ្លានពាននោះឡើយ៕