ព្រំដែន៖ អ្នកជំនាញផ្នែកគ្រាប់បែក បានលើកឡើងថា ការប្រើប្រាស់គ្រាប់បែកចង្កោម M46 ដែលបាញ់ចេញពីកាំភ្លើងធំ ប្រភេទ ១៥៥មម ដោយយោធាថៃលើទឹកដីកម្ពុជា មិនមែនជាការប្រើអាវុធធម្មតានោះទេ ប៉ុន្តែ ជាសកម្មភាពដែលបង្កការគំរាមកំហែងយ៉ាងធ្ងន់ធ្ងរដល់ជីវិត និងអនាគតរបស់ប្រជាជនស៊ីវិលកម្ពុជា។

គ្រាប់បែកចង្កោមប្រភេទនេះ មានលក្ខណៈងាយនឹងផ្ទុះខ្លាំង។ ការប៉ះស្រាលៗ រំញ័រតិចតួច ឬសកម្មភាពប្រចាំថ្ងៃ ដូចជា ការកាប់ដី ការប្រើឧបករណ៍កសិកម្ម ឬសូម្បីតែការចង់ដឹងចង់ឃើញរបស់កុមារ ក៏អាចបង្កឲ្យមានគ្រោះថ្នាក់ដល់ជីវិតភ្លាមៗ។

បន្ទាប់ពីការបាញ់ផ្លោង គ្រាប់បែកចង្កោមមិនផ្ទុះទាំងអស់ក្នុងពេលតែមួយនោះទេ។ ផ្ទុយទៅវិញ វាខ្ចាត់ខ្ចាយនៅពាសពេញដី ក្នុងកសិដ្ឋាន ព្រៃភ្នំ និងភូមិសាស្ត្ររបស់ប្រជាពលរដ្ឋ ហើយនៅស្ថិតនៅទីនោះជាយូរបន្ទាប់ពីសម្លេងអាវុធបានស្ងប់ស្ងាត់។ គ្រាប់ទាំងនេះមើលមិនឃើញ គ្មានស្លាកស្នាម និងនៅរង់ចាំជនរងគ្រោះបន្ទាប់។

សម្រាប់កសិករកម្ពុជា វាមានន័យថា “ការភ័យខ្លាច” ជាប្រចាំថ្ងៃ ក្នុងការចូលទៅដីស្រែ ដើម្បីរកចំណូលចិញ្ចឹមគ្រួសារ។ សម្រាប់កុមារកម្ពុជា វាគឺជា “ឃាតករ” ដែលបន្លំខ្លួនជាប្រដាប់លេង ឬជាសំណល់ធម្មតាមួយ ដែលអាចបញ្ចប់ជីវិត ឬបង្កភាពពិការជារៀងរហូត។

ការប្រើប្រាស់គ្រាប់បែកចង្កោម មិនអាចចាត់ទុកថាជាការការពារបានឡើយ។ វាមិនមែនជាឧបទ្ទវហេតុទេ។ វាជាការគំរាមកំហែងដោយចេតនា ទៅលើផ្ទៃដី និងជីវិតរបស់ប្រជាជនស៊ីវិល។
កម្ពុជា ស្គាល់អាវុធប្រភេទនេះយ៉ាងច្បាស់។ ប្រទេសបានរងទុក្ខពីគ្រាប់មីន និងសំណល់អាវុធសង្គ្រាមអស់រយៈពេលជាច្រើនទសវត្សរ៍។ ប្រជាជនកម្ពុជាដឹងថាអាវុធទាំងនេះ មិនបញ្ចប់គ្រោះថ្នាក់នៅថ្ងៃបាញ់ផ្លោងទេ ប៉ុន្តែ បន្តសម្លាប់ និងបំផ្លាញជីវិតជនស៊ីវិលស្លូតត្រង់សម្រាប់ឆ្នាំ និងជំនាន់ខាងមុខ។

ការប្រើប្រាស់គ្រាប់បែកចង្កោម មិនមែនជាការវាយប្រហារលើបច្ចុប្បន្នប៉ុណ្ណោះទេ ប៉ុន្តែជាការវាយប្រហារទៅលើអនាគតរបស់ប្រទេសកម្ពុជា ទៅលើដីធ្លី សុវត្ថិភាព និងសេចក្តីសង្ឃឹមរបស់ប្រជាជន។ ពិភពលោកត្រូវតែឃើញ និងយល់ពីការពិតនេះ ហើយមិនគួរនៅស្ងៀមឡើយ។

អាជ្ញាធរមីន អំពាវនាវសូមកុំចូលតំបន់ណា ដែលសង្ស័យបន្សល់គ្រាប់យុទ្ធភណ្ឌមិនទាន់ផ្ទុះសេសសល់ពីសង្គ្រាម និងមុនចូលតំបន់នោះត្រូវសាកសួរព័ត៍មានពីអាជ្ញាធរមានសមត្ថកិច្ច មេភូមិ មេឃុំ និងប៉ុស្តិ៍នគរបាល។

នៅពេលប្រទះឃើញមីន គ្រាប់មិនទាន់ផ្ទុះ គ្រាប់បែកចង្កោម និងវត្ថុចំលែកសង្ស័យជាគ្រាប់ សូមកុំប៉ះពាល់ កែច្នៃ គប់ ដុំ ឫចល័តទៅទីណាមួយ ព្រោះគ្រាប់ទាំងនោះនឹងធ្វើឱ្យរបួស ពិការ ស្លាប់ គ្រប់ពេល និងសូមរាយការណ៍ជាបន្ទាន់ទៅអាជ្ញាធរមានសមត្ថកិច្ច ប៉ុស្តិ៍នគរបាល មេភូមិ មេឃុំ និងប្រតិបត្តិករបោសសម្អាតមីន ដែលនៅជិតបំផុត៕