ភ្នំពេញ៖ អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានចេញសេចក្ដីជូនដំណឹងណែនាំអំពីវិធានការដោះស្រាយ និងកែតម្រូវកំហុសទិន្នន័យអត្តសញ្ញាណបុគ្គល ដើម្បីធានាថាព័ត៌មានផ្ទាល់ខ្លួនរបស់ប្រជាពលរដ្ឋ មានភាពត្រឹមត្រូវ និងអាចប្រើប្រាស់បានតាមផ្លូវការយ៉ាងមានប្រសិទ្ធភាព។

តាមសេចក្ដីណែនាំ បានបញ្ជាក់ថា កំហុសទិន្នន័យអត្តសញ្ញាណដែលអាចកើតមាន រួមមាន កំហុសលើឈ្មោះ ថ្ងៃខែឆ្នាំកំណើត អាសយដ្ឋាន និងព័ត៌មានសំខាន់ផ្សេងៗ ដែលអាចប៉ះពាល់ដល់សិទ្ធិ និងការប្រើប្រាស់ឯកសាររដ្ឋបាលរបស់ប្រជាពលរដ្ឋ។

អាជ្ញាធរបានណែនាំឲ្យប្រជាពលរដ្ឋ ដាក់ពាក្យស្នើសុំកែតម្រូវជាមួយឯកសារភស្តុតាងពាក់ព័ន្ធ ដូចជា សំបុត្រកំណើត អត្តសញ្ញាណប័ណ្ណ ឬឯកសារផ្លូវការផ្សេងៗ ដើម្បីឲ្យអាជ្ញាធរធ្វើការត្រួតពិនិត្យ និងផ្ទៀងផ្ទាត់ មុននឹងអនុម័តកែប្រែទិន្នន័យ។ ដំណើរការនេះ មានគោលបំណងធានាថាការកែតម្រូវមានភាពត្រឹមត្រូវ និងជៀសវាងកំហុសបន្តដែលអាចបង្កបញ្ហានៅពេលប្រើប្រាស់ឯកសារផ្លូវការ។

ជាមួយគ្នានេះ អគ្គនាយកដ្ឋានអត្តសញ្ញាណកម្ម ក៏បានលើកទឹកចិត្តឲ្យប្រជាពលរដ្ឋធ្វើការផ្ទៀងផ្ទាត់ព័ត៌មានផ្ទាល់ខ្លួនជាប្រចាំ (Self-verification) និងរាយការណ៍ភ្លាមៗ ប្រសិនបើរកឃើញកំហុស ដើម្បីជួយកាត់បន្ថយកំហុស និងបង្កើនភាពជឿជាក់នៃប្រព័ន្ធទិន្នន័យអត្តសញ្ញាណជាតិ។

អាជ្ញាធរបញ្ជាក់ថា ការធ្វើឲ្យទិន្នន័យអត្តសញ្ញាណមានភាពត្រឹមត្រូវ គឺជាគន្លឹះសំខាន់ក្នុងការធានាសិទ្ធិ និងការទទួលបានសេវាសាធារណៈរបស់ប្រជាពលរដ្ឋ៕