ហាណូយ៖ អាជ្ញាធរវៀតណាម បាននិយាយនៅថ្ងៃអង្គារនេះថា ព្យុះទីហ្វុង Kajiki បានបណ្ដាលឲ្យមនុស្សយ៉ាងហោចណាស់ ៣នាក់ ស្លាប់ និងរបួស ១០ នាក់ នៅក្នុងប្រទេសវៀតណាម ខណៈដែលមានការព្រមានថា ភ្លៀងធ្លាក់ខ្លាំងអាចបណ្តាលឱ្យមានទឹកជំនន់ និងការរអិលបាក់ដី។ នេះបើតាមការរាយការណ៍ពីភ្នាក់ងារសារព័ត៌មាន រ៉យទ័រ នៅថ្ងៃទី២៦ សីហា។

រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា ខ្យល់ព្យុះនេះបានបំផ្លាញផ្ទះជិត 7,000 ខ្នង ជន់លិចដំណាំស្រូវចំនួន 28,800 ហិកតា និងបានបំផ្លាញដើមឈើចំនួន 18,000 ដើម។ ព្យុះសង្ឃរានេះ ក៏បានបំផ្លាញបង្គោលអគ្គិសនីចំនួន 331 ដើម ដែលបណ្តាលឱ្យមានការដាច់ចរន្តអគ្គិសនីនៅក្នុងខេត្ត Thanh Hoa, Nghe An, Ha Tinh, Thai Nguyen និង Phu Tho ប្រទេសវៀតណាម។

ការវាយប្រហាររបស់ព្យុះនេះ បានបណ្ដាលឲ្យផ្លូវនានាក្នុងរដ្ឋធានីហាណូយត្រូវបានជន់លិចយ៉ាងខ្លាំង ខណៈដែលភ្លៀងនៅតែបន្តធ្លាក់ខ្លាំងនៅព្រឹកថ្ងៃអង្គារនេះ។

តាមទីភ្នាក់ងារអាកាសធាតុជាតិបាននិយាយថា បន្ទាប់ពីបានបាក់ដីនៅឆ្នេរសមុទ្រភាគកណ្តាល និងភាគខាងជើងនៃប្រទេសវៀតណាមកាលពីរសៀលថ្ងៃច័ន្ទ ព្យុះ Kajiki បានចុះខ្សោយទៅជាព្យុះត្រូពិច ខណៈដែលវាបានរំកិលឆ្លងកាត់ទៅកាន់ប្រទេសឡាវនៅព្រឹកថ្ងៃអង្គារនេះ។

ទីភ្នាក់ងារនេះបានព្រមានថា ភ្លៀងនឹងបន្តធ្លាក់នៅតំបន់មួយចំនួននៃភាគខាងជើងប្រទេសវៀតណាម ដោយតំបន់ខ្លះទំនងជាមានភ្លៀងធ្លាក់រហូតដល់ 150 មីលីម៉ែត្រ (6 អ៊ីញ) ក្នុងរយៈពេល 6 ម៉ោងដែលអាចបណ្តាលឱ្យមានទឹកជំនន់ភ្លាមៗ និងការរអិលបាក់ដី។

គួរឲ្យដឹងថា មុនពេលវាយប្រហារប្រទេសវៀតណាម ព្យុះ Kajiki បានឆ្លងកាត់ឆ្នេរសមុទ្រភាគខាងត្បូងនៃកោះ Hainan របស់ប្រទេសចិនកាលពីថ្ងៃអាទិត្យកន្លងទៅ ដោយបណ្ដាលឱ្យទីក្រុង Sanya នៅលើកោះនេះបិទអាជីវកម្ម និងការដឹកជញ្ជូនសាធារណៈ៕