បាល់ទាត់៖ ការ​ប្រកួត​វគ្គ៨ក្រុម​ចុង​ក្រោយ នឹង​ធ្វើ​នៅ​ខែ​មីនា ឆ្នាំ ២០២៦ខាងមុខ ដោយ​ក្រុម​ព្រះ​ខ័ន​រាជ​ស្វាយរៀង និង ភ្នំពេញ​ក្រោន ​ត្រូវ​ប្រកួត​គ្នា២ជើង ​​នៅ​ទឹក​ដី​កម្ពុជា​តែ​ម្តង​ ដើម្បី​រក​​ក្រុមតែមួយគត់ ​ឡើង​វគ្គ​ពាក់​កណ្តាល​ផ្តាច់​ព្រ័ត្រ។

ការប្រកួតពានរង្វាន់កម្រិតទី៣ ទ្វីបអាស៊ី AFC Challenge League សម្រាប់ពូល D និងពូល E បានរកឃើញក្រុមដែលទទួលបានចំណាត់ថ្នាក់លេខ១ និងលេខ២ហើយ ។ ពូល D លេខ១ ព្រះខ័នរាជស្វាយរៀង កម្ពុជា, លេខ២ ក្លិប Manila Digger ។ ចំណែកពូល E លេខ១ ក្រុម Dewa United, លេខ២ ភ្នំពេញក្រោន កម្ពុជា ។ ដូចនេះ ការប្រកួតបន្ត ក្រុមលេខ១ ពូល E នឹងត្រូវជួបក្រុមលេខ២ ពូល D ឯក្រុមលេខ១ ពូល D នឹងត្រូវជួបក្រុមលេខ២ ពូល E វិញ ដើម្បីប្រជែងយកកៅអីឡើងទៅកាន់វគ្គពាក់កណ្ដាលផ្ដាច់ព្រ័ត្រ។

ដូច្នេះ ព្រះខ័នរាជស្វាយរៀង ស្មើការប្រកួតចុងក្រោយ ក្លាយជាក្រុមលេខ១ ក្នុងពូល D ខណៈភ្នំពេញក្រោន ឈ្នះការប្រកួតចុងក្រោយ ឈរនៅលេខ២ ក្នុងពូល E ។ ក្រុមទាំង២  របស់កម្ពុជា នឹងត្រូវជួបគ្នានៅវគ្គ៨ក្រុមចុងក្រោយ ប្រជែងយកកៅអីវគ្គពាក់កណ្ដាលផ្ដាច់ព្រ័ត។ តើមានផលចំណេញដែរ ឬទេ សម្រាប់កម្ពុជា..?

ចម្លើយគឺ ព្រះខ័នរាជស្វាយរៀង និង ភ្នំពេញក្រោន នៅវគ្គ ៨ ក្រុមនេះ នឹងផ្តល់ផលចំណេញធំធេងណាស់ដល់បាល់ទាត់កម្ពុជា បើទោះបីលទ្ធផលយ៉ាងណាក៏ដោយ។ ការជួបគ្នារវាងក្រុមទាំង២ នឹងធានា បាន១០០% ​គឺកម្ពុជា នឹងមាន១ក្រុម ត្រូវទទួលបានកៅអីឡើងទៅកាន់វគ្គពាក់កណ្តាលផ្តាច់ព្រ័ត្រ។ យ៉ាងណាមិញ ក្រុមទាំង ២ ជួបគ្នាវគ្គ ៨ ក្រុមចុងក្រោយបែបនេះ នឹងធ្វើឱ្យអ្នកគាំទ្រស្កប់ចិត្តថា ការប្រកួតខាងមុខ មិនខ្វល់លទ្ធផលបែបណានោះទេ ព្រោះមានក្រុមកម្ពុជាមួយ បានកក់កៅអីឡើងវគ្គពាក់កណ្តាលផ្តាច់ព្រ័ត្ររួចបាត់ទៅហើយ ៕