ភ្នំពេញ៖ លើវិស័យការទូត ក្រសួង និងស្ថាប័នពាក់ព័ន្ធ ដែលជាសេនាធិការរបស់រាជរដ្ឋាភិបាល បានអនុវត្តការងារយ៉ាងសកម្ម និងគ្រប់ជ្រុងជ្រោយ ដោយផ្អែកលើស្មារតីទទួលខុសត្រូវខ្ពស់ ចំពោះសេចក្តីសុខរបស់ប្រជាពលរដ្ឋ និងការការពារបូរណភាពទឹកដីស្ថិតក្នុងដែនអធិបតេយ្យស្របច្បាប់របស់កម្ពុជា។ នេះជាថ្លែងបញ្ជាក់របស់អ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា នៅថ្ងៃទី០៣ ខែកុម្ភៈ ឆ្នាំ២០២៦ នេះ។

ជាមួយគ្នានេះ កម្ពុជាបានបញ្ជាក់ជំហរប្រឆាំងដាច់ខាតចំពោះការប្រើប្រាស់កម្លាំង ដើម្បីចូលកាន់កាប់ទឹកដី ដែលជាសកម្មភាពផ្ទុយនឹងច្បាប់អន្តរជាតិ។

ជាក់ស្តែង ក្រសួងការបរទេស និងសហប្រតិបត្តិការអន្តរជាតិ បានចេញកំណត់ទូតតវ៉ា និងសេចក្តីថ្លែងការណ៍ជាបន្តបន្ទាប់ ដើម្បីបញ្ជាក់ពីការតវ៉ាជាផ្លូវការរបស់រាជរដ្ឋាភិបាលកម្ពុជា ទៅកាន់ភាគីថៃ។

ក្នុងនោះដែរ រដ្ឋលេខាធិការដ្ឋានកិច្ចការព្រំដែន ក៏បានចេញលិខិតតវ៉ា និងកំណត់ទូតជាបន្តបន្ទាប់ ដោយស្នើឱ្យភាគីថៃបញ្ជូនក្រុមការងារវាស់វែងខណ្ឌសីមាព្រំដែន ចុះធ្វើការងារលើទីតាំងជាក់ស្តែងរួមជាមួយភាគីកម្ពុជា។

កម្ពុជាបានបញ្ជាក់សាជាថ្មីថា មិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយ ដែលកើតចេញពីការប្រើប្រាស់កម្លាំង៕