វ៉ាស៊ីនតោន៖ ក្រសួងការបរទេសសហរដ្ឋអាមេរិក បានប្រកាសផ្តល់ប្រាក់រង្វាន់រហូតដល់ ១០ លានដុល្លារ សម្រាប់អ្នកណាដែលផ្តល់ព័ត៌មានអាចនាំទៅដល់ការកំណត់អត្តសញ្ញាណ ឬទីតាំងរបស់មេដឹកនាំសំខាន់ៗរបស់អ៊ីរ៉ង់ រួមទាំង មេដឹកនាំកំពូលថ្មី លោក Mojtaba Khamenei ផងដែរ។ នេះបើយោងតាមទីភ្នាក់ងារព័ត៌មាន Anadolu កាលពីថ្ងៃទី១៣ ខែមីនា ឆ្នាំ ២០២៦ នេះ។

ការប្រកាសនេះ ធ្វើឡើងតាមរយៈកម្មវិធី Rewards for Justice ដែលជាកម្មវិធីរបស់រដ្ឋាភិបាលអាមេរិកសម្រាប់ផ្តល់ប្រាក់រង្វាន់ជាថ្នូរព័ត៌មានដែលជួយដល់ការបង្ក្រាបសកម្មភាពភេរវកម្ម និងបណ្តាញយោធាដែលគេចោទប្រកាន់ថា «បង្កគ្រោះថ្នាក់សន្តិសុខអន្តរជាតិ»។

តាមការបញ្ជាក់របស់ទីក្រុងវ៉ាស៊ីនតោន ការផ្តល់ប្រាក់រង្វាន់នេះមានគោលដៅលើមេដឹកនាំ និងមន្ត្រីជាន់ខ្ពស់ដែលពាក់ព័ន្ធនឹង កងកម្លាំងបដិវត្តន៍អ៊ីស្លាមអ៊ីរ៉ង់ (IRGC) ដែលត្រូវបានចោទប្រកាន់ថា «បានរៀបចំ និងគាំទ្រការវាយប្រហារនៅតាមបណ្តាប្រទេសជាច្រើននៅជុំវិញពិភពលោក»។

បញ្ជីគោលដៅក៏រួមមានមន្ត្រីជាន់ខ្ពស់ដទៃទៀតផងដែរ ដូចជា លោក Ali Asghar Hejazi អនុប្រធានខុទ្ទកាល័យមេដឹកនាំកំពូល និង លោក Yahya Rahim Safavi ទីប្រឹក្សាយោធាជាន់ខ្ពស់របស់អ៊ីរ៉ង់។

ការប្រកាសនេះកើតឡើងបន្ទាប់ពី រដ្ឋមន្ត្រីការពារជាតិអាមេរិក លោក Pete Hegseth បានអះអាងថា មេដឹកនាំកំពូលថ្មីរបស់អ៊ីរ៉ង់បានរងរបួសក្នុងអំឡុងពេលដែលអាមេរិក និងអ៊ីស្រាអែលបន្តការវាយប្រហារលើគោលដៅយោធានៅក្នុងប្រទេសអ៊ីរ៉ង់។

ភាពតានតឹងនៅតំបន់មជ្ឈិមបូព៌ាបានកើនឡើងយ៉ាងខ្លាំង បន្ទាប់ពីការវាយប្រហាររួមគ្នារវាងអាមេរិក និងអ៊ីស្រាអែលកាលពីថ្ងៃទី ២៨ ខែកុម្ភៈ ដែលបានបណ្តាលឲ្យមានអ្នកស្លាប់ ប្រមាណ ១,៣០០ នាក់ រួមទាំងអតីតមេដឹកនាំកំពូល Ali Khamenei ផងដែរ។

ជាការឆ្លើយតប អ៊ីរ៉ង់បានបាញ់បង្ហោះដ្រូន និងមីស៊ីលទៅកាន់គោលដៅនៅ អ៊ីស្រាអែល ហ្ស៊កដានី អ៊ីរ៉ាក់ និងប្រទេសនៅតំបន់ឈូងសមុទ្រ ដែលបណ្តាលឲ្យមានការខូចខាតហេដ្ឋារចនាសម្ព័ន្ធស៊ីវិល និងការបាត់បង់ជីវិតមនុស្សជាច្រើន។ ស្ថានការណ៍នេះក៏បានប៉ះពាល់ដល់ទីផ្សារសកល និងវិស័យអាកាសចរណ៍ផងដែរ។

អ្នកវិភាគអន្តរជាតិព្រមានថា ប្រសិនបើការប្រឈមមុខគ្នានៅតំបន់នេះបន្តកើនឡើង វាអាចនាំឲ្យមានវិបត្តិសន្តិសុខធំមួយដែលប៉ះពាល់ដល់សេដ្ឋកិច្ច និងស្ថិរភាពពិភពលោក៕