ប្រេស៊ីល៖ នៅថ្ងៃទី២២ ខែវិច្ឆិកា ឆ្នាំ២០២៥ អង្គការអ្នកប្រជាធិបតេយ្យនិយមកណ្តាលអន្តរជាតិ (CDI–IDC) បានអនុម័តសេចក្តីសម្រេចមួយ ស្តីពី “ការគាំទ្របទឈប់បាញ់ និងកិច្ចព្រមព្រៀងសន្តិភាពរវាងកម្ពុជា និងថៃ” បន្ទាប់ពីការប៉ះទង្គិចព្រំដែនកាលពីខែកក្កដា ដែលបណ្តាលឱ្យមានការបាត់បង់ជីវិត និងការខូចខាតធនធានវប្បធម៌ជាច្រើន។

ក្នុងសេចក្តីសម្រេចនេះ CDI–IDC បានអបអរសាទរការចុះហត្ថលេខាលើ សេចក្តីថ្លែងការណ៍រួមទីក្រុងកូឡាឡាំពួរ ថ្ងៃទី២៦ ខែតុលា ឆ្នាំ២០២៥ រវាងកម្ពុជា និងថៃ ក្នុងអំឡុងកិច្ចប្រជុំកំពូលអាស៊ានលើកទី ៤៧។ ក្រុមប្រឹក្សាប្រតិបត្តិបានថ្លែងអំណរគុណចំពោះ ប្រធានាធិបតី Donald J. Trump ដែលបានជំរុញដំណើរការសន្តិភាព និងការសម្របសម្រួលរបស់ នាយករដ្ឋមន្ត្រី ម៉ាឡេស៊ី Anwar Ibrahim ជាប្រធានអាស៊ាន ឆ្នាំ២០២៥ ភាពចូលរួមរបស់ចិន និងមានការគាំទ្រពីសហគមន៍អន្តរជាតិផងដែរ។

អង្គការអ្នកប្រជាធិបតេយ្យនិយមកណ្តាលអន្តរជាតិ (CDI–IDC) បានសរសើរកិច្ចខិតខំរបស់អាស៊ានក្នុងការទប់ស្កាត់ភាពតានតឹង បន្ទាប់ពីការបើកបរការប្រយុទ្ធ នៅថ្ងៃទី២៤ ដល់២៨ ខែកក្កដា ឆ្នាំ២០២៥ ដែលបានជួយសង្គ្រោះជីវិតយោធា និងប្រជាពលរដ្ឋជាច្រើន។ សហគមន៍អន្តរជាតិ ក៏ត្រូវបានកោតសរសើរចំពោះការផ្តល់ជំនួយមនុស្សធម៌ដល់ជនភៀសសឹក។

ជាមួយនោះ CDI–IDC បានបង្ហាញការព្រួយបារម្ភខ្លាំងចំពោះភាពផុយស្រួយនៃសន្តិភាព ដោយយោងទៅលើករណី កងទ័ពថៃ បើកការបាញ់ប្រហារជនស៊ីវិលគ្មានអាវុធ នៅខេត្តបន្ទាយមានជ័យ កាលពីថ្ងៃទី១២ ខែវិច្ឆិកា ឆ្នាំ២០២៥ ដែលបណ្តាលឱ្យមានមនុស្សម្នាក់ស្លាប់ និងបីនាក់រងរបួស។ 

អង្គការអ្នកប្រជាធិបតេយ្យនិយមកណ្តាលអន្តរជាតិ (CDI–IDC) បានថ្កោលទោសយ៉ាងខ្លាំងចំពោះសកម្មភាពមិនសមស្របនេះ និងអំពាវនាវឱ្យថៃគោរពសន្ធិសញ្ញាសន្តិភាព និងធម្មនុញ្ញអន្តរជាតិ។

អង្គការនេះក៏បានអំពាវនាវឱ្យថៃ ដោះលែងជាបន្ទាន់ និងដោយគ្មានលក្ខខណ្ឌ ទាហានកម្ពុជាចំនួន ១៨នាក់ ដែលត្រូវបានចាប់ខ្លួននៅថ្ងៃទី២៩ ខែកក្កដា ឆ្នាំ២០២៥, បញ្ឈប់ការរំលោភច្បាប់មនុស្សធម៌អន្តរជាតិ និងច្បាប់សង្គ្រាម, សហការក្នុងការដោះគ្រាប់ UXO ក្រោយជម្លោះ ដើម្បីធានាសុវត្ថិភាពប្រជាពលរដ្ឋ, CDI–IDC បានហៅឱ្យសហគមន៍អន្តរជាតិ ជួយស្ដារឡើងវិញតំបន់បេតិកភណ្ឌពិភពលោករបស់យូណេស្កូ និងបេតិកភណ្ឌវប្បធម៌ផ្សេងទៀត ក្នុងតំបន់ដែលរងការខូចខាតពីការបាញ់កាំភ្លើងធំ និងគ្រាប់បែកអាកាស ក្នុងអំឡុងជម្លោះ។ ក៏ដូចជាអំពាវនាវឱ្យមានការស៊ើបអង្កេតពេញលេញចំពោះការបំផ្លិចបំផ្លាញទាំងនេះ។

ចុងបញ្ចប់ CDI–IDC បានអំពាវនាវដល់គណបក្សនយោបាយ និងដៃគូលើសកលលោកឱ្យមានសម្លេងរួម ក្នុងការជំរុញសន្តិភាព ស្ថិរភាព និងវឌ្ឍនភាព តាមគោលការណ៍នៃអង្គការសហប្រជាជាតិ និងសន្ធិសញ្ញាអន្តរជាតិទាំងអស់៕