ភ្នំពេញ៖ អគ្គនាយកអង្គភាព «ស៊ីម៉ាក់»  លោក ហេង រតនា នៅថ្ងៃអាទិត្យ ទី៣០ ខែវិច្ឆិកានេះ បានលើកឡើងថា ភាថៃ បានបំពងសំឡេងវាយប្រហារលាបពណ៌មកលើកម្ពុជា ថា “ជនជាតិចិនលួចឆ្លងដែនពីកម្ពុជាទៅថៃ” និងជាពិសេស ចោទប្រកាន់ថា “កម្ពុជាមិនសហកាដោះមីនតាមបណ្តោយព្រំដែនជាដើម...”។ ពាក់ព័ន្ធករណីនេះ ស៊ីម៉ាក់ បានបញ្ជាក់ថា ចំណុចដែលជនជាតិចិនជាន់មីនរបួស នៅក្នុងចំការមីនលេខ BS:22575 ក្បែរបង្គោលសីមាលេខ៤៨ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

អគ្គនាយកស៊ីម៉ាក់ បានលើកឡើងថា បញ្ហាផ្ទុះគ្រាប់មីនប្រឆាំងមនុស្សរបួសដាច់ជើងម្ខាង និងរងរបួសដៃ ព្រមទាំងផ្ទៃមុខ ជនជាតិចិនម្នាក់ ភេទប្រុស វេលាម៉ោងប្រមាណ ៣និង២០នាទីព្រឹកទៀបភ្លឺ នៅថ្ងៃទី២៩ ខែវិច្ឆិកា ឆ្នាំ២០២៥ នៅភូមិសាស្រ្តចម្ការមីនកម្ពុជា លេខ BS:22575 ក្បែរបង្គោលសីមាលេខ ៤៨ ស្ថិតនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ 

លោកបានបន្ថែមថា ក្រោយឧបទ្ទវហេតុគ្រោះថ្នាក់ផ្ទុះមីនជនជាតិចិនម្នាក់នេះភ្លាម ខាងភាគីថៃ បានបំពងសំឡេងវាយប្រហារលាបពណ៌កម្ពុជា ថា “ជនជាតិចិនលួចឆ្លងដែនពីកម្ពុជាទៅថៃ” និងជាពិសេស ចោទប្រកាន់ថា “កម្ពុជាមិនសហកាដោះមីនតាមបណ្តោយព្រំដែនជាដើម...”។ ដោយការចោទប្រកាន់ទាំងឡាយនោះ បានបន្សល់នូវចម្ងល់ និងភស្តុតាងមួយចំនួនគួរពិចារណាស្វែងយល់ការពិតយ៉ាងច្រើន។ 

លោក ហេង រតនា បានបញ្ជាក់ថា “តំបន់នេះជាចម្ការមីនចាស់របស់កម្ពុជា សំណល់សង្គ្រាមដោយមានភស្តុតាងច្បាស់លាស់ទាំងប្រភេទគ្រាប់មីន ភូមិសាស្ត្រមានទំនប់ជីក មានលេណដ្ឋានកងទ័ពមានរបងបន្លាលួសចាស់ និងជាព្រៃក្រាស់។ ការដាក់គ្រាប់មីនបានកើតឡើងតាំងពីក្នុងពាក់កណ្តាលទសវត្សរ៍១៩៨០ដល់ដើមទសវត្សរ៍១៩៩០”។ 

ករណីផ្ទុះមីនជនជាតិចិនម្នាក់នេះ ធ្វើឱ្យមនុស្សម្នាទាំងឡាយនឹកឃើញព្រឹត្តិការណ៍ប្រវត្តិសាស្ត្រដែលទាហ៊ានថៃបានដឹកជនភៀសខ្លួនកម្ពុជា ដែលមានឯកសារខ្លះបានបញ្ជាក់ថា “មានចំនួនប្រមាណជាង ៤៣.០០០នាក់ មានទាំងទារក ក្មេង ចាស់ ប្រុស ស្រី យកមកចាក់ចោលនៅតំបន់ភ្នំខ្មោច ដោយបង្ខំឱ្យដើរឆ្លងកាត់ចម្ការមីនមកកម្ពុជាវិញ បណ្តាលឱ្យជាន់គ្រាប់មីនរបួស និងស្លាប់យ៉ាងច្រើន”។ 

លោក ហេង រតនា បានបញ្ជាក់ថា អ្នកខ្លះមានចម្ងល់ថា “ថៃតែងតែជាន់មីនថ្មី ហេតុអ្វីចិនជាន់មីនចាស់? 

នេះជារឿងរ៉ាវប្រវត្តិសាស្ត្រត្រូវតែរំលឹកចងចាំ និងមិនអាចបំភ្លេចបាន”៕