(កែប) ៖   កាលពីរសៀលថ្ងៃទី ១៨ ខែតុលា ឆ្នាំ២០២៣ លោក អៀង ក្អូន ប្រធានសាខាពន្ធដារខេត្តកែបបានបង្ហាញទិន្ននយ័នៅក្នុងកិច្ចប្រជុំឆ្លុះបញ្ចាំង អំពីលទ្ធផលនៃការប្រមូលពន្ធក្នុងរយៈពេល ៩ខែ ដេីមឆ្នាំ២០២៣ និងទិសដៅអនុវត្តបន្ត ដែលប្រព្រឹត្តទៅក្រោមអធិបតីភាព លោក អុឹម បញ្ញារិទ្ធិ អភិបាលរងនៃគណៈអភិបាលខេត្តកែប នៅសាលប្រជុំសាខាពន្ធដារខេត្ត។

លោក អៀង ក្អូន បានបញ្ជាក់ថា ចំណូលពន្ធរយៈពេល ៩ខែ ដេីមឆ្នាំ២០២៣ នេះ ធៀបទៅនឹងរយៈពេលដូចគ្នា ឆ្នាំ២០២២ មានការថយចុះចំនួន ៤,៩៤៩,១២៦,៣៧៨ រៀល ស្មើនឹង -៤១.៦២% បញ្ហាទាំងនេះដោយសារតែកើតមានឡើងសង្គ្រាមរវាង អ៊ុយ ក្រែន និងរុស្ស៊ី ដែលធ្វើអោយប៉ះពាល់ដល់សេដ្ឋកិច្ចសកល និងកម្ពុជារបស់យើងផងដែរ។

បើទោះជាយ៉ាងនេះក្តី លោក អ៉ឹម បញ្ញារិទ្ធិ មានប្រសាសន៍កោតសរសើរ និងលើកទឹកចិត្តអោយមន្ត្រីពន្ធដារ ត្រូវខិតខំបន្តផ្សព្វផ្សាយ និងពង្រឹងការអនុវត្ត សារាចរណែនាំ ស្តីពី ការអនុវត្តច្បាប់ ស្តីពី ហិរញ្ញវត្ថុ សម្រាប់ការគ្រប់គ្រងឆ្នាំ២០២៣ និងបន្តអនុវត្ត ដោយយកចិត្តទុកដាក់ នូវយុទ្ធសាស្ត្រ កៀរគរចំណូល ២០១៩-២០២៣ ដើម្បីសម្រេចបាននៅលទ្ធផលប្រមូលចំណូលពន្ធអោយអស់សក្តានុពល និងកាន់តែមានប្រសិទ្ធភាព។

ជាមួយគ្នានេះ លោក មុឹម បញ្ញារិទ្ធិអភិបាលរងខេត្ត ក៏បានផ្តល់អនុសាសន៍ជូនដល់ថ្នាក់ដឹកនាំ មន្ត្រីសាខាពន្ធដាខេត្ត មន្ទីរអង្គភាពជុំវិញខេត្ត និងអាជ្ញាធរពាក់ព័ន្ធ នូវចំណុចមួយចំនួនដូចខាងក្រោម៖
១-ថ្នាក់ដឹកនាំ និងមន្ត្រីនៃសាខាពន្ធដារខេត្ត ត្រូវអនុវត្តតាមយុទ្ធសាស្ត្រណែនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានថ្លែងក្នុងពិធីសំណេះសំណាលជាមួយបងប្អូនកម្មករ និយោជក និយោជិក នៅរាជធានីភ្នំពេញកាលពីថ្ងៃទី៣ ខែតុលា ឆ្នាំ២០២៣ ។
-ពង្រឹងប្រសិទ្ធភាពនៃការផ្តល់សេវាជូនអ្នកជាប់ពន្ធនិងពង្រឹងការប្រើប្រាស់បច្ចេកវិទ្យាព័ត៌មានក្នុងការប្រមូលពន្ធ និងពង្រឹងក្រមសីលធម៌វិជ្ជាជីវៈមន្ត្រីពន្ធដារ។

២-ថ្នាក់ដឹកនាំ និងមន្ត្រីពន្ធដារ ត្រូវប្រកាន់ភ្ជាប់នូវគុនតម្លៃគោលការណ៍៣ សំខាន់ៗ
-រដ្ឋបាលកិច្ចល្អប្រកាន់ភ្ជាប់នូវភាពជាអ្នកដឹកនាំ គុណាធិបតេយ្យ ដែលសំដៅលើគណនេយ្យភាព សមត្ថភាព ការខិតខំប្រឹងប្រែង និងលទ្ធផលការងារអ្នកចូលរួមអនុវត្តទាំងអស់ត្រូវមានឆន្ទៈ មុះមុត ការបោះបង់ មានភាពទទួលខុសត្រូវខ្ពស់ សំដៅអនុវត្តការងារក្នុងស្មារតី បុរេសកម្ម និងតម្កល់ផលប្រយោជន៍ជាតិ និងអង្គភាពជាធំ។

-មន្ទីរអង្គភាពនានា និងរដ្ឋបាលគ្រប់ថ្នាក់ ត្រូវផ្តល់កិច្ចសហការ និងគាំទ្រវិធានការនានារបស់រដ្ឋបាលសារពើពន្ធ ធ្វើយ៉ាងណាអោយការប្រមូលចំណូលពន្ធសម្រេចបានតាមផែនការកំណត់។

ទន្ទឹមជាមួយនោះ លោក អ៉ឹម បញ្ញារិទ្ធិ អភិបាលរងខេត្តកែប បានអំពាវនាវដល់អ្នកជាប់ពន្ធទាំងអស់សូមស្មគ្រចិត្តមកបំពេញកាតព្វកិច្ចសារពើពន្ធ ស្រមតាមច្បាប់កំណត់ជៀសវាងមានការអនុវត្តដោយបង្ខំ ដែលអាចធ្វើអោយប៉ះពាល់ដល់កិត្តិយសសេចក្តីថ្លៃថ្នូ និងមុខរបរផ្សេងៗជាដើម។(សឹង រ៉ាត់)