ភ្នំពេញ៖ នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ បានបង្ហាញលេខទូរសព្ទទំនាក់ទំនងទាន់ហេតុការណ៍សម្រាប់ប្រជាពលរដ្ឋ សុំជំនួយពេលមាន បទល្មើស ឬករណីបាត់មនុស្ស ពេលដើរលេងកម្សាន្ដក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នាថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣ ខាងមុខនេះ។

សម្រាប់លេខទូរសព្ទសម្រាប់ទំនាក់ទំនងទាំង ៥ខ្សែរ រួមមាន៖ 016 266 522 / 012 976 262 / 097 818 6262 / 023 725 306 / 023 725 161។
អគ្គស្នងការនគរបាលជាតិ បានបញ្ជាក់ថា ក្នុងករណីប្រជាពលរដ្ឋ ដែលមកដើរលេងកម្សាន្ដ ហើយជួបប្រទះនូវបទល្មើសណាមួយកើតឡើង ឬបាត់សមាជិកគ្រួសារ សូមទំនាក់ទំនងទៅលេខទូរសព្ទខាងលើ ដើម្បីសមត្ថកិច្ចជួយអន្ដរាគមន៍ភ្លាមៗ។

ជាមួយគ្នានេះ នាយកដ្ឋាននគរបាលព្រហ្មទណ្ឌ សូមអំពាវនាវដល់ប្រជាពលរដ្ឋទាំងអស់ បង្កើននូវការប្រុងប្រយ័ត្នឲ្យបានខ្ពស់នៅពេលដើរកម្សាន្ដទាំងសម្ភារៈមានតម្លៃ និងសមាជិកក្រុមគ្រួសារជាដើម ខណៈកម្លាំងសមត្ថកិច្ចត្រូវបានពង្រាយគ្រប់គោលដៅដើម្បីការពារសន្ដិសុខ សណ្ដាប់ធ្នាប់ និងសុវត្ថិភាព ក្នុងបុណ្យជាតិដ៏សំខាន់មួយនេះ៕