ព្រះវិហារ៖ ក្រោមការដឹកនាំ និងគំនិតផ្តួចផ្តើមរបស់ លោក គីម រិទ្ធី អភិបាលខេត្ត បានរៀបចំកម្មវិធីប្រកួតកីឡាបាល់ទះ បុរស នារី ក្រោមប្រធានបទ «លេងកីឡា ដើម្បីសន្តិភាព» ដែលមានគោលបំណង 

ដេីម្បីលើកកម្ពស់សុខភាព និងបង្កើតទំនាក់ទំនងល្អក្នុងចំណោមជនភៀសខ្លួន ។ 

កម្មវិធីនេះបានប្រារព្ធធ្វើឡើងសម្រាប់ជនភៀសខ្លួន និងក្រុមការងារ ដែលកំពុងស្នាក់នៅ និងបំពេញការងារក្នុងមណ្ឌលសុវត្ថិភាពវត្តពោធិ៍ ៥០០០ដើម ស្ថិតនៅភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។ 

ការប្រកួតនេះធ្វេីឡេីងក្នុងបរិវេណមណ្ឌលសុវត្ថិភាព ដែលមានក្រុមចូលរួមសរុបចំនួន ១៤ក្រុម ក្នុងនោះមានបាល់ទះបុរស ១០ក្រុម និងបាល់ទះនារី ៤ក្រុម និងចែកជា ២ ដំណាក់កាល៖ 

ដំណាក់កាលទី ១ (វគ្គជម្រុះ): ធ្វើនៅថ្ងៃទី៣១ ខែសីហា ឆ្នាំ២០២៥ ដើម្បីស្វែងរកក្រុមបុរស ដែរឈ្នះចំនួន៤ក្រុម និងនារីចំនួន ៤ក្រុម ដែលមានសមត្ថភាពអាចបន្តទៅកាន់វគ្គផ្តាច់ព្រ័ត្រ។ 

ដំណាក់កាលទី ២ (វគ្គផ្តាច់ព្រ័ត្រ): ធ្វេីឡេីងនៅថ្ងៃទី០១ ខែកញ្ញាឆ្នាំ២០២៥ ដោយមានការចូលរួមទាំងបាល់ទះបុរស និងបាល់ទះនារី ដែលបានជាប់នៅក្នុងវគ្គជម្រុះ។ វគ្គនេះធ្វើឡើងដើម្បីប្រកួតយក ជ័យលាភីលេខ ១ ដល់លេខ ៣ (ទាំងបាល់ទះបុរស និងបាលទះនារី សរុប ៦ក្រុម)៕