ភ្នំពេញ៖ នាព្រឹកថ្ងៃទី៣១ ខែសីហា ឆ្នាំ២០២៥នេះ លោកស្រី ដាំ ដារីនី អនុប្រធានសហភាពសហព័ន្ធយុវជនកម្ពុជា តំណាងលោក ហ៊ុន ម៉ានី ប្រធាន ស.ស.យ.ក. បានអញ្ជើញជាអធិបតីក្នុងកម្មវិធី «រត់រួមគ្នា ដើម្បីកុមារអូរទីស្សឹម/Rise for Autisum Fun Run» រៀបចំដោយសភាយុវពាណិជ្ជករអន្តរជាតិកម្ពុជា សាខាចតុមុខ (JCI Chaktomuk) នៅអាគារ Connexion កោះពេជ្រ។ 

ពិធីនេះមានការអញ្ជើញចូលរួមពីសំណាក់ លោកស្រី ជា ម៉ីលី អនុប្រធានប្រតិបត្តិថ្នាក់តំបន់នៃ JCI ចតុមុខ លោកវិល្លាម លឹម ប្រធាន JCI ថ្នាក់តំបន់ប្រចាំឆ្នាំ២០២៥ លោក សាំង តារារស្មី ប្រធានថ្នាក់ជាតិនៃ JCI Cambodia លោកចាន់ សារិន នាយកសាលាអប់រំពិសេសក្រុងតាខ្មៅ ព្រមទាំងលោកគ្រូ អ្នកគ្រូ មាតាបិតា ប្អូនៗកុមារ និងសាធារណៈជនជាច្រើនរូប។

ថ្លែងប្រសាសន៍ក្នុងពិធីនេះ លោកស្រី ដារីនី បានសម្ដែងសេចក្ដីសោមនស្សរីករាយ និងនាំយកបណ្តាំផ្ញើសាកសួរសុខទុក្ខ របស់ លោក ហ៊ុន ម៉ានី ជូនថ្នាក់ដឹកនាំ និងក្រុមការងារ JCI   លោកនាយក លោកក្រូអ្នកគ្រូ សាលាអប់រំពិសេស  មាតាបិតា និងប្អូនៗកុមារសឹមដែលមានវត្តមានក្នុងពិធីនេះ។ លោកស្រីបានបន្តថា កម្មវិធីរត់រួមគ្នាដើម្បីកុមារអូរទីស្សឹម/Rise for Autisum Fun Run គឺជាកម្មវិធីដ៏មានអត្ថន័យសំខាន់លើសពីការរត់ ប៉ុន្តែ គឺជាឱកាសមួយនៃការផ្សារភ្ជាប់ទំនាក់ទំនងការបង្កើនភាពស្និតស្នាលជាមួយប្អូនៗកុមារអូទីស្សឹម តាមរយៈលើកកម្ពស់ការគាំទ្រ និងផ្ដល់កម្លាំងចិត្ត និង ការពារពីការរើសអើងក្នុងសង្គម។ 

ទន្ទឹមគ្នានោះលោកស្រីបានគូសបញ្ជាក់ថា «ប្អូនៗកុមារអូទីហ្សឹម មានក្តីសុបិន សមត្ថភាព ទេពកោសល្យ និងការយល់ឃើញដែលអាចបង្រៀនយើងឱ្យឃើញភាពស្រស់ស្អាតនៅក្នុងអ្វីតូចតាចបំផុត។ ដូចនេះ ប្អូនៗស័ក្តិសមនឹងទទួលបានការគាំទ្រ និងឱកាសស្មើគ្នាដូចប្អូនៗដទៃទៀតដែរ»៕