ព្រះសីហនុ៖ ដូចការគ្រោងទុក នាវាចម្បាំង «HMAS Ballarat- FFH 155» របស់កងទ័ពជើងទឹកអូស្ត្រាលី ផ្ទុកនាវិក សរុបចំនួន ១៩២ នាក់ បានចូលសំចតនៅកំពង់ផែស្វយ័តក្រុងព្រះសីហនុ នាព្រឹកថ្ងៃសុក្រ ទី១០ តុលា ឆ្នាំ២០២៥ ដើម្បីពង្រឹងកិច្ចសហប្រតិបត្តិការរវាងកងទ័ពជើងទឹកកម្ពុជា និងអូស្រ្តាលី ឱ្យកាន់តែល្អប្រសើរបន្ថែមទៀត។

នាវាចម្បាំង HMAS Ballarat (FFH 155) គឺជានាវាបម្រើការរបស់ កងទ័ពជើងទឹកអូស្ត្រាលី (Royal Australian Navy) ដែលមានសមត្ថភាពប្រយុទ្ធពហុបំណង និងការពារសមុទ្រកម្រិតខ្ពស់។ នាវានេះស្ថិតក្នុងប្រភេទ Anzac-class frigate ហើយត្រូវបានដាក់បម្រើការផ្លូវការតាំងពីឆ្នាំ២០០៤។

នាវា HMAS Ballarat ត្រូវបានសាងសង់នៅទីក្រុង Williamstown រដ្ឋ Victoria ប្រទេសអូស្ត្រាលី។ វាមានទំងន់សរុបប្រហែល ៣,៦០០ តោន ប្រវែងជិត ១១៨ ម៉ែត្រ ហើយអាចធ្វើដំណើរបានល្បឿនអតិបរមាប្រហែល ៥០ គីឡូម៉ែត្រក្នុងមួយម៉ោង។ 

ចំពោះសមត្ថភាពប្រយុទ្ធរបស់នាវា HMAS Ballarat រួមមាន កាំជ្រួចប្រឆាំងយន្តហោះ ប្រភេទ Mk 41 Vertical Launch System, កាំជ្រួចប្រឆាំងនាវា Harpoon, កាំភ្លើងធំ ១២៧ មម, ប្រព័ន្ធការពារអាកាស Phalanx CIWS និងឧបករណ៍បាញ់ទ័ពក្រោមទឹក។ លើសពីនេះ វាក៏អាចផ្ទុកយន្តហោះ MH-60R Seahawk សម្រាប់បេសកកម្មសមុទ្រ និងការត្រួតពិនិត្យផងដែរ។

នាវា HMAS Ballarat បានចូលរួមក្នុងបេសកកម្មអន្តរជាតិដូចជា Operation MANITOU ដើម្បីរក្សាសន្តិសុខសមុទ្រនៅតំបន់មជ្ឈឹមបូព៌ា និងបានចូលរួមក្នុងសកម្មភាពសហប្រតិបត្តិការជាមួយប្រទេសមិត្តរួមក្នុងតំបន់អាស៊ីប៉ាស៊ីហ្វិក។ វាក៏បានចូលរួមជួយសង្គ្រោះមនុស្សធម៌ និងការបណ្តុះសមត្ថភាពសមុទ្រផងដែរ។
HMAS Ballarat ត្រូវបានដាក់ឈ្មោះតាមទីក្រុង Ballarat នៅរដ្ឋ Victoria ដែលជាទីក្រុងមានប្រវត្តិសាស្ត្រសំខាន់ក្នុងប្រទេសអូស្ត្រាលី។