ការបំផ្ទុះគ្រាប់បែកអត្តឃាតមួយ បានសម្លាប់មនុស្សយ៉ាងហោចណាស់ ចំនួន ៣១នាក់ និងបង្ករឲ្យរងរបួសជិត ១៧០នាក់ អំឡុងពេលប្រជុំបួងសួងថ្ងៃសុក្រ នៅវិហារអ៊ីស្លាមនិកាយស៊ីអ៊ីតមួយ ក្នុងរដ្ឋធានីអ៊ីស្លាមាបាដ ប្រទេសប៉ាគីស្ថាន។ នេះបើតាមការបញ្ជាក់ពីមន្ត្រីប៉ូលិស និងអាជ្ញាធររដ្ឋាភិបាលនៃប្រទេសនេះ។

រូបភាពពីកន្លែងកើតហេតុ បង្ហាញឲ្យឃើញសាកសព និងអ្នករងរបួសរដូករណែលលើកម្រាលវិហារ ក្បែរបំណែកកញ្ចក់ សំណល់បាក់បែក និងសភាពភ័យស្លន់ស្លោរបស់អ្នកចូលរួមបួងសួង។ អ្នករងរបួសជាច្រើននាក់ផ្សេងទៀត ត្រូវបានឃើញដេកនៅក្នុងសួនច្បារនៃវិហារ Khadija Tul Kubra Imambargah ស្ថិតនៅតំបន់ជាយក្រុងអ៊ីស្លាមាបាដ ខណៈមនុស្សជុំវិញកំពុងហៅរកជំនួយ។

ការបំផ្ទុះគ្រាប់បែកដែលកើតឡើងដ៏កម្រ នៅក្នុងរដ្ឋធានីដែលមានការពារសន្តិសុខយ៉ាងតឹងរឹងនេះ ប៉ុន្តែប៉ាគីស្ថានបានប្រឈមមុខនឹងរលកអំពើហិង្សាកើនឡើងក្នុងប៉ុន្មានឆ្នាំចុងក្រោយ។ 

លោក Irfan Memon អភិបាលរងទីក្រុងអ៊ីស្លាមាបាដ បានថ្លែងក្នុងសេចក្តីប្រកាសថា៖ «ចំនួនអ្នកស្លាប់ពីការផ្ទុះបានកើនឡើងដល់ ៣១ នាក់ ខណៈអ្នករងរបួសដែលត្រូវបានបញ្ជូនទៅមន្ទីរពេទ្យកើនដល់ ១៦៩នាក់»។

មន្ត្រីប៉ូលិសពីររូប បានឱ្យដឹងថា ជនវាយប្រហារត្រូវបានបញ្ឈប់នៅច្រកចូលវិហារ មុនពេលបំផ្ទុះគ្រាប់បែក ប៉ុន្តែពួកគេស្នើសុំមិនបង្ហាញអត្តសញ្ញាណ ព្រោះមិនមានសិទ្ធិផ្តល់ព័ត៌មានទៅសារព័ត៌មាន។

សហគមន៍ស៊ីអ៊ីត ដែលជាជនភាគតិចក្នុងប្រទេសដែលភាគច្រើនជាមូស្លីមនិកាយស៊ុននី មានប្រជាជនប្រមាណ ២៤១លាននាក់ ធ្លាប់ជាគោលដៅនៃអំពើហិង្សាផ្នែកនិកាយ។ កាលពីថ្ងៃទី១១ ខែវិច្ឆិកា ការបំផ្ទុះគ្រាប់បែកអត្តឃាតមួយ នៅអ៊ីស្លាមាបាដ បានសម្លាប់មនុស្ស ១២ នាក់ និងបង្ករឲ្យរងរបួស ២៧ នាក់ ដែលអាជ្ញាធរប៉ាគីស្ថានអះអាងថា ធ្វើឡើងដោយជនជាតិអាហ្វហ្គានីស្ថាន ខណៈមិនមានក្រុមណាមួយចេញមុខទទួលខុសត្រូវចំពោះហេតុការណ៍នេះឡើយ៕