កណ្តាល៖ មុខសញ្ញាជនសង្ស័យជាក្រុមចោរជំនាញខាងលួចកុងទ័រទឹក និងអ្នកទទួលទិញ ត្រូវបានកម្លាំងសមត្ថកិច្ចបង្ក្រាប ឃាត់ខ្លួនសរុបចំនួន ០៥ នាក់ កសាងសំណុំរឿងបញ្ជូនទៅកាន់តុលាការ ដើម្បីចាត់ការតាមផ្លូវច្បាប់។

ដោយអនុវត្តតាមបទបញ្ជារបស់ លោកឧត្តមសេនីយ៍ទោ ឈឿន សុចិត្ត ស្នងការ នៃស្នងការដ្ឋាននគរបាលខេត្តកណ្តាល នៅព្រឹកថ្ងៃទី០៣ ខែមករា ឆ្នាំ២០២៥ កម្លាំងនគរបាលនៃអធិការដ្ឋាននគរបាលក្រុងតាខ្មៅ ដឹកនាំបញ្ជាដោយលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ផ្នែកនគរបាលព្រហ្មទណ្ឌក្រុងតាខ្មៅ សហការជាមួយ ប៉ុស្តិ៍នគរបាលរដ្ឋបាលតាខ្មៅ ក្រោយទទួលបណ្តឹងពីប្រជាពលរដ្ឋ អំពីករណីចោរតែងលួចកាច់កុងទ័រទឹករបស់ពួកគាត់។

ក្រោយទទួលការរាយការណ៍នគរបាលក្រុងតាខ្មៅចុះស្រាវជ្រាវឆែកកាមេរ៉ាសុវត្ថិភាពក្បែរកន្លែងកើតហេតុ កំណត់មុខសញ្ញាជនសង្ស័យបាន ទើបឈានដល់ការចុះបង្ក្រាបឃាត់ខ្លួនជនសង្ស័យបាន ចំនួន ០៥ នាក់ ក្នុងនោះ ចំនួន ០១ នាក់ ពាក់ព័ន្ធអំពើរចោរកម្ម ចំនួន ០១ នាក់ទៀត ពាក់ព័ន្ធអំពើរទទួលផលចោរកម្ម រួមនឹង ចំនួន ០៣ នាក់ទៀត ជាអ្នកសមគំនិតក្នុងអំពើលួច និងប្រើប្រាស់ខុសច្បាប់នូវសារធាតុញៀន។ បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលក្រុងតាខ្មៅ ដើម្បីកសាងសំណុំរឿងចាប់បញ្ជូនទៅតុលាការ ចាត់ការតាមនីតិវិធី៕