ក្រចេះ៖ ព្រឹកថ្ងៃអង្គារ ទី២០ ខែមករា ឆ្នាំ២០២៦ លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អមដំណើរដោយ លោក ហឿ ស៊ីយ៉ែម ប្រធានក្រុមប្រឹក្សាខេត្ត និង លោក វ៉ា ថន អភិបាលខេត្តក្រចេះ បានអញ្ជើញចូលរួមក្នុងពិធីផ្តល់វិញ្ញាបនបត្រសម្គាល់កម្មសិទ្ធិសមូហភាព ជូនសហគមន៍ជនជាតិដើមភាគតិច “ក្រោល” ស្ថិតនៅភូមិស្រែជិះ ឃុំស្រែជិះ ស្រុកអូរគ្រៀងសែនជ័យ។

ក្នុងឱកាសនោះ លោកឧបនាយករដ្ឋមន្ត្រី សាយ សំអាល់ បានគូសបញ្ជាក់ថា ការផ្តល់វិញ្ញាបនបត្រកម្មសិទ្ធិសមូហភាពជូនសហគមន៍ជនជាតិដើមភាគតិច គឺជាគោលនយោបាយសំខាន់របស់រាជរដ្ឋាភិបាល ក្នុងការធានាសិទ្ធិកាន់កាប់ដីធ្លី និងការពារទ្រព្យសម្បត្តិប្រពៃណីរបស់ជនជាតិដើមភាគតិច ស្របតាមច្បាប់ និងគោលការណ៍អភិវឌ្ឍន៍ប្រកបដោយចីរភាព។

លោកបានលើកឡើងថា កម្មសិទ្ធិសមូហភាពមិនត្រឹមតែជាការធានាសិទ្ធិផ្លូវច្បាប់ប៉ុណ្ណោះទេ ប៉ុន្តែថែមទាំងជាមូលដ្ឋានសំខាន់សម្រាប់ការអភិរក្សវប្បធម៌ ប្រពៃណី និងការរស់នៅរបស់សហគមន៍ជនជាតិដើមភាគតិចឲ្យមានស្ថិរភាព និងភាពរឹងមាំក្នុងអនាគត។

ជាមួយគ្នានេះ លោក ហឿ ស៊ីយ៉ែម និង លោក វ៉ា ថន បានសម្តែងការស្វាគមន៍ និងវាយតម្លៃខ្ពស់ចំពោះការគាំទ្ររបស់ក្រសួងរៀបចំដែនដី នគរូបនីយកម្ម និងសំណង់ ដែលបានជួយជំរុញដំណើរការចុះបញ្ជីដីធ្លីសមូហភាព ឲ្យសហគមន៍ជនជាតិដើមភាគតិចក្នុងខេត្តក្រចេះ ទទួលបានសិទ្ធិកាន់កាប់ដីធ្លីយ៉ាងច្បាស់លាស់ និងស្របច្បាប់។

តំណាងសហគមន៍ជនជាតិដើមភាគតិច “ក្រោល” ក៏បានសម្តែងក្តីអំណរគុណយ៉ាងជ្រាលជ្រៅចំពោះរាជរដ្ឋាភិបាល និងអាជ្ញាធរពាក់ព័ន្ធ ដែលបានយកចិត្តទុកដាក់លើបញ្ហាសិទ្ធិកាន់កាប់ដីធ្លី និងជួយធានាឲ្យសហគមន៍អាចបន្តរស់នៅ និងអភិវឌ្ឍជីវភាពប្រកបដោយសុវត្ថិភាព និងភាពចីរភាព។

ពិធីនេះត្រូវបានចាត់ទុកថា ជាជំហានសំខាន់មួយក្នុងការពង្រឹងការគ្រប់គ្រងដីធ្លី ការពារសិទ្ធិជនជាតិដើមភាគតិច និងលើកកម្ពស់ការអភិវឌ្ឍសង្គមសេដ្ឋកិច្ចនៅតំបន់ជនបទក្នុងខេត្តក្រចេះ៕