ខេត្តប៉ៃលិន÷ នាព្រឹកថ្ងៃទី១៥ ខែមករា ឆ្នាំ២០២៥ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ និងលោកជំទាវ ជា ផល្គុន បានដឹកនាំឯកឧត្តមលោកជំទាវជាប្រតិភូអមដំណើរ បានអញ្ជើញជួបសំណេះសំណាល សួរសុខទុក្ខ និងចែកអំណោយជូនគ្រួសារអតីតយុទ្ធជន និងជនមានពិការភាពនៅខេត្ត ដោយមានការអញ្ជើញចូលរួមពីឯកឧត្តម ហុក សុផល អភិបាលរង ជាតំណាងដ៏ខ្ពង់ខ្ពស់លោកជំទាវបណ្ឌិត បាន ស្រមុំ អភិបាលខេត្ត ព្រមទាំងមន្ទីរជំនាញជុំវិញខេត្ត អាជ្ញាធរមូលដ្ឋាន គ្រួសារអតីតយុទ្ធជន និងជនមានពិការភាព ជាច្រើនរូប។

ក្នុងឱកាសនោះឯកឧត្តមរដ្ឋមន្ត្រី ជា សុមេធី បានមានប្រសាសន៍ពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនចំពោះបងប្អូនជាអតីតយុទ្ធជនទាំងអស់នៅក្នុងខេត្តប៉ៃលិន។

ឯកឧត្តមរដ្ឋមន្ត្រី មានប្រសាសន៍គូសបញ្ជាក់ថា៖ ដោយសារសង្រ្គាមជាច្រើនទស្សវត្សរវាងខ្មែរ និងខ្មែរ ធ្វើឱ្យប្រជាពលរដ្ឋ និងកងកម្លាំងពីគ្រប់ភាគីត្រូវស្លាប់ របួស ពិការ បន្សល់ទុកនូវស្រ្តីមេម៉ាយ កុមារកំព្រារ ដែលទាំងអស់នេះជាបន្ទុកដែលរាជរដ្ឋាភិបាលត្រូវគិតគូរដោះស្រាយ ។ ក្រោយនយោបាយឈ្នះឈ្នះរបស់សម្ដេចអគ្គមហាសេនាបតីតេជោ ហ៊ុន សែន អតីតជានាយករដ្ឋមន្រ្តី បានធ្វើឱ្យប្រទេសជាតិទាំងទទួលបាននូវសុខសន្តិភាព នៅថ្ងៃទី២៩ ខែធ្នូ ឆ្នាំ២១៩៩៨ ដែលជាដើមចម និងជាឱកាសសម្រាប់ការអភិឌ្ឍន៏ប្រទេសជាតិឱ្យមានការ​ឈានឡើងលើគ្រប់វិស័យ​ដូចពេលបច្ចុប្បន្ននេះ ។ 

ឯកឧត្តមបន្តថា ចំពោះលោកយាយលោកតា បងប្អូនដែលជាអតីតយុទ្ធជន គឺជាអ្នកដែលមានគុណបំណាច់ដ៏ថ្លៃថ្លាចំពោះជាតិមាតុភូមិ ដែលបានលះបង់គ្រប់បែបយ៉ាងរួមទាំងអាយុជីវិត ជាការឆ្លើយតប​នឹងគុណ​បំណាច់នេះរាជរដ្ឋាភិបាលនីតិកាលអាណត្តិទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាបានយក បានផ្តោតការយកចិត្តទុកដាក់យ៉ាងខ្លាំង ដោយបានដាក់ឲ្យអនុវត្តគោលនយោបាយជាតិចំពោះអតីតយុទ្ធជន ការផ្តល់នូវរបបសន្តិសុខសង្គម និងការអនុវត្តគម្រោងកម្មវិធីនានា ដើម្បីលើកកម្ពស់ជីវភាពរស់នៅរបស់បងប្អូនអតីតយុទ្ធជនឱ្យកាន់តែប្រសើរឡើង។

ជាមួយគ្នានេះដែរឯកឧត្តមរដ្ឋមន្ត្រី បានលើកទឹកចិត្តដល់បងប្អូនជនមានពិការភាព សូមកុំឱ្យបងប្អូនមានការបាក់ទឹកចិត្ត ព្រោះថាក្រសួងកំពុងតែយកចិត្តទុកដាក់ក្នុងការជួយបងប្អូនជនមានពិការភាព ដែលមានសមត្ថភាពត្រូវបានយកចិត្តទុកដាក់ និងលើកទឹកចិត្តឱ្យចូលបម្រើការងារជាមួយស្ថាប័នរដ្ឋ និងឯកជន ដោយគ្មានការរើសអើង។

សូមបញ្ជាក់ថា៖ អំណោយដ៏ថ្លៃថ្លារបស់ ឯកឧត្តមរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ បានផ្តល់ជូនគ្រួសារអតីតយុទ្ធជន និងជនមានពិការភាពរួមមាន៖ អង្ករ ២៥គីឡូ ទឹកត្រី១យួរ-ទឹកស៊ីអ៊ីវ១យួរ -ត្រីខ១០កំប៉ុង -មី ១កេសតូច -អំបិល១កញ្ចប់-ស្កសរ១កញ្ចប់ និងថវិកាក្នុងម្នាក់ៗចំនួន ៤០ម៉ឺនរៀល៕

ដោយ÷ស សារឿន,