ថ្មីៗនេះ នៅប្រទេសឥណ្ឌាកំពុងតែផ្ទុះនូវជំងឺម្យ៉ាងដែលហៅថា ជំងឺខ្វិន។ 

យោងតាមរបាយការណ៍នៅឥណ្ឌាបានបង្ហាញឲ្យដឹងថា ក្មេងៗនៅប្រទេសឥណ្ឌាចំនួន ១៦០ នាក់ កំពុងតែកើតជំងឺខ្វិននេះ ដោយនៅក្នុងនោះក្មេងៗចំនួន ៥ នាក់ ត្រូវបានរាយការណ៍ថាបានស្លាប់ និង ៤៨ នាក់ទៀតកំពុងតែសម្រាកព្យាបាលយ៉ាងយកចិត្តទុកដាក់ ចំណែកក្មេងៗចំនួន ២១ នាក់កំពុងតែមានស្ថានភាពធ្ងន់ធ្ងរ ដោយត្រូវប្រើបំពង់ខ្យល់ដើម្បីដកដង្ហើម យោងតាមការចេញផ្សាយពីគេហទំព័រ  BBC News នាថ្ងៃទី ០៤ ខែ កុម្ភៈ ឆ្នាំ ២០២៥។

ជំងឺខ្វិន ឬ GBS មានរោគសញ្ញាដូចជា រមួលក្រពើ ឬស្ពឹកដៃនិងជើង បន្ទាប់មកវានឹងរាលដាលរហូតធ្វើឲ្យមានការចុះខ្សោយនៃសាច់ដុំ និងពិបាកក្នុងការធ្វើចលនាជាដើម។ 

ហើយរោគសញ្ញាកាន់តែអាក្រក់ទៅៗនោះ ចំពោះអ្នកដែលកើតជំងឺខ្វិននេះ រយៈពេល២ទៅ ៤ សប្ដាហ៍ ដៃនិងជើងនឹងពិបាកក្នុងការធ្វើចលនាឬលែងដំណើរការ។ 

ចំពោះអាត្រាមរណភាពដែលបានរាយការណ៍នៅប្រទេសឥណ្ឌា មានការប្រែប្រួលទៅតាមភាពធ្ងន់ធ្ងរនិងគុណភាពនៃការគាំទ្រនៃការថែទាំសុខភាព។

គួរបញ្ជាក់ឲ្យដឹងថា ជំងឺខ្វិន ឬ GBS នេះ បានកើតមានឡើងនៅប្រទេសឥណ្ឌាកាលពីខែមករា កន្លងទៅ នៅក្នុងទីក្រុង  Pune ដែលជាមជ្ឈមណ្ឌលអប់រំ និងព័ត៌មានវិទ្យាដែលប្រមូលផ្ដុំដោយទីក្រុងជាច្រើន និងភូមិឧស្សាហកម្មផងដែរ។ 

ហើយចំពោះការផ្ទុះឡើងនៅក្នុងទីក្រុង Pune កំពុងតែត្រូវបានតាមដានទៅលើភ្នាក់ងារបង្ករោគដែលហៅថា Campylobacter jejuni ដែលជាមូលហេតុឈានមុខគេនៃការឆ្លងមេរោគពីអាហារ និងជាកត្តាជម្រុញដ៏ធំបំផុតនៃ GBS នៅទូទាំងពិភពលោក។ 

ហើយចំពោះការរីករាលដាលនៃជំងឺនេះដែរ ត្រូវបានគេរកឃើញនៅក្នុងទសវត្សរ៍ឆ្នាំ ១៩៩០ នៅតំបន់ជនបទនៃប្រទេសចិន ដែលរោគនេះកើតមានជាទូទៅនៅក្នុងសត្វមាន់ ហើយវាកើតឡើងរៀងរាល់រដូវមូសុង នៅពេលដែលក្មេងៗលេងនៅក្នុងទឹកដែលកខ្វក់របស់សត្វមាន់ឬទាជាដើម។ 

ស្របគ្នានេះផងដែរ អាជ្ញាធរឥណ្ឌាក៏បានធ្វើការអំពាវនាវទៅដល់ប្រជាពលរដ្ឋរបស់ខ្លួនដើម្បីជៀសវាងនូវជំងឺខ្វិននេះ គឺត្រូវផឹកទឹកឆ្អិន និងបរិភោគអាហារស្រស់ និងស្អាត និងមិនត្រូវបរិភោគនូវសាច់ឆៅ ឬឆៅពាក់កណ្ដាល ឆ្អិនពាក់កណ្ដាល ជាពិសេសគឺសាច់មាន់ឬសាច់ចៀមជាដើម។ 

អ្នកជំនាញក៏បាននិយាយដែរថា ខណៈពេលដែលករណីភាគច្រើននៃ GBS នៅជុំវិញពិភពលោកកើតចេញពីសត្វបក្សីមិនទាន់ឆ្អិន វាក៏អាចឆ្លងតាមរយៈទឹក ដែលស្រដៀងទៅនឹងជំងឺអាសន្នរោគ ឬហៅថា Salmonella ផងដែរ។