ភ្នំពេញ៖ បុរសម្នាក់ម្នាក់បានចោទប្រកាន់ប្រពន្ធរបស់ខ្លួនថាមានប្រុសថ្មីក្នុងអំឡុងពេលខ្លួនកំពុងជាប់ពន្ធនាគារ ត្រូវប្រពន្ធនាំកូនប្រុសស្រីរត់ចោលទៀតនោះ​ ត្រូវបានគេប្រទះឃើញធ្វើអត្តឃាតចង ក សម្លាប់ខ្លួននៅក្នុងបន្ទប់ជួល ដោយសន្សល់ទុកបំណុលជុំទិស ។ ហេតុការន៍នេះបានកើតឡើង ស្ថិតនៅក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ បង្កឲ្យមានការភ្ញាក់ផ្អើល នៅវេលាម៉ោង១១និង១៥នាទីព្រឹកថ្ងៃទី៣ ខែមសា ឆ្នាំ២០២៥ ។

តាមប្រភពព័ត៌មានបានឲ្យដឹងថា បុរសខាងលើឈ្មោះ ប៉ុន ម៉ុន អាយុ៤៥ឆ្នាំ មានស្រុកកំណើតនៅភូមិរាយប៉ាយលើ ឃុំរាយប៉ាយ ស្រុកកងមាស ខេត្តកំពង់ចាម អតីតជាកម្មករដឹកសាច់គោកុងស៊ីកាប់គោមួយកន្លែងនៅឃុំទួលព្រេជស្រុកអង្គស្នួល ខេត្តកណ្ដាល ។ ប្រពន្ធឈ្មោះ ចន ចាន់ថន អាយុ៣៨ឆ្នាំ មានស្រុកកំណើតភូិល្វា ឃុំល្វា ស្រុកព្រៃឈរ ខេត្តកំពង់ចាម មុខរបរកម្មការិនីរោងចក្រស្បែកជើង ស្ថិតនៅភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ អ្នកទាំងពីរបានរៀបការជាមួយគ្នារយៈពេល១៩ឆ្នាំមកហើយ តាំងពីឆ្នាំ២០០៦មកម្ល៉េះ និងមានចំណងដៃអាពាហ៍ពិពាហ៍កូនប្រុសចំនួន៣ និងកូនស្រី១នាក់  ។

ប្រភពដដែលបានឲ្យដឹងទៀតថា មួយរយៈចុងក្រោយ ក្រោយបុរសខាងលើចេញពីពន្ធធនាគារវិញ តែងឮប្ដីប្រពន្ធខាងលើឈ្លោះប្រកែកគ្នាខ្លាំងៗ ដោយបុរសខាងលើបានចោទប្រកាន់ស្រ្តីជាប្រពន្ធថា មានសាហាយកំឡុងពេលខ្លួននៅជាប់ឃុំ។ ទោះបីប្រពន្ធបានឆ្លើយបដិសេធយ៉ាងណាក៏មិនអាចលាងជម្រះមន្ទិលសង្ស័យនេះបានឡើយ។ លុះមុនថ្ងៃកើតហេតុ ស្រ្តីជាប្រពន្ធមិនអាចស៊ូទ្រាំនឹងការចោទប្រកាន់ច្រំដែលនេះបាន និងខ្លាចកើតមានអំពើហិង្សាណាមួយកើតឡើង ក៏សម្រេចចិត្តនាំកូនៗរត់ចោលប្ដីទៅលាក់ខ្លួននៅផ្ទះសាច់ញាតិជាបណ្ដោះអាសន្ន។

ដោយឡែក បើតាមបុរសអ្នកលក់ចាបហួយ និងជាអ្នកមើលការខុសត្រូវនៅបន្ទប់ជួលខាងលើបាននិយាយថា បុរសនោះបានជំពាក់ប្រាក់ថ្លៃចាបហួយគាត់ច្រើនដែរ ហើយនៅមុនពេលកើតហេតុគាត់បានឡើងទៅរកទារប្រាក់ដែលជំពាក់នៅបន្ទប់ជួល ។ លុះពេលទៅដល់ឃើញទ្វារបន្ទប់បិទជិត ពេលនោះគាត់បានរុញទ្វារចូលទៅស្រាប់តែឃើញបុរសនោះចង ក នឹងខ្សែអង្រឹងជាប់ទ្វារបន្ទប់ទឹកស្លាប់បាត់ទៅហើយ ដោយពុំដឹងថាស្លាប់តាំងពីពេលណាទេ ទើបស្រែកប្រាប់អ្នកជិតខាងឲ្យជួយមើល និងទាក់ទងសមត្ថកិច្ចនគរបាលចុះទៅធ្វើកោសល្យវិច័យ ។ 

តាមការបញ្ជាក់និងពិនិត្យរបស់នគរបាល កុសលវិច្ច័យនិង វិទ្យាសាស្រ្តបានបញ្ជាក់ប្រាប់ថាជនរងគ្រោះ ស្លាប់ដោយធ្វើ អត្តឃាតចងករសម្លាប់ខ្លួនពិតប្រាកដមែន និងបានធ្វើលិខិតប្រគល់សពជនរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត៕