ភ្នំពេញ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានពន្យលថា៖ «ប្រទេសកម្ពុជាជាសមាជិកអង្គការពាណិជ្ជកម្មពិភពលោក (WTO) ក៏ដូចជាសហរដ្ឋអាមេរិក ដែលមានសមាជិកប្រមាណ ១៦៦ ប្រទេសផ្សេងទៀត គឺមានការកំណត់បន្ទាត់ពន្ធគយរួមគ្នា ដោយក្នុងនោះ កម្ពុជាកំណត់បន្ទាត់ពន្ធគយលើទំនិញទាំងអស់មិនថា ទំនិញអាម៉េរិក ឬដៃគូប្រទេសណាផ្សេងទេ មានចន្លោះពី ០% ទៅ ៣៥%»។
រដ្ឋមន្ត្រីក្រសួងពាណិជ្ជកម្មបានធ្វើការបញ្ជាក់បែបនេះ បន្ទាបពីប្រធានាធិបតីសហរដ្ឋអាមេរិក លោក ដូណា ត្រាំ ដែលបានប្រកាសដាក់យកពន្ធបន្ថែមលើទំនិញនាំចូលទៅកាន់អាមេរិកពីបណ្តាប្រទេសមួយចំនួនលើពិភពលោកដែលសហរដ្ឋអាមេរិកមានឱនភាព ក្នុងនោះក៏មានប្រទេសកម្ពុជាផងដែរ ដែលសហរដ្ឋអាមេរិកយកពន្ធបន្ថែម រហូតដល់ ៤៨%។
លោកជំទាវរដ្ឋមន្ត្រីក្រសួងពាណិជ្ជកម្ម បានបញ្ជាក់ថា៖ «នៅក្នុងឆ្នាំ២០២៤ កន្លងទៅ ជញ្ជីងពាណិជ្ជកម្មរវាងកម្ពុជា និងអាម៉េរិក ដែលទំហំពាណិជ្ជកម្មជិត ៣០០ លានដុល្លារអាម៉េរិក នាំចូលមកកម្ពុជា គឺបន្ទាត់ពន្ធនាំចូលលើទំនិញពីសហរដ្ឋអាមេរិកខ្ពស់បំផុតត្រឹមតែ ២៩.៤% ប៉ុណ្ណោះ ដូច្នេះស្ថិតនៅក្រោមបន្ទាត់កំណត់ខ្ពស់បំផុតរបស់ អង្គការពាណិជ្ជកម្មពិភពលោក (WTO) ៣៥%។

រដ្ឋមន្ត្រីក្រសួងពាណិជ្ជកម្ម បានពន្យល់ថា៖ «មូលហេតុដែលសហរដ្ឋអាមេរិកដាក់បន្ថែមពន្ធមកលើកម្ពុជា រហូត ៤៩% នោះដោយសារប្រទេសកម្ពុជា ជាប្រទេសកំពុងអភិវឌ្ឍន៍ដូចជាប្រទេសផ្សេងៗទៀត តែងតែមានការនាំចេញផលិតទៅកាន់ប្រទេសមានសេដ្ឋកិច្ចធំៗ ដោយសារទំហំនៃការបញ្ជាទិញ ក្នុងនោះទីផ្សារនៅសហរដ្ឋអាមេរិក មានប្រជាពលរដ្ឋប្រមាណជាង ៣៤០ លាននាក់ រីឯប្រទេសកម្ពុជា មានប្រជាជនត្រឹមតែ ១៧ លាននាក់ ដូច្នេះពិតណាស់ទីផ្សានៅសហរដ្ឋអាមេរិក ត្រូវបញ្ជាទិញផលិតផលពីកម្ពុជា មានចំនួនច្រើន ហើយកម្ពុជាមានចំនួនប្រជាជនតិច តម្រូវការបញ្ជាទិញផលិតផលពីអាមេរិកមានចំនួនតិច»។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានបន្ថែមទៀតថា៖ «ការដំឡើងពន្ធ ៤៩% ដោយសហរដ្ឋអាមេរិកមកលើប្រទេសកម្ពុជា ផលប៉ះពាល់បំបូងគេដល់អ្នកប្រើប្រាស់នៅអាមេរិក បន្ទាប់មកប៉ះពាល់ដល់អ្នកផលិតផ្ទាល់»៕