(កំពត)នៅថ្ងៃទី ៤ ខែមេសា ឆ្នាំ២០២៥នេះលោកវីរៈសេនីយ៍ឯក ដាន វុត្ថា ឆ្លងការរង និងជាអ្នកនាំពាក្យនៃឆ្លងការដ្ឋាននគរបាលខេត្តកំពតបានប្រាប់ឲ្យដឹងថាក្នុងនាមមន្ត្រីជំនាញសមត្ថកិច្ចគឺដើម្បីរក្សាការពារភាពសុខសាន្ត ក៏ដូចជារក្សាបាននូវសណ្តាប់ធ្នាប់សាធារណៈជូនដល់ភ្ញៀវទេសចរជិតឆ្ងាយសម្រាប់ឱកាសនៃពិធីបុណ្យចូលឆ្នាំថ្មីប្រពៃណីជាតិខាងមុខ ស្នងការដ្ឋាននគរបាលខេត្តកំពតនឹងប្រើប្រាស់កម្លាំងប្រមាណជាង ១.០០០នាក់ រួមបញ្ចូលជាមួយមន្ត្រីសមត្ថកិច្ចចំណុះគណៈបញ្ជាការឯកភាពរដ្ឋបាលខេត្តដើម្បីចល័ត និងឈរជើងតាមគោលដៅសំខាន់ៗនៅទូទាំងខេត្ត។

កវរសេនីយ៍ឯក ដាន វុត្ថា ស្នងការរង និងជាអ្នកនាំពាក្យនៃស្នងការដ្ឋាននគរបាលខេត្តកំពត បានប្រាប់ឱ្យដឹងថា ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងឈានចូលមកដល់នាពេលខាងមុខ ស្នងការដ្ឋាននគរបាលខេត្តនឹងប្រើប្រាស់កម្លាំងនគរបាលចំនួន ១.០១៨នាក់ សហការជាមួយមន្ត្រីសមត្ថកិច្ចចំណុះគណៈបញ្ជាការឯកភាពខេត្តដាក់ឈរជើង និងចល័តតាមគោលដៅសំខាន់ៗដើម្បីការពារសន្តិសុខសណ្តាប់ធ្នាប់ជូនភ្ញៀវ។

លោក ដាន វុត្ថា ស្នងការរងបានបន្តថា គោលដៅសំខាន់ៗនឹងត្រូវបែងចែកជា ៣ប្រភេទ រួមមាន កន្លែងរៀបចំពិធីកម្សាន្តសប្បាយ តាមដងផ្លូវដែលឧស្សាហ៍កើតឡើងនូវករណីកកស្ទះចរាចរ និងគ្រប់រមណីយដ្ឋានទូទាំងខេត្ត។

ចំពោះតំបន់ត្រជាក់ត្រង់ចំណុចរង្វង់មូលរូបសំណាកផ្លែទុរេន អង្គភាពបង្ការ និងពន្លត់អគ្គីភ័យនឹងប្រើប្រាស់រថយន្តចំនួន ៤គ្រឿង សម្រាប់បាញ់ទឹកជូនភ្ញៀវរាំលេងកម្សាន្តពេញរយៈពេល៣ថ្ងៃ។ 

លោកវរសេនីយ៍ឯក ដាន វុត្ថា ស្នងការរងនគរបាលខេត្តកំពតបានបន្តថា ក្រៅពីកិច្ចសហការនឹងកម្លាំងកងរាជអាវុធហត្ថ ប្រជាការពារ មន្ត្រីសុខាភិបាល មន្ត្រីអគ្គិសនី និងគ្រប់ផ្នែកពាក់ព័ន្ធនៅលើដីគោក កម្លាំងស្នងការដ្ឋាននគរបាលខេត្តនឹងចូលរួមសហការជាមួយសមត្ថកិច្ចនគរបាលការពារព្រំដែនទឹករង់ចាំឃ្លាំមើល និងល្បាតតាមដងព្រែក លើផ្ទៃសមុទ្រដើម្បីត្រៀមជួយអ្នកធ្វើដំណើរកម្សាន្តតាមផ្លូវទឹកផងដែរ។

ជាមួយនេះ មន្ត្រីជំនាញក៏បានណែនាំដល់ប្រតិបត្តិករទេសចរណ៍ ពិសេសម្ចាស់អាជីវកម្មទូកដឹកភ្ញៀវឱ្យប្រុងប្រយ័ត្នខ្ពស់ដោយមានការបំពាក់ឧបករណ៍បរិក្ខារការពារសុវត្ថិភាព និងហាមឃាត់ដាច់ខាតនូវការផ្ទុកលើសចំណុះ។

លោក ដាន វុត្ថា ក៏បានអំពាវនាវថា ក្នុងនាមតំណាងឱ្យលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត លោកសូមធ្វើការអំពាវនាវដល់អ្នកបញ្ជាយានយន្តគ្រប់ប្រភេទ ត្រូវគោរពច្បាប់ចរាចរណ៍ឱ្យបានខ្ជាប់ខ្ជួន និងមានការយោគយល់អធ្យាស្រ័យគ្នាដើម្បីបញ្ចៀសករណីគ្រោះថ្នាក់ ឬការខាតបង់ទ្រព្យធនផ្សេងៗ។

យ៉ាងណាមិញ ក្រុមយុវជនគ្រប់រូបត្រូវរក្សាភាពថ្លៃថ្នូរជាមួយការកម្សាន្តតាមបែបប្រពៃណីជាតិ ហើយបញ្ចៀសឱ្យបាននូវទង្វើមិនគប្បីដែលនាំឱ្យមានទោសទណ្ឌដល់ខ្លួន និងទុក្ខកង្វល់សម្រាប់ក្រុមគ្រួសារក្នុងការលេងល្បែងដែលមិនសមរម្យ ឬធ្វើឱ្យមានគ្រោះថ្នាក់ផ្សេងៗទៀត។(សឹង រ៉ាត់)