ភ្នំពេញ៖ មេដឹកនាំចលនាតស៊ូប្រឆាំងរដ្ឋាភិបាលស្របច្បាប់ និរទេសខ្លួននៅក្រៅស្រុក លោក សម សេរី ប្រធានរណសិរ្យរំដោះជាតិខ្មែរ និងរដ្ឋាភិបាលជាតិខ្មែរនិរទេស បានប្រកាសរំលាយចោលចលនារបស់ខ្លួន និងសង្ឃឹមថា៖ «សម្តេចតេជោ ហ៊ុន សែន ប្រមុខរដ្ឋស្តីទី និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ពិតជាមានគុណធម៌ និងការសណ្តោសប្រណីដល់រូបលោក»។ 

មេដឹកនាំរណសិរ្យរំដោះជាតិខ្មែរ បានសរសេរលិខិតមួយច្បាប់គោរពជូនដោយផ្ទាល់ទៅសម្តេចតេជោ ហ៊ុន សែន ប្រមុខរដ្ឋស្តីទី និងសម្តេចធិបតី នាយករដ្ឋមន្ត្រី ស្នើសម្តេចទាំងពីរលើកលែងទោសដល់រូបលោកឲ្យមានសិទ្ធិសេរីភាពដូចពលរដ្ឋដទៃទៀត ដើម្បីបានវិលត្រឡប់មកកាន់ប្រទេសកម្ពុជាវិញ។

លោក សម សេរី បានបញ្ជាក់ក្នុងលិខិតយ៉ាងដូច្នេះថា៖ «ផ្អែកលើស្មារតីនៃការរួមសាមគ្គីគ្នាការពារនូវ “សន្តិភាព” និងការថែរក្សាការពារនូវ ផលប្រយោជន៍ដ៏ឧដុង្គឧត្តម និងសុភមង្គលរបស់ប្រជាជនកម្ពុជា លោកសូមប្តេជ្ញារួបរួមសាមគ្គីគ្នាក្នុងនាមជាខ្មែរតែមួយ គោរពតាមច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា ក្នុងការថែរក្សាសន្តិភាព និងប្រជាធិបតេយ្យសេរីពហុបក្ស រួមគ្នាទប់ស្កាត់នូវការរំលោភច្បាប់នានា»។

សូមជម្រាបថា លោក សម សេរី មេដឹកនាំចលនាតស៊ូប្រឆាំងគោលបំណងផ្តួលរំលំរាជរដ្ឋាភិបាលស្របច្បាប់ ( Khmer National Liberation Front) ដែលមានមូលដ្ឋាននៅប្រទេស Denmark ត្រូវបានសាលាដំបូងរាជធានីភ្នំពេញ បានប្រកាសសាលក្រមកំបាំងមុខ កាលពីរសៀល ថ្ងៃទី២៧ ខែកក្កដា ឆ្នាំ ២០២២ សម្រេចផ្តន្ទាទោស ដាក់ពន្ធនាគារកំណត់ ០៩ឆ្នាំ និង៦ខែ និងពិន័យជាប្រាក់ ចំនួន ៣ លានរៀល បន្ថែមពីលើទោស ជាប់ពន្ធ​នាគាររបស់គាត់ពីមុនៗ ជាប់ទាក់ទងនឹងបទល្មើស «រួមគំនិតក្បត់ជាតិ និងអំពើញ៉ុះញ៉ង់បង្កឱ្យមានអស្ថេរ​ភា​ព​ធ្ងន់ធ្ងរដល់សង្គម» តាមមាត្រា ៤៩៤ និងមាត្រ ៤៩៥ នៃក្រមព្រហ្មទណ្ឌ ប្រព្រឹត្តនៅក្នុងប្រទេសកម្ពុជា ចន្លោះឆ្នាំ ២០១៧ និងឆ្នាំ២០១៩។

ក្រៅពីនោះ លោក សម សេរី ក៏ធ្លាប់ត្រូវបានសាលាដំបូងរាជធានីភ្នំពេញ ផ្តន្ទាទោសទោសកំបាំងមុខ ដាក់ពន្ធនាគារ យ៉ាងតិច ២០ឆ្នាំ នូវ បទល្មើសឧក្រិដ្ឋជាច្រើន មានដូចជា ការបង្កើតចលនាកងកម្លាំងអាវុធខុសច្បាប់, រួមគំនិតក្បត់ និងអំពើញុះញង់ឱ្យមានភាពវឹកវរដល់សន្តិសុខសង្គម ជាដើម ក្នុងចេតនា ដើម្បីផ្តួលរលំរាជរដ្ឋាភិបាលកម្ពុជាស្របច្បាប់៕