ភ្នំពេញ៖ App NoDrug បានក្លាយជាមធ្យោបាយមួយដ៏ប្រជាប្រិយភាពក្នុងការប្រើប្រាស់ ដើម្បីរាយការណ៍ពីបទល្មើសគ្រឿងញៀនក្នុងមូលដ្ឋានទៅកាន់សមត្ថកិច្ចជំនាញ សំដៅដល់ការបោសសម្អាតគ្រឿងញៀនចេញពីភូមិឋានរបស់ប្រជាពលរដ្ឋ តាមអ្វីដែលជាគោលនយោបាយរបស់រាជរដ្ឋាភិបាលកម្ពុជា។ កម្មវិធីទូរសព្ទមួយនេះ គឺយន្ដការដ៏មានប្រសិទ្ធភាព និងរក្សាការសម្ងាត់ដល់អ្នកដែលរាយការណ៍ផងដែរ។

លោកឧត្តមសេនីយ៍ទោ ឃន តារាសម្បត្តិ អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានអនុគណៈកម្មការប្រចាំបញ្ជា ២៤ម៉ោង បានអះអាងថា «ជារៀងរាល់ថ្ងៃ សមត្ថកិច្ចជំនាញនៃអាជ្ញាធរជាតិប្រយុទ្ធប្រឆាំងគ្រឿងញៀន គឺតែងទទួលបានសេចក្ដីរាយការណ៍ពីប្រជាពលរដ្ឋលើបញ្ហាគ្រឿងញៀន តាមមធ្យោបាយ App NoDrug»។

លោកឧត្តមសេនីយ៍ទោ ឃន តារាសម្បត្តិ បានបន្តទៀតថា «នៅពេលទទួលបានសេចក្ដីរាយការណ៍ សមត្ថកិច្ចនៃអនុគណៈកម្មការប្រចាំបញ្ជា ២៤ម៉ោង បានបញ្ជូនទៅព័ត៌មានទាំងអស់នោះ ទៅកាន់សមត្ថកិច្ចជំនាញនៅមូលដ្ឋានភ្លាមៗ ដើម្បីចាត់វិធានការស្រាវជ្រាវ និងឈានដល់ការបង្ក្រាបករណីគ្រឿងញៀន ដែលជាអ្វីដែលប្រជាពលរដ្ឋបានរាយការណ៍មកកាន់សមត្ថកិច្ច»។

លោកឧត្តមសេនីយ៍ទោ ឃន តារាសម្បត្តិ បានឲ្យដឹងថា ក្នុងរយៈពេលពេញមួយខែមិថុនាកន្លងទៅ ក្រុមការងារអនុគណៈកម្មការប្រចាំបញ្ជា ២៤ម៉ោងលើ៧ថ្ងៃ (២៤/៧) នៃគណៈកម្មការគ្រប់គ្រងកម្មវិធីទូរសព្ទដៃ NoDrug ទទួលបានការរាយការណ៍សរុប ចំនួន ២៨៩ ករណី ក្នុងនោះបានដោះស្រាយ និងឈានដល់ការបង្ក្រាប ចំនួន២០៩ ករណី។ ដោយឡែក ចំនួននៅសេសសល់កំពុងធ្វើការស្រាវជ្រាវ និងខ្លះទៀតជាករណីដដែលដែលសមត្ថកិច្ចធ្លាប់បង្ក្រាបតែពលរដ្ឋរាយការណ៍ម្ដងទៀត។

អគ្គលេខាធិការរង និងជាប្រធានអនុគណៈកម្មការប្រចាំបញ្ជា ២៤ម៉ោង បានអះអាងទៀតថា «ក្នុងរយៈពេល៤៣៦ថ្ងៃ (គិតចាប់ពីថ្ងៃទី២៣ ខែមេសា ឆ្នាំ២០២៤ ដល់ថ្ងៃទី២ ខែកក្កដា ឆ្នាំ២០២៥) ក្រុមការងារអនុគណៈកម្មការប្រចាំបញ្ជា២៤ម៉ោងលើ៧ថ្ងៃ (២៤/៧) នៃគណៈកម្មការគ្រប់គ្រងកម្មវិធីទូរសព្ទដៃ NoDrug ទទួលបានការរាយការណ៍សរុប ចំនួន ១,៧៦៤ ករណី ក្នុងនោះបានដោះស្រាយ និងឈានដល់ការបង្ក្រាប ចំនួន ១,៣១០ ករណី»។

សូមរំលឹកថា ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន តែងលើកទឹកចិត្ត និងអំពាវនាវឲ្យប្រជាពលរដ្ឋទាំងអស់ ជាពិសេសយុវជន យុវនារី ប្រើប្រាស់កម្មវិធីទូរសព្ទដៃ NoDrug ដើម្បីធ្វើជាភ្នែក ច្រមុះ និងត្រចៀករបស់សមត្ថកិច្ចយើង ក្នុងការរាយការណ៍ ដើម្បីយកបញ្ហាគ្រឿងញៀនចេញពីសហគមន៍ដែលយើងរស់នៅ ក៏ដូចជាទទួលបានសារអប់រំទូលំទូលាយផងដែរ។

ឯកឧត្តមសន្តិបណ្ឌិត នេត សាវឿន បានកត់សម្គាល់ថា កន្លងទៅធ្លាប់ឮប្រជាពលរដ្ឋខ្លះលើកឡើងអំពីបញ្ហាគ្រឿងញៀន នៅក្នុងភូមិឋានរបស់ខ្លួន ហើយខ្លះទៀតបង្ហោះនៅតាមបណ្ដាញសង្គមជាដើម ប៉ុន្ដែឥលូវនេះលោកចង់ឲ្យពលរដ្ឋផ្លាស់ប្ដូរផ្នត់គំនិតពីការរអ៊ូ ឬលើកឡើងតាមបណ្ដាញសង្គម ប្រើប្រាស់កម្មវិធីទូរស័ព្ទ NoDrug ដើម្បីរាយការណ៍ពីករណីគ្រឿងញៀន នៅក្នុងសងហគន៍ ដើម្បីយកបញ្ហានោះចេញពីមូលដ្ឋានតែម្ដង។

ឯកឧត្តមឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនរូបនេះ បានអះអាងទៀតថា «អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន មានក្រុមប្រចាំបញ្ជា ២៤ម៉ោងលើ២៤ម៉ោង ដើម្បីចាំទទួលសេចក្ដីរាយការណ៍ពីប្រជាពលរដ្ឋ ហើយជាពិសេសរាល់ការរាយការណ៍នោះ គឺមានលក្ខណៈសម្ងាត់ និងមានសុវត្ថិភាពខ្ពស់បំផុតដល់អ្នករាយការណ៍»៕