ខេត្តប៉ៃលិន៖ នៅថ្ងៃទី១៥ ខែធ្នូ ឆ្នាំ២០២៣នេះ រដ្ឋបាលខេត្តប៉ៃលិនបានប្រារព្ធទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២៣ (លេីកទី៣០ នៅកម្ពុជា) ក្រោមប្រធានបទ «សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍» និងពិធីសំណេះសំណាល សួរសុខទុក្ខនិងចែកអំណោយមនុស្សធម៌ជូនបងប្អូនប្រជាពលរដ្ឋរស់នៅជាមួយមេរោគអេដស៍ ជំងឺអេដស៍ជាច្រើននាក់នៅមន្ទីរពេទ្យបង្អែកខេត្តប៉ៃលិនក្រោយអធិបតីភាពឯកឧត្តម ហុក សុផល អភិបាលរងខេត្តប៉ៃលិននិងមានការអញ្ជើញចូលរួមពីប្រធានមន្ទីរ ស្ថាបនជុំវិញខេត្ត យុវជនស្មគ្រចិត្តកាកបាទក្រហមកម្ពុជាខេត្តប៉ៃលិន និងប្រជាពលរដ្ឋចូលរួមជាង៣០០នាក់ចូលរួមផងដែរ។
ឆ្លៀតឱកាសនេះឯកឧត្តម ហុក សុផល ក្នុងនាមរដ្ឋបាលខេត្ត ក៏សូមធ្វើការអំពាវនាវដល់ស្ថាប័នជាតិ ស្ថាប័នឯកជន សង្គមស៊ីវិល ដៃគូ អភិវឌ្ឍន៍ បណ្តាញអ្នកផ្ទុកមេរោគអេដស៍ និងជំងឺអេដស៍ បណ្តាញអ្នកប្រឈមខ្ពស់នឹងការចម្លង មេរោគអេដស៍ និងបងប្អូនជនរួមជាតិទាំងអស់ ឱ្យបន្តការចូលរួមឱ្យបានតែសកម្មថែមទៀតទៅតាម លទ្ធភាព និងជំនាញរបស់ខ្លួន។ ព្រោះថាមានតែការរួបរួមសាមគ្គីគ្នាជាធ្លុងមួយទេ ដែលអាចដឹកនាំឆ្ពៅទោការលុបបំបាត់ការឆ្លងរីករាលដាល ជម្ងឺអេដស៍អោយអស់នៅឆ្នាំ២០២៥ខាងមុខនេះ។
ក្នុងសារលិខិតរបស់សម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន បានលេីកឡេីងថា ៖ ប្រធានបទទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០២៣ «សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍» បានគូសបញ្ជាក់យ៉ាងច្បាស់ថា ដើម្បីអាចបញ្ចប់ជំងឺអេដស៍បាន គឺទាមទារឱ្យមានការចូលរួមឱ្យបានពេញលេញ និងប្រកបដោយការយកចិត្តទុកដាក់ខ្ពស់ពីគ្រប់ភាគីពាក់ព័ន្ធទាំងអស់ ដូចដែលព្រះរាជាណាចក្រកម្ពុជាយើងធ្លាប់បាននិងកំពុងបន្តអនុវត្ត ក្នុងការឆ្លើយតបទូលំទូលាយ និងពហុវិស័យ ទៅនឹងមេរោគអេដស៍/ជំងឺអេដស៍ ដោយមិនទុកនរណាម្នាក់ឱ្យនៅឯកាឡើយ និងការបង្កើតឱ្យមានមធ្យោបាយអប់រំផ្សព្វផ្សាយថ្មីៗដែលមានលក្ខណៈឌីជីថលផងដែរ។
ជាមួយគ្នានេះ តាមរយៈសារលិខិត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ញើសារសំខាន់ៗ ជូនបង–ប្អូនជនរួមជាតិ ជាពិសេសយុវជនយើង ដូចតទៅ៖
១– ត្រូវប្តេជ្ញាចិត្តចូលរួមទប់ស្កាត់ការរីករាលដាល និងបញ្ចប់ជំងឺអេដស៍ នៅឆ្នាំ២០២៥ ដោយប្រកាន់ខ្ជាប់គោលការណ៍សមភាព និងបរិយាបន្ន
២– ត្រូវនាំគ្នាអនុវត្តវិធីសាស្ត្រ មិត្ត–អប់រំ–មិត្ត ក្នុងការចាកឆ្ងាយពីគ្រឿងញៀន ភាពភ្លើតភ្លើនផ្លូវភេទ ដែលជាហានិភ័យខ្ពស់នៃការឆ្លងមេរោគអេដស៍/ជំងឺកាមរោគផ្សេងៗ និងត្រូវខិតខំរៀនសូត្រ ថែរក្សាសុខភាព បរិភោគអាហាររូបត្ថម្ភល្អដូចពាក្យចាស់ពោលថា «ស្រឡាញ់ខ្លួន ឱ្យស្ងួនចំណី»
៣– សូមបងប្អូនរួមជាតិ ដែលសង្ស័យថាបានប្រឈមនឹងមេរោគអេដស៍ ត្រូវស្វែងរកសេវាផ្តល់ប្រឹក្សា និងធ្វើតេស្តរកមេរោគអេដស៍ឱ្យបានឆាប់បំផុត, ទទួលបានការថែទាំសុខភាព និងត្រូវប្រើថ្នាំប្រឆាំងមេរោគអេដស៍ឱ្យបានត្រឹមត្រូវ ទៀងទាត់ និងជាប់លាប់
៤– សូមស្ត្រីមានផ្ទៃពោះ ទៅពិនិត្យនិងថែទាំផ្ទៃពោះជាមួយឆ្មប ឬគ្រូពេទ្យយ៉ាងហោចឱ្យបាន៤ដងមុនសម្រាលកូន និងទទួលយកសេវាទប់ស្កាត់ការចម្លងមេរោគអេដស៍/ស្វាយ និងថ្លើម ពីសេវាសុខាភិបាល
៥– សូមបងប្អូនរួមជាតិទាំងអស់ ចូលរួមលើកទឹកចិត្ត និងមិនត្រូវរើសអើងឬមាក់ងាយអ្នកផ្ទុកមេរោគអេដស៍ និងអ្នកជំងឺអេដស៍ឡើយ៕
ដោយ,ស សារឿន
រដ្ឋមន្រ្តីក្រសួងព័ត៌មាន ចាត់ទុកគ្រឹះស្ថានឯកជន ដើរតួនាទីសំខាន់ក្នុងការជួយបណ្ដុះបណ្ដាលធនធានមនុស្ស
ការរៀបចំដំណើរទស្សនកិច្ចរបស់ប្រជាពលរដ្ឋទៅកាន់តំបន់តាមព្រំដែនភាគឦសាននៃប្រទេសបានបិទបញ្ចប់
រដ្ឋមន្រ្តីក្រសួងសុខាភិបាល «ជំរុញលើកទឹកចិត្តដល់មន្រ្តីរាជការ បុគ្គលិក នៅមណ្ឌលសុខភាព ខិតខំបម្រើសេវាសុខាភិបាលឱ្យកាន់តែល្អប្រសើរ»
