ភ្នំពេញ៖ ករណីអំពើហិង្សា និងធ្វើទារុណកម្មចងដៃ ចងជើងក្មេងស្រី អាយុ ០៦ឆ្នាំ ពីសំណាក់អ៊ុំស្រី និងជីដូន ព្រោះខឹងនឹងក្មេងរពឹសនិយាយមិនស្តាប់រៀនសូត្រមិនចេះចាំនាំតែបញ្ហាចូលផ្ទះដែលកំពុងផ្ទុះការរិះគន់កក្រើកលើបណ្តាញសង្គមនោះ ពេលនេះឪពុកម្តាយកុមារីរងគ្រោះបានមកមើលកូនមិនបានប្តឹងផ្តល់អ្វីឡើយ ព្រោះពួកគាត់បានលែងលះគ្នាជាយូហើយ និងបានទុកកូនរបស់ពួកគេរស់នៅជាមួយអ៊ុំស្រី ព្រមទាំងជីដូនជារ៉ាប់រងចិញ្ចឹមបីបាច់ថែរក្សាតាំងពីតូចៗរហូតដល់ ០៤នាក់ឯណោះ។
ជុំវិញករណីខាងលើនេះ ក្រោយពីទទួលបានព័ត៌មាន តាមបណ្តាញសង្គមឪពុក និងម្តាយក្មេងស្រីរងគ្រោះបានមកជូន និងបានលិខិតផ្តិតមេដៃមិនប្តឹងផ្តល់ទេ ព្រោះតែយល់ឃើញថា «បងស្រី និងម្តាយបានចិញ្ចឹមបីបាច់មើលថែកូនស្រីខ្លួនអស់រយៈពេល ០៤ឆ្នាំកន្លងមកហើយ ព្រោះក្មេងនេះមានចរឹករឹងរូសណាស់។ ម្យ៉ាងទៀតពួកគាត់ចង់ឲ្យរៀនសូត្រ និងញ៉ាំអាហារបានច្រើន ដើម្បីមានសុខភាពល្អ»។
រដ្ឋបាលខណ្ឌឫស្សីកែវ ក៏បានអរគុណបងប្អូនប្រជាពលរដ្ឋ ក្រុមទី៥ ភូមិទួលគោក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ និងប្រើប្រាស់បណ្តាញសង្គមនានា ដែលបានផ្តល់ព័ត៌មានអំពីការប្រើអំពើហឹង្សាលើក្មេងស្រីអាយុ ០៦ឆ្នាំ ដោយចងដៃ ប្រព្រឹត្តដោយជីដូន និងអ៊ំស្រីរបស់ក្មេងស្រីនោះ កាលពីយប់ថ្ងៃទី១៦ ខែធ្នូ ឆ្នាំ២០២៣ នេះ។
ក្រោយទទួលបានព័ត៌មានភ្លាមៗ អាជ្ញាធរខណ្ឌ និងកម្លាំងនគរបាលសង្កាត់ និងខណ្ឌ ទួលសង្កែបានចុះស្រាវជ្រាវជាបន្ទាន់ និងឈានទៅឃាត់ខ្លួនជនសង្ស័យ ០២នាក់ ដើម្បីអនុវត្តនីតិវិធីច្បាប់ជាធរមាន និងបាននាំក្មេងស្រីជាជនរងគ្រោះប្រគល់ជូនឪពុកម្តាយវិញ។
ក្រោយការឃាត់ខ្លួនជនសង្ស័យទាំង ០២នាក់ និងម្តាយក្មេងស្រីរងគ្រោះ បានឲ្យដឹងថា «ជាទម្លាប់អប់រំញឹកញាប់ក្មួយ និងចៅឲ្យរៀនសូត្រ ញ៉ាំអាហារឲ្យបានច្រើន កុំលេងច្រើន ប៉ុន្តែក្មេងស្រីស្តាប់ទេ វក់លេងទូរសព្ទ រពឹស លួងលោមមិនស្តាប់ ទើបឈានដល់ការប្រើហិង្សាចងដៃគំរាមឲ្យខ្លាច»។
តាមការបញ្ជាក់បានឲ្យដឹងថា «ជនសង្ស័យទាំង ០២នាក់ ត្រូវជាអ៊ុំស្រី និងជីដូនបង្កើតបានចិញ្ចឹមក្មេងស្រីម្នាក់នេះតាំងពីតូចម្លេះ និងបងៗ ០៣នាក់ទៀត ដោយសារឪពុក និងម្តាយរបស់ពួកគេលែងលះគ្នាចែកផ្លូវដើររៀងៗខ្លួន ទុកក្មេងៗទាំងអស់នេះ ឲ្យជីដូន និងម្តាយធំជាអ្នកមើលថែទាំងអស់»។
នៅព្រឹកថ្ងៃទី១៧ ខែធ្នូ ឆ្នាំ២០២៣នេះ ឪពុក ម្ដាយក្មេងស្រី បានមកធ្វើបែបបទមិនខឹងមិនប្ដឹងជនសង្ស័យទាំងពីរទេដោយសារពួកគាត់បានផ្ញើកូនរបស់គាត់ឲ្យអ្នកទាំងពីរនេះចិញ្ចឹមមើលថែតាំងតែពីតូចមក តែដោយហេតុថា កូនស្រីរបស់គាត់រពឹសរឹងរូសមិនស្ដាប់បង្គាប់ជីដូន និងអ៊ំស្រី ទើបធ្វើឲ្យមានកំហឹងមួយពេលមិនបានគិត។
សូមជម្រាបថា ឃ្លីបវីដេអូអំពីករណីធ្វើទារុណកម្មលើកុមារយ៉ាងឃោរឃៅមួយ បានកើតឡើងនៅវេលាម៉ោង ០៩និង៣០នាទីយប់ ថ្ងៃទី១៦ ខែធ្នូ ឆ្នាំ២០២៣ នេះ ត្រង់ចំណុចផ្ទះលេខ ៣០៩K ផ្លូវបេតុង ក្រុម៥ ភូមិទួលគោក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ ដែលជនបង្កជាអ៊ុំស្រី និងជីដូន។
ចំពោះមូលហេតុនៃអំពើហិង្សាតាមស្ត្រីបង្កហិង្សាលើក្មេងស្រី បានប្រាប់ប៉ូលិសឱ្យដឹងថា «សកម្មភាពគាត់ធ្វើនោះ គឺជាការអប់រំក្មួយ និងចៅគាត់តែប៉ុណ្ណោះ ពុំមានចេតនាប្រើហិង្សា ឬធ្វើទារុណកម្មទៅលើក្មួយ និងចៅគាត់នោះទេ។ ដោយសារតែកុមារីរងគ្រោះ មានអាយុត្រឹមតែ ០៦ឆ្នាំ ជាក្មេងរពិសខ្លាំង និងរៀនខ្សោយ និងតែងតែបង្ករឿងនៅសាលា រហូតអ្នកគ្រូស្តីបន្ទោសឲ្យពួកគាត់ជាអាណាព្យាបាលទៀតផង»។
បច្ចុប្បន្ន ករណីនេះ ត្រូវបានសម្របសម្រួលគ្នាដោយគ្មានការប្តឹងផ្តល់ ហើយក្មេងស្រីរងគ្រោះមិនមានស្លាកស្នាមអ្វីធ្ងន់ធ្ងរឡើយ៕
រដ្ឋមន្រ្តីក្រសួងព័ត៌មាន ចាត់ទុកគ្រឹះស្ថានឯកជន ដើរតួនាទីសំខាន់ក្នុងការជួយបណ្ដុះបណ្ដាលធនធានមនុស្ស
ការរៀបចំដំណើរទស្សនកិច្ចរបស់ប្រជាពលរដ្ឋទៅកាន់តំបន់តាមព្រំដែនភាគឦសាននៃប្រទេសបានបិទបញ្ចប់
រដ្ឋមន្រ្តីក្រសួងសុខាភិបាល «ជំរុញលើកទឹកចិត្តដល់មន្រ្តីរាជការ បុគ្គលិក នៅមណ្ឌលសុខភាព ខិតខំបម្រើសេវាសុខាភិបាលឱ្យកាន់តែល្អប្រសើរ»
