ឧត្តមានជ័យ៖ ការប្រយុទ្ធគ្នារយៈពេល៥យប់៥ថ្ងៃ រវាងកងទ័ពកម្ពុជា និងថៃ ក្នុងជម្លោះព្រំដែននាពេលកន្លងមកន ទោះបីជាយោធាថៃទម្លាក់គ្រាប់បែកពីលើយន្តហោះ គ្រាប់កាំភ្លើងផ្លោង គ្រាប់បែកផ្សែងពុល គ្រាប់បែកចង្កោម និងដ្រូនហោះហើរបាញ់ថ្នាំពុល ប៉ុន្តែព្រះសង្ឃដែលគង់ក្នុង «វត្តតាមាន់សែនសែនជ័យ» ក្រាញននាលមិនរត់ចាកចេញពីទីអារាមនេះដាច់ខាត់ ដើម្បីចូលរួមការពារទឹកដីជាមួយវីរៈកងទ័ពកម្ពុជា ព្រោះព្រះអង្គបានគង់នៅទីនេះតាំងពីឆ្នាំ១៩៨២ មកមម្លេះ។ 

នេះបើយោងតាមការបង្ហោះរបស់លោក ហេង រតនា អគ្គនាយក «ស៊ីម៉ាក់» នៅល្ងាចថ្ងៃទី៣០ ខែសីហា ឆ្នាំ២០២៥ នេះ លើបណ្តាញសង្គមផ្លូវការរបស់លោក។

លោក ហេង រតនា បានសរសេរថា កាលថ្ងៃម្សិលមិញ ទី២៩ ខែសីហា ឆ្នាំ២០២៥ នៅម៉ោងប្រមាណ ១១ថ្ងៃត្រង់ លោក និងក្រុមការងារកំពុងស្ថិតនៅវត្តតាមន្តសែនជ័យ បានដឹងថានៅខាងជួរមុខលើប្រាសាទតាមាន់ មានការប្រឈមមុខដាក់គ្នារវាងកងទ័ពកម្ពុជា និងសៀម។ 

អគ្គនាយកស៊ីម៉ាក់ថា លោកមិនមែនជាគ្រូទាយស្អីនោះទេ! គ្រាន់តែចាប់ដៃព្រះអង្គជាមួយក្តីមោទកភាពក្រៃលែងដែលមានវរៈកងទ័ព ព្រះសង្ឃ ប្រជាពលរដ្ឋខ្មែរ មានព្រលឹងឈាមជ័រជាមួយស្មារតី និងឆន្ទះដ៍អង់អាចក្លាហានបំផុតក្នុងការការពារបូរណភាពទឹកដី!

ព្រះអង្គបានមានព្រះបន្ទូលមកកាន់លោកថា «អាត្មាបានស្ថិតនៅតំបន់នេះ តាំងពីឆ្នាំ១៩៨២ ហើយក្នុងពេលប្រយុទ្ធគ្នា៥ថ្ងៃ (២៤-២៨ ខែកក្កដា) នេះ អាត្មាស្ថិតនៅក្នុងទីអារាមតាមន្តសែនជ័យជាប់រហូត ទោះបីជាមានការទម្លាក់គ្រាប់បែកពីយន្តហោះ គ្រាប់កាំភ្លើងផ្លោង គ្រាប់បែកផ្សែងពុល គ្រាប់បែកចង្កោម និងដ្រូនហោះហើរបាញ់ថ្នាំពុលក៏ដោយចុះ»។ 

អគ្គនាយកស៊ីម៉ាក់ បានបញ្ជាក់ថា៖ «ទីវត្តអារាមតាមន្តសែនជ័យ ក៏មានសល់បំណែកបែកបាក់រូបចម្លាក់បដិមា ថ្មបុរាណមួយចំនួនដែលក្រុមជំនាញបុរាណវិទ្យា បានប្រមែប្រមូលរក្សាទុក ដោយហេតុថាមានទីបុរាណឋានក្បែរៗទីអារាមនេះ ដែលអាចជាទីចំណតក្នុងសម័យបុរាណ មុននឹងធ្វើដំណើរឡើងទៅកាន់ប្រាសាទតាមាន់តូច និងតាមាន់ធំ»៕