បាល់ទាត់៖ ដើម្បីទទួលបាន​ចំណាត់​ថ្នាក់​លេខ​២ល្អ​បំផុត ​ ក្នុង​ពូល G ពាន​រង្វាន់​យុវជន​អាស៊ី AFC U23 Asian Cup ឡើង​ដល់​ជុំ​ចុង​ក្រោយ ក្រុម U23 កម្ពុជា ត្រូវតែរក​ឲ្យ​បាន​ពិន្ទុ​ពីលើ​ក្រុម U23 អ៉ីរ៉ាក់ ខណៈការប្រកួតចាប់ផ្ដើមនៅ​ម៉ោង​៧​យប់ ​ថ្ងៃ​ទី​៩ ខែ​កញ្ញា ឆ្នាំ ២០២៥ស្អែក​នេះ នៅ​ពហុកីឡដ្ឋាន​ជាតិ​អូឡាំពិក។

ឆ្លង​កាត់​ ២ ប្រកួត​ដូច​គ្នា ក្រុម​ទាំង​ពីរ​មិន​ទាន់​បរាជ័យ​ដូច​គ្នា។ អ៉ីរ៉ាក់ រក​បាន ៦ ពិន្ទុ​ពេញ កំពុងឈរ​លើ​កំពូល​តារាង​ បន្ទាប់​ពី​ឈ្នះ ប៉ាគីស្ថាន ៨-១ និង​ឈ្នះ អូម៉ង់ ១-០។ ចំណែក​ កម្ពុជា រក​បាន ៤ ពិន្ទុ ឈរ​លេខ​២ តាម​រយៈ​ជ័យជម្នះ ១-០ លើ ប៉ាគីស្ថាន និង​ស្មើ អូម៉ង់ ០-០។ ដូចនេះ ការប្រកួត​​ស្អែកនេះ ក្រុម​ណា​ឈ្នះ ​នឹង​ទទួល​បាន​​​លេខ​ ១ ក្នុង​ពូល ឡើង​ទៅជុំ​ចុង​ក្រោយ​ដោយ​ស្វ័យប្រវត្តិ។

​តែវាមិនងាយស្រួលពេកទេសម្រាប់កម្ពុជា ពីព្រោះក្រុម​​ អ៉ីរ៉ាក់ មិន​ធ្លាប់​​ធ្លាក់​​ត្រឹម​វគ្គ​ជម្រុះ​ក្នុង​ពូល​ឡើយ។ ពួក​គេ​តែង​តែ​បាន​ឡើង​ទៅ​ជុំ​ចុង​ក្រោយ​រហូត​គិត​ចាប់​តាំង​ពី​ឆ្នាំ​ដំបូង ២០១៣ មក ហើយ​ពួក​គេ​​ធ្លាប់​បាន​ឈ្នះ​ជើង​ឯក​ពាន​រង្វាន់​នេះ​ថែម​ទៀត។ បើទោះបីជា អ៉ីរ៉ាក់ ចាញ់ ក៏​ពួក​គេ​នៅ​តែ​មាន​ភាគ​រយ​ខ្ពស់​ក្នុង​ការ​ឡើង​ទៅ​ជុំ​ចុង​ក្រោយ​​ក្នុង​នាម​ជា​ក្រុម​លេខ​២​ល្អ​បំផុត។ ផ្ទុយ​ទៅ​វិញ ប្រសិន​បើ កម្ពុជា ចាញ់​គឺ​អស់​ឱកាស​ហើយ ប៉ុន្តែ​ ប្រសិន​បើ​ស្មើ​គ្នា​គឺ​ អ៉ីរ៉ាក់ លេខ​១ ហើយ​​​​ កម្ពុជា​​អាច​មាន​ឱកាស​អ៊ុត​មើល​ចំណាត់​ថ្នាក់​លេខ​ ២ ល្អ​បំផុត​ក្នុង​ពូល។

ងាកមកមើលកម្ពុជា​វិញ មិន​ធ្លាប់​មាន​ប្រវត្តិ​ឡើង​ដល់​ជុំ​ចុង​ក្រោយ​ឡើយ ពោល​គឺ​ធ្លាក់​ត្រឹម​វគ្គ​ជម្រុះ​ក្នុង​ពូល​រហូត។ ឆ្នាំ​ ២០២៥​ គឺ​ជា​ការ​ទទួល​ធ្វើ​ម្ចាស់​ផ្ទះ​លើក​ទី​ ៣ បន្ទាប់​ពី​ធ្លាប់​ធ្វើ​ម្ចាស់​ផ្ទះ​ឆ្នាំ​ ២០១៧ និង ឆ្នាំ​ ២០១៩។

មែនទែនទៅ សម្រាប់ការប្រកួតពានរង្វាន់ AFC  Asian Cupមិនមែនថាកម្ពុជា មិនមានឳកាស​ជុំ​ចុង​ក្រោយទាល់តែសោះទេ គ្រាន់តែបានឡើងហើយ តែមិនមានសំណាង។ គួររម្លឹកដែរថា កម្ពុជាធ្លាប់សាងកំណត់ត្រាបានម្ដង ដោយកាលនោះលោក​ Koji Gyotoku គ្រូ​បង្វឹក​ជម្រើស​ជាតិ​កម្ពុជា បាន​ដឹក​នាំ​ក្រុម U20 ​កម្ពុជា បង្កើត​ប្រវត្តិ​សាស្ត្រ​ដំបូង​ក្នុង​ការ​ឡើង​ទៅ​ជុំ​ចុង​ក្រោយ​ពាន​រង្វាន់ AFC U20 Asian Cup ​ឆ្នាំ​២០២០។ លទ្ធផល​ការ​ប្រកួត​នៅ​ពេល​នោះ​ធ្វើ​ឲ្យ​មាន​ការ​ភ្ញាក់ផ្អើល​មែន​ទែន ពី​ព្រោះ​ស្ទើរ​តែ​ឈ្នះ​គ្រប់​ការ​ប្រកួត​ក្នុង​ពូល ហើយ​ជា​ពិសេស​គឺ​បាន​​ឈ្នះ​ថៃ។ ការ​ប្រកួត​ពហុកីឡដ្ឋាន​ជាតិ​អូឡាំពិក បើក​ឆាក​ចាញ់ ម៉ាឡេស៊ី​ ប្រផុត​ប្រផើយ​គឺ ៤-៥ ប៉ុន្តែ​​៣​ប្រកួត​ចុង​ក្រោយ បាន​​ឈ្នះ កោះម៉ារីណា ៩-០, ឈ្នះ ថៃ ២-១ និង ឈ្នះ ព្រុយណេ ៣-០ ដើម្បី​ទទួល​បាន​​លេខ ២ ក្នុង​ពូល ឡើង​ទៅ​ជុំ​ចុង​ក្រោយ។ ទោះ​បី​ជា​យ៉ាង​ណា ​ដោយសារ​វិបត្តិ​កូវីដ-១៩ ម្ចាស់​ផ្ទះ អ៊ូបេគីស្ថាន បាន​លុប​​​ចោល​សម្រាប់​ការ​រៀបចំ​ប្រកួត​ជុំ​ចុង​ក្រោយ។

​ដុច្នេះ ស្អែកនេះ U23 កម្ពុជា ត្រូវឈ្នះ អ៉ីរ៉ាក់ ជាចាំបាច់ ដើម្បីបំបែកកំណត់ត្រាលើកទី២ ឡើង​ទៅ​ជុំ​ចុង​ក្រោយ ៕