ភ្នំពេញ៖ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បច្ចុប្បន្នជាប្រធានព្រឹទ្ធសភា បានលើកឡើងថា៖ សម្តេចបានលេងកីឡាវាយកកូនហ្គោល អស់រយៈពេល២៥ឆ្នាំ កន្លងមកហើយសម្តេចទើបតែទួលបាន eagle par4 ៥លើកប៉ុណ្ណោះ ពោលគឺមានន័យថា៥ឆ្នាំបានតែ១គ្រាប់។ សម្តេចតេជោ បានបញ្ជាក់យ៉ាងដូច្នេះថា៖ «២៥ឆ្នាំបាន៥គ្រាប់ គឺ៥ឆ្នាំបាន ១គ្រាប់ តែក៏បានបង្ហាញថាកម្លាំងខ្ញុំនៅរឹងមាំល្អណាស់ដូចផ្ការីកគ្រប់រដូវក្រោមម្លប់សន្តិភាព»។

នៅយប់ថ្ងៃទី១២ ខែមករា ឆ្នាំ២០២៥ នេះ សម្តេចតេជោ ហ៊ុន សែន បានសរសេរលើបណ្តាញសង្គមផ្លូវការរបស់សម្តេចថា៖ «ព្រឹកម៉ិញឆ្លៀតទៅវាយកូនគោលក្នុងពេលមានខ្យល់ខ្លាំង និងធាតុអាកាសត្រជាក់តែទទួលបានលទ្ធផលល្អនោះ គឺ eagle in par4»។ សម្តេចតេជោ ក៏បានបញ្ជាក់បន្ថែមទៀតថា៖ «ខ្ញុំវាយកូនគោល២៥ឆ្នាំហើយទើបទទួលបាន eagle par4 តែ៥ប៉ុណ្ណោះ លើកទី១ តារាងកប់ស្រូវ ឆ្នាំ២០០២, លើកទី២ តារាងកប់ស្រូវ ២០០៤, លើកទី៣ តារាងសៀមរាប ឆ្នាំ២០០៨, លើកទី៤ តារាងក្រុងឡុងប្រទេសអង់គ្លេស ឆ្នាំ២០០៩ និងលើកទី៥ នៅតារាង (CHHUN on Golf Resort ) ឆ្នាំ២០២៥»។ Eagle par5 ងាយរកបានតែ eagle Par4ពិបាករក។

សម្តេចតេជោ បានសរសេរបញ្ជាក់ថា៖ «ខ្ញុំសូមពន្យល់ឡូ par4 គេឲ្យយើងវាយ ចំនួន ៤ ដំបង តែយើងវាយតែ២ដំបងចូល គឺ-2 គេហៅថា eagle។ ២៥ឆ្នាំបាន៥គ្រាប់ គឺ៥ឆ្នាំបាន១គ្រាប់ តែក៏បានបង្ហាញថាកម្លាំងខ្ញុំនៅរឹងមាំល្អណាស់ដូចផ្ការីកគ្រប់រដូវក្រោមម្លប់សន្តិភាព»៕