ភ្នំពេញ៖ បុរសជាអតីតអ្នកដឹកសាច់គោឲ្យទីសត្តឃាតម្នាក់ដែលបានចោទប្រកាន់ប្រពន្ធរបស់ខ្លួនថាមានប្រុសថ្មីក្នុងអំឡុងពេលខ្លួនកំពុងជាប់ពន្ធនាគារ រួចនាំកូនប្រុសស្រីរត់ចោលទៀតនោះ ត្រូវបានគេប្រទះឃើញធ្វើអត្តឃាតចង ក សម្លាប់ខ្លួន ពេលនេះប្រពន្ធបានចេញមុខបកស្រាយហើយថា គាត់មិនមានប្រុសថ្មីអីទេ ប៉ុន្តែប្ដីគាត់វិញជាមនុស្សសេពគ្រឿងញៀន និងងប់ងល់ជាមួយល្បែងសុីសង ហើយជាប់គុកក៏ព្រោះតែយកម៉ូតូគេលក់លេងល្បែងដែរ មិនតែប៉ុណ្ណោះពេលចេញពីគុកវិញតែងរករឿងនិងយកកាំបិតចង់អារ ក សម្លាប់គាត់ចោលទើបគាត់ខ្លាចហើយនាំកូនៗទៅស្នាក់នៅផ្ទះម្ដាយមីងឯបុរីពិភពថ្មីបណ្ដោះអាសន្ន មិនបានរត់តាមប្រុសឡើយ ។
កាលពីវេលាព្រឹកថ្ងៃទី២០ ខែមីនា ឆ្នាំ២០២៥ បុរសនោះបានធ្វើដំណើរទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ដើម្បីឲ្យអាជ្ញាធរជួយអន្តរាគមន៍ ហៅប្រពន្ធមកជួបដោះស្រាយគ្នាផ្ដិតមេដៃលែងលះគ្នាចែកកូននិងទ្រព្យសម្បត្តិគ្នាបញ្ចប់រឿង ។ ដោយខណៈនោះបុរសខាងលើបានអះអាងថាខ្លួនធ្វើឲ្យបាត់ម៉ូតូ១គ្រឿងដែលថៅកែទីសត្តឃាតកាប់គោទិញឲ្យជិះដឹកសាច់គោ ហើយត្រូវថៅកែប្ដឹងដាក់ពន្ធនាគារ១ឆ្នាំ ស្រាប់តែចេញមកវិញប្រពន្ធមានប្រុសថ្មី និងនាំកូនៗរត់ចោលខ្លួនទៀត ស្រាប់តែពេលនេះចង ក សម្លាប់ខ្លួនតែម្ដង ។
ចំណែកស្រ្តីជាប្រពន្ធក្រោយពេលដឹងថា បុរសជាប្ដីរូបនេះចង ក សម្លាប់ខ្លួនក៏បានទៅកាន់ទីនោះហើយបានបដិសេធន៍ថាគាត់គ្មានអ្នកថ្មីទេ ហើយថាប្ដីគាត់ម្នាក់នេះប្រើប្រាស់គ្រឿងញៀន ហើយងប់និងលេងល្បែងសុីសងល្បែងណិត បំផ្លាញទ្រព្យសម្បត្តិក្នុងផ្ទះ ។ រហូតក្រោយមកធ្លាក់ខ្លួនខ្ចីម៉ូតូគេទៅលក់យកលុយលេងល្បែងទើបម្ចាស់គេប្ដឹងដាក់ពន្ធនាគារ មិនតែប៉ុណ្ណោះកន្លងមកប្ដីរូបនេះតែងតែគំរាមសម្លាប់នាងចោលរហូត ជាក់ស្ដែងនៅថ្ងៃទី៨ ខែមីនា ឆ្នាំ២០២៥ បានយកកាំបិតប្រុងអារ ក សម្លាប់នាងចោល ដោយនិយាយថាសម្លាប់នាងរួច អារ ក សម្លាប់ខ្លួនឯងតាមក្រោយ ហើយកូនទៅណាទៅៗ ពេលនោះដោយខ្លាចស្លាប់ ទើបនាងនាំកូនៗគេចចេញពីផ្ទះទៅនៅផ្ទះម្ដាយមីងឯបុរីពិភពថ្មី២ ជាបណ្ដោះអាសន្នប៉ុណ្ណោះ ។ 
ស្រ្តីរូបនោះបាននិយាយបន្តទៀតថា ពេលនោះប្ដីនៅផ្ទះជួលខាងលើតែម្នាក់ឯងរហូតមកហើយនាងក៏មិនបានដឹងរឿងថាប្ដីមានរឿងអ្វីទើបចង ក សម្លាប់ខ្លួនដែរ ប៉ុន្តែមុនពេលស្លាប់ប្ដីបានយកម៉ូតូបងរបស់ខ្លួន១គ្រឿងទៅបញ្ចាំយកលុយលេងល្បែង ហើយសង្ស័យពិបាកចិត្តរឿងនិងទើបចង កសម្លាប់ខ្លួនក៏មិនដឹងដែរ ៕